Gujarat News Live: કચ્છના ભચાઉમાં ગમખ્વાર અકસ્માત, રાજ્યમાં વીજળીની વધતી માંગને લઈને CMની સમીક્ષા, દશેરા પર વાહનોની ધૂમ ખરીદી

દશેરાના દિવસે વાહનોની ખરીદીને શુભ માનવામાં આવે છે. જેને લઈને લોકો મહિના પહેલાથી જ એડવાન્સ બુકિંગ કરતા હોય છે. આ વર્ષે ગત વર્ષ કરતાં 20% વધુ એડવાન્સ બુકિંગ થયું છે. આજના દિવસે લોકો મોટા પ્રમાણમાં વાહનોની ખરીદી કરી રહ્યા છે. ત્યારે સુરત શહેરમાં વાહનોની ધૂમ ખરીદી જોવા મળી રહી છે. તો અમદાવાદમાં પણ વહેલી સવારથી શોરૂમો પર ગ્રાહકોની ભીડ જોવા મળી રહી છે.

ગુજરાતમાં ઊર્જા ક્ષેત્રે સતત વધી રહેલી માંગ અને વીજ પુરવઠાની પરિસ્થિતિની સમીક્ષા કરવા માટે મુખ્યમંત્રીની અધ્યક્ષતામાં એક મહત્વપૂર્ણ બેઠક યોજવામાં આવી હતી. આ ઉચ્ચ સ્તરીય બેઠકમાં ઊર્જા મંત્રી ઋષિકેશ પટેલ, રાજ્ય મંત્રી કૌશિક વેકરીયા, મુખ્ય સચિવ મનોજ દાસ, ઊર્જા વિભાગના અગ્ર સચિવ અશ્વનીકુમાર, ગુજરાત ઊર્જા વિકાસ નિગમ લિમિટેડના મેનેજિંગ ડિરેક્ટર શાલિની અગ્રવાલ સહિત પાવર સેક્ટરના અન્ય ઉચ્ચ અધિકારીઓ ઉપસ્થિત રહ્યા હતા.

રાજ્યમાં ખેડૂતો, ઉદ્યોગો અને સામાન્ય નાગરિકોને અવિરત વીજ પુરવઠો સુનિશ્ચિત કરવા માટે સરકારે લીધેલાં તાત્કાલિક પગલાં અને ભવિષ્યના સુદ્રઢ આયોજન અંગે આ બેઠકમાં વિસ્તૃત ચર્ચા કરવામાં આવી હતી.