Protein Rich Roti: ઘઉંના લોટની રોટલી જ બની જશે પ્રોટીનથી ભરપુર, લોટ બાંધતી વખતે ઉમેરી દો આ 2 વસ્તુઓ
Protein Rich Roti Flour: જો તમે પણ ઘઉંના લોટની રોટલીને પ્રોટીનથી ભરપુર બનાવી ખાવા માંગતા હોય તો રોટલીનો લોટ બાંધો ત્યારે ઘઉંના લોટમાં આ બે વસ્તુઓ ઉમેરી દો. આ વસ્તુઓની મદદથી તમને ઘઉંના લોટની રોટલીમાંથી પણ ભરપુર માત્રામાં પ્રોટીન મળશે.
Protein Rich Roti Flour: છેલ્લા કેટલાક સમયથી પ્રોટીન ઇન્ટેક ઉપર વધારે ભાર મૂકવામાં આવે છે. લોકો પણ પ્રોટીન ઇન્ટેકને લઈને જાગૃત થઈ રહ્યા છે તેથી એવા ઉપાયો શોધતા હોય છે જેની મદદથી આહારમાં પ્રોટીનનો સમાવેશ કરી શકાય. પ્રોટીન ઇન્ટેક માટે જરૂરી નથી કે તમે પ્રોટીન પાવડર જ લો રોજના આહારમાં પણ કેટલીક વસ્તુઓ ઉમેરીને પ્રોટીન ઇન્ટેક પૂરું કરી શકાય છે. કેમકે ઘઉંના લોટની રોટલીમાં પણ તમે પ્રોટીન એડ કરી શકો છો. રોટલીમાં પ્રોટીન વધારવા માટે શું કરવું ચાલો તમને જણાવીએ.
આ પણ વાંચો: Liver Friendly Fruits: સફરજનથી પપૈયા સુધી લીવરની ચરબી ઘટાડવામાં મદદ કરી શકે છે આ 5 ફળ
આપણે ત્યાં રોટલી ભોજનમાં સૌથી મહત્વની હોય છે. ઘણા લોકો તો દિવસમાં બે વખત રોટલી ખાતા હોય છે. ઘરમાં મોટાભાગે ઘઉંના લોટની રોટલી બનતી હોય છે. જો તમે ઘઉંના લોટની રોટલીમાં બે વસ્તુઓ ઉમેરી દેશો તો સાદી રોટલી પણ પ્રોટીનથી ભરપૂર બની જશે. ઘરની સાદી રોટલી ને હેલ્ધી અને પ્રોટીન રીચ બનાવવા માટે તેમાં અન્ય બે લોટ ઉમેરવા. આ લોટ કયા છે અને તેનું પ્રમાણ કેવી રીતે રાખવું ચાલો તે પણ જાણીએ.
ચણાનો લોટ ઉમેરો
ઘઉંની રોટલીને પ્રોટીનથી ભરપૂર બનાવવા માટે તેમાં અન્ય બે લોટ ઉમેરી શકો છો. આ બે લોટમાં સૌથી મહત્વનો છે ચણાનો લોટ. તેમાં પણ જો તમે આખા ચણાને દળાવી અને તેનો લોટ તૈયાર કરો તો સૌથી વધારે ફાયદાકારક છે નહીં તો માર્કેટમાં મળતો ચણાનો તૈયાર લોટ પણ લઈ શકાય છે. આ સિવાય રોટલીના લોટમાં જુવાર, બાજરો કે મકાઈનો લોટ ઉમેરવો. ઘઉંના લોટમાં આ બે લોટ ઉમેરવાથી પ્રોટીનથી ભરપૂર રોટલી તૈયાર થાય છે.
ઘઉંના લોટમાં ચણાના લોટનું માપ
રોટલી બનાવવા માટે નોર્મલી તમે 4 કપ ઘઉંના લોટનો ઉપયોગ કરતા હોય તો પ્રોટીનથી ભરપૂર રોટલી બનાવવા માટે બે કપ ઘઉંનો લોટ લેવો. તેમાં 1 કપ ચણાનો લોટ અને 1 કપ બાજરો, જુવાર અથવા મકાઈ એ ત્રણમાંથી કોઈ એક લોટ ઉમેરવો. આ રીતે ત્રણેય લોટ મિક્સ કરીને રોટલીનો લોટ તૈયાર કરવો અને તેમાંથી રોટલી બનાવવી.
ઘઉંના લોટમાં ચણાનો લોટ અથવા બાજરો કે જુવારનો લોટ ઉમેરીને બનાવેલી રોટલી પ્રોટીન સહિતના પોષક તત્વોથી ભરપૂર હોય છે. આવી રોટલી નિયમિત ખાવાથી વજન ઘટાડવામાં ફાયદો થઈ શકે છે, બ્લડ સુગર મેનેજ કરવામાં મદદ મળે છે. આવી રોટલી નાના બાળકોથી લઈને વડીલો સુધી દરેક માટે હેલ્ધી છે. સૌથી મોટી વાત એ છે કે આ રોટલી ખાધા પછી કલાકો સુધી ભૂખ નહીં લાગે કારણ કે પેટ લાંબા સમય સુધી ભરેલું રહે છે જેના કારણે ઓવર ઇટિંગની સમસ્યા પણ દૂર થઈ જશે.
(Disclaimer: અહીં આપવામાં આવેલી માહિતી સામાન્ય માન્યતાઓ અને જાણકારી પર આધારિત છે. ZEE 24 કલાક તેની પુષ્ટિ કરતું નથી.)