Jaggery Kheer: ખીરમાં ગળાશ માટે ખાંડ નહીં ગોળ ઉમેરો, દાઢે વગળી જશે સ્વાદ, જાણો ગોળવાળી ખીર બનાવવાની રીત

Kheer with Jaggery: ખીર એવી મીઠાઈ છે જે ઘરમાં અવારનવાર બને છે. મોટાભાગના ઘરોમાં ખીર ખાંડ ઉમેરીને જ બનાવવામાં આવે છે. આજે તમને ખાંડ નહીં પણ ગોળ ઉમેરીને બનતી ખીર બનાવવાની રીત જણાવીએ. ખાંડને આમ પણ સ્વાસ્થ્ય માટે હાનિકારક ગણવામાં આવે છે. તેથી જો તમે ખીરમાં ખાંડને બદલે ગોળ ઉમેરીને ખાશો તો તેનાથી હેલ્થને પણ નુકસાન નહીં થાય.

જે લોકોને અવારનવાર મીઠાઈ ખાવાની ઈચ્છા થતી હોય તેમના માટે ગોળવાળી ખીર બેસ્ટ ઓપ્શન છે. ગોળવાળી ખીર સ્વાદમાં લાજવાબ લાગે છે. જો કે આ ખીર બનાવવી એક કલા છે. કારણ કે ખીરમાં ગોળ ઉમેરવામાં જરા પણ ભુલ થાય તો દૂધ ફાટી પણ શકે છે. એટલે આ ખીર તેની રીત જાણ્યા પછી જ બનાવવી.

આજે અહીં તમારા માટે ગોળવાળી ખીર બનાવવાની પરફેક્ટ રીત જણાવેલી છે. સામાગ્રીનું પરફેક્ટ માપ અને ખીર બનાવવાની રીતને બરાબર ફોલો કરશો તો ખીર બેસ્ટ બનશે.

ખીર બનાવવાની રીત

ફુલ ક્રીમ દૂધ 1 લીટર
ચોખા 50 ગ્રામ
દેશી ગોળ 200 ગ્રામ
એલચી પાવડર
સુકા મેવા ઝીણા સમારેલા

ખીર બનાવતા પહેલા કરવાની તૈયારી

1. સૌથી પહેલા ખીર માટેના ચોખાને પાણીથી સાફ કરી 30 મિનિટ માટે પાણીમાં પલાળો.
2. એક કઢાઈમાં દેશી ગોળ લઈ તેમાં થોડું પાણી ઉમેરી ગોળ ઓગળી જાય ત્યાં સુધી ગરમ કરો.
3. પાણી સાથે ગોળનું સીરપ બનાવી તેને ઠંડુ કરી લો.

ખીર બનાવવાની રીત

• એક કઢાઈમાં દૂધ ઉકાળવા મુકો. દૂધમાં ઉકાળો આવે એટલે તેમાં ઝીણા સમારેલા ડ્રાયફ્રુટ ઉમેરી દો. 
• દૂધ અને ડ્રાયફ્રુટ બરાબર ઉકળે પછી દૂધમાં પલાળેલા ચોખા ઉમેરો.
• ચોખા ઉમેર્યા પછી ગેસ સ્લો કરો અને ધીમા તાપે ખીર ઉકાળો.
• ખીરને હલાવતાં રહેવું જેથી દૂધ કે ચોખા કઢાઈમાં ચોંટે નહીં.
• ચોખા પાકી જાય અને દૂધ પણ ઘટ્ટ થઈ જાય તેમાં એલચી પાવડર ઉમેરો.
• ખીર એકદમ કુક થઈ જાય એટલે ગેસ બંધ કરી દો અને 2 થી 3 મિનિટ ખીરને ઠંડી થવા દો. 
• ખીર થોડી ઠંડી થાય એટલે તેમાં ગોળનું પાણી ઉમેરો અને મિક્સ કરો. 
• ત્યારબાદ ખીર રુમ ટેમ્પરેચર પર આવે પછી તેને ફ્રીજમાં ઠંડી કરી સર્વ કરો.

(Disclaimer: અહીં આપવામાં આવેલી માહિતી સામાન્ય જાણકારી પર આધારિત છે. ZEE 24 કલાક તેની પુષ્ટિ કરતું નથી.)