ડ્રેગનનું ખતરનાક જાળું! અમેરિકામાં ચીનના 'સ્લીપર સેલ'નો પર્દાફાશ, તાઈવાનના રાષ્ટ્રપતિના પરિવારને બનાવ્યો નિશાન

Taiwan, President's son : શું ડ્રેગન એટલે કે ચીને અમેરિકાની ધરતી પર પોતાના સ્લીપર સેલ અને જાસૂસોનું જાળું બિછાવી દીધું છે? શું શી જિનપિંગની ગુપ્તચર એજન્સી અમેરિકાની ધરતીનો ઉપયોગ પોતાના વિરોધીઓ અને દુશ્મનોની કુંડળી શોધવા માટે કરી રહી છે? આ સવાલ એટલા માટે ઉઠી રહ્યા છે, કારણ કે અમેરિકાની તપાસ એજન્સી FBIએ લોસ એન્જલસ એરપોર્ટ પરથી એક એવી મહિલાની ધરપકડ કરી છે, જેના ખુલાસાથી અમેરિકા અને ચીન વચ્ચે રાજદ્વારી ભૂકંપ સર્જાયો છે...

શાંઘાઈ જતી ફ્લાઇટ પકડવા માટે એરપોર્ટ પહોંચી

કહાની શરૂ થાય છે લોસ એન્જલસ ઈન્ટરનેશનલ એરપોર્ટથી. જ્યાં FBIના એજન્ટોએ વેનયિંગ ઝાંગ ઉર્ફે હીથર ઝાંગને ત્યારે ઝડપી લીધી, જ્યારે તે શાંઘાઈ જતી ફ્લાઇટ પકડવા માટે એરપોર્ટ પહોંચી હતી. કેલિફોર્નિયાના ઈર્વિન શહેરમાં રિયલ એસ્ટેટ એજન્ટ તરીકે કામ કરતી આ મહિલા કોઈ સામાન્ય નાગરિક નહીં, પરંતુ અમેરિકન દસ્તાવેજો અનુસાર ચીનના ઈશારે કામ કરતી એક અનડિફાઈન્ડ ફોરેન એજન્ટ હોવાનું સામે આવ્યું છે. FBIની ચાર્જશીટ મુજબ આ સમગ્ર કાવતરાનો વ્યાપ ઘણો મોટો છે.

બંનેએ ઘર અને ત્યાં આવતા લોકોના ફોટા અને વીડિયો બનાવ્યા

સપ્ટેમ્બર 2025માં વેનયિંગ ઝાંગ પોતાના એક સાથી સાથે લાસ વેગાસથી સિયાટલ ગઈ હતી ત્યાર બાદ બંને કારમાં તાઈવાનના રાષ્ટ્રપતિના પુત્ર ટિંગ-યુ લાઈના ઘર નજીક પહોંચ્યા હતા. તપાસ એજન્સીનો આરોપ છે કે બંનેએ ઘર અને ત્યાં આવતા લોકોના ફોટા અને વીડિયો બનાવ્યા હતા. અમેરિકન અધિકારીઓના જણાવ્યા અનુસાર, ઝાંગે આ દરમિયાન ચીનના એક સરકારી અધિકારીને વેઇચેટ પર માહિતી મોકલી હતી.

તાઈવાનના દિગ્ગજોની દેખરેખ રાખવાનો ટાસ્ક 

આખરે આ જાસૂસીની શરૂઆત ક્યાંથી થઈ? FBIની રિપોર્ટ મુજબ જૂન 2025માં ઝાંગ પોતાની જૂની યુનિવર્સિટીના એક મિત્ર મારફતે ચીનના ચાંગશા શહેર ગઈ હતી. ત્યાં એક ગુપ્ત ખાનગી રૂમમાં તેની મુલાકાત ચીનના એક ગુપ્તચર અધિકારી સાથે થઈ હતી. ત્યાં જ તેને અમેરિકામાં રહીને તાઈવાનના દિગ્ગજોની દેખરેખ રાખવાનું ટાસ્ક સોંપવામાં આવ્યું હતું..

ટિંગ-યુ લાઈ અમેરિકામાં જ ઉછર્યા છે

નિશાના પર હતા તાઈવાનના રાષ્ટ્રપતિ લાઈ ચિંગ અને તેના પુત્ર ટિંગ-યુ લાઈ. ટિંગ-યુ લાઈ અમેરિકામાં જ ઉછર્યા છે. તેમણે અમેરિકાની પ્રતિષ્ઠિત યુનિવર્સિટીઓમાંથી ઇલેક્ટ્રિકલ એન્જિનિયરિંગમાં માસ્ટર્સ અને પીએચડી કરી છે..

FBIના સ્પેશિયલ એજન્ટ હોલ્ટે કોર્ટમાં દાખલ કરેલી ફરિયાદમાં સ્પષ્ટ કહ્યું છે કે ભવિષ્યમાં જો ચીન અને તાઈવાન વચ્ચે કોઈ સૈન્ય સંઘર્ષ કે યુદ્ધ થાય, તો શી જિનપિંગ તાઈવાનના રાષ્ટ્રપતિ પર દબાણ બનાવવા માટે તેમના પરિવાર અને નજીકના લોકોની લોકેશન, તેમના ઘરો અને વાહનોનો ઉપયોગ કરી શકે છે..

આ પહેલીવાર નથી જ્યારે અમેરિકાની ધરતી પર ચીનના જાસૂસોનો પર્દાફાશ થયો હોય. અમેરિકા લાંબા સમયથી ચીનની ગુપ્તચર ગતિવિધિઓનું કેન્દ્ર બનતું રહ્યું છે.

અમારા એકબીજા સાથે ખૂબ સારા સંબંધો

અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ પણ ઘણીવાર જાહેર મંચ પરથી કહી ચૂક્યા છે કે ચીન અમેરિકામાં ખુલ્લેઆમ જાસૂસી કરે છે. જોકે, તેમણે એ પણ કટાક્ષ કર્યો હતો કે અમેરિકા પણ પોતાની ગુપ્તચર વ્યૂહરચના હેઠળ પાછળ રહેતું નથી. અમારા એકબીજા સાથે ખૂબ સારા સંબંધો છે. હવે કોઈએ કહ્યું કે તેઓ અમારી જાસૂસી કરે છે. મેં કહ્યું કે શક્ય છે કે તેઓ એવું કરતા હોય, પરંતુ અમે પણ તેમની જાસૂસી કરીએ છીએ.

વેનયિંગ ઝાંગની ધરપકડે ફરી એકવાર સવાલ ઊભા કર્યા છે કે ચીન પોતાની વિસ્તરણવાદી નીતિઓ અને તાઈવાન પર દબાણ બનાવવા માટે સમુદ્રની સરહદો પાર કરીને અમેરિકાની અંદર સુધી પોતાના ગુપ્તચર નેટવર્કને સક્રિય કરી ચૂક્યું છે.