અમેરિકા સામે ઈરાનની 'સરેન્ડર ડીલ' ફેલ: હોર્મુઝ ખોલવાની ઓફરને ટ્રમ્પે એક જ ઝાટકે નકારી કાઢી

Strait of Hormuz : સંયુક્ત રાષ્ટ્રના મંચ પરથી ઈરાને એક તરફ અમેરિકા પર હુમલો કરવા અને આતંકવાદના મુદ્દે જોરદાર પ્રહારો કર્યા, તો બીજી તરફ પોતાની શરતો પર યુદ્ધ રોકવા માટે ફરી એકવાર દાવ પણ ખેલ્યો. ઈરાને કતાર મારફતે અમેરિકા સુધી યુદ્ધવિરામનો પ્રસ્તાવ પહોંચાડ્યો. આ પ્રસ્તાવમાં ઈરાનની આશાઓ અટવાયેલી હતી લેબનોનમાં હિઝબુલ્લાહની તબાહી અને ઈરાન પર મંડરાતા અમેરિકન B-52 બોમ્બર્સના ખૌફ વચ્ચે ઈરાનના વિદેશમંત્રી અબ્બાસ અરાઘચીએ ટ્રમ્પ સમક્ષ એક સરેન્ડર ડીલ રજૂ કરી હતી.

• ઈરાનનો સાત દિવસનો પ્લાન નિષ્ફળ
• ટ્રમ્પે ઈરાનનો પ્રસ્તાવ ફગાવી દીધો
• ઈરાનની શરતો માનવાનો ટ્રમ્પનો ઈન્કાર
• હોર્મુઝ ખોલવાની ઈરાનની ઓફર ફગાવી
• નવેમ્બરમાં ફરી હુમલાનો ખતરો

પ્લાન હતો-7 દિવસમાં બધું ઠીક કરવાની ખાતરી. કતાર તરફથી આ પ્રસ્તાવ ટ્રમ્પ સુધી પહોંચાડવામાં આવ્યો, પરંતુ જ્યારે ટ્રમ્પે પ્રસ્તાવમાં ઈરાનની શરતો વાંચી તો તેમણે તેને તરત જ રિજેક્ટ કરી દીધો. ઈરાને જે 7 દિવસનો પ્રસ્તાવ મૂક્યો હતો, તેની ડિટેલ પણ હવે તમને જણાવીએ.

• અમેરિકા લેબનોન સહિત તમામ મોરચા પર સૈન્ય કાર્યવાહી અને ગોળાબારી તાત્કાલિક અને સંપૂર્ણપણે બંધ કરે
• અમેરિકન સેનાએ ઈરાનના બંદરો પર લગાવેલી નૌસૈનિક નાકાબંધી સંપૂર્ણપણે દૂર કરવામાં આવે
• ઈરાનના કાચા તેલના નિકાસ અને વેચાણ પર લાગેલા અમેરિકન પ્રતિબંધો હટાવવામાં આવે
• દુનિયાભરની આંતરરાષ્ટ્રીય બેંકોમાં બ્લોક પડેલી ઈરાનની લગભગ 12 અબજ ડોલરની સંપત્તિ અમેરિકા કોઈપણ વિલંબ વિના તાત્કાલિક રિલીઝ કરે

પરમાણુ કાર્યક્રમને લઈને વોશિંગ્ટન સાથે સીધી રાજદ્વારી વાટાઘાટો

ઈરાને પ્રસ્તાવમાં એમ પણ કહ્યું હતું કે જો અમેરિકા 5 દિવસમાં આ તમામ શરતો પૂરી કરે, તો છઠ્ઠા દિવસે ઈરાન સ્ટ્રેટ ઓફ હોર્મુઝને આંતરરાષ્ટ્રીય જહાજો માટે સંપૂર્ણપણે ખોલી દેશે અને સાતમા દિવસે ઈરાન પોતાના પરમાણુ કાર્યક્રમને લઈને વોશિંગ્ટન સાથે સીધી રાજદ્વારી વાટાઘાટો ફરી શરૂ કરશે

ઈરાને પાસો તો મોટો ફેંક્યો હતો...તેને લાગ્યું હતું કે કાચા તેલની કિંમતો ઘટવાના અને સમુદ્રી માર્ગ ખુલવાના લાલચમાં ડોનાલ્ડ ટ્રમ્પ માની જશે. પરંતુ ટ્રમ્પે આ 7 દિવસના પ્લાનને સીધો નકારી દીધો. તેની પાછળ પણ એક મોટુ કારણ છે.

અમેરિકા ઈરાનને ઓક્સિજન આપવા માંગતું નથી

જૂનમાં પણ આવો જ એક કરાર થયો હતો, જેને ઈરાને એક અઠવાડિયામાં તોડી નાખ્યો હતો અને અમેરિકન જહાજો પર હુમલા કર્યા હતા. અમેરિકા જાણે છે કે નાકાબંધીના કારણે ઈરાનની અર્થવ્યવસ્થા દમ તોડી રહી છે. ઢીલ આપીને અમેરિકા ઈરાનને ઓક્સિજન આપવા માંગતું નથી. સાથે જ અમેરિકન ગુપ્તચર એજન્સીઓના અહેવાલ મુજબ ઈરાન યુરેનિયમ સંવર્ધન રોકી રહ્યું નથી, પરંતુ વાતચીતની આડમાં સમય પસાર કરવા માંગે છે.

હવે ઈરાનને સુધરવાની તક નહીં

બીજી તરફ, વોલ સ્ટ્રીટ જર્નલના અહેવાલ મુજબ ટ્રમ્પે પોતાના નજીકના લોકો અને સહયોગીઓને સ્પષ્ટ કહી દીધું છે કે નવેમ્બરમાં અમેરિકાની મધ્યસત્ર ચૂંટણી બાદ તેઓ ફરી ઈરાન પર હુમલો કરી શકે છે. એટલે કે અમેરિકા હવે ઈરાનને સુધરવાની તક નહીં, પરંતુ તેને સંપૂર્ણપણે ઘૂંટણિયે લાવવાની યોજના બનાવી રહ્યું છે. વોશિંગ્ટનનું માનવું છે કે જ્યાં સુધી ઈરાનના પરમાણુ ઠેકાણાઓને નષ્ટ કરવામાં નહીં આવે, ત્યાં સુધી મધ્યપૂર્વમાં શાંતિ શક્ય નથી.

વ્હાઇટ હાઉસ હવે કોઈપણ કૂટનીતિક ડ્રામાના મૂડમાં નથી

ઈરાનનો 7 દિવસનો પ્લાન ફેલ થઈ ગયો છે. ટ્રમ્પના રિજેકશને સ્પષ્ટ કરી દીધું છે કે વ્હાઇટ હાઉસ હવે કોઈપણ કૂટનીતિક ડ્રામાના મૂડમાં નથી. જેના કારણે મધ્યપૂર્વમાં શાંતિની આશાઓ પણ ધૂંધળી થઈ ગઈ છે. એવામાં સમુદ્રમાં અમેરિકન વોરશિપ્સની ગર્જના અને આકાશમાં B-52 બોમ્બર્સની દહાડ જણાવી રહી છે કે નવેમ્બર માત્ર અમેરિકન ચૂંટણીની તારીખ નથી. ઈરાન માટે પણ આ કયામતના કાઉન્ટડાઉનની શરૂઆત બની શકે છે...