રાજકોટમાં ફટાકડા ફોડવા બાબતે બોલાચાલી બાદ મોડી રાત્રે પથ્થરમારો, પિતા-પુત્ર પર છરીથી હુમલો, એકનું મોત

ગૌરવ દવે, રાજકોટ : રાજકોટ શહેરમાં દિવાળીની રાત લોહિયાળ બની છે. શહેરના મવડી વિસ્તારમાં બાપાસીતારામ ચોક નજીક મારૂતિ નંદન નગરમાં શેરી નંબર 3માં જાહેર રસ્તા પર ફટાકડા ફોડતા બે ભાઈઓને વાહન પર પસાર થતા પિતા-પુત્ર સાથે બોલાચાલી થઇ હતી. જોકે આ બાબતે સમાધાન થઇ ગયા બાદ મોડી રાત્રે ફરી બને ભાઈઓએ પિતા-પુત્રના ઘરે પહોંચી પથ્થરમારો કરતા મામલો ગરમાયો હતો.

અમદાવાદમાં ફટાકડા ફોડવા બાબતે બબાલ, સોસાયટીના રહીશો પર ધોકા-લાકડી સાથે ત્રાટક્યું 25 લોકોનું ટોળું

અજિત સિંધવ પર છરીથી હુમલો

ઘરમાંથી બહાર નીકળતા અજિત સિંધવ પર આરોપી યશરાજ જાડેજા અને ઇન્દ્રજીત જાડેજાએ માર મારી છરીના સાતથી આઠ ઘા ઝીંકી દીધા હતા. ઇજાગ્રસ્ત અજિત સિંધવને રાજકોટ સિવિલ હોસ્પિટલમાં સારવાર માટે ખસેડાયો હતો, જ્યાં પ્રાથમિક સારવાર દરમિયાન મોત થયું હતું અને બનાવ હત્યામાં પલટાયો હતો. ઘટનામાં પિતાને બચાવવા વચ્ચે પડેલા પુત્ર કૃણાલ સિંધવ ઉપર પણ છરી વડે હુમલો કરી ઇજા પહોંચાડી હતી. હાલ માલવિયાનગર પોલીસે હત્યાની કલમનો ઉમેરો કરી વધુ તપાસ હાથ ધરી છે.

મૃતકના ભાઈ જણાવી સમગ્ર ઘટનાની હકીકત

મૃતક અજીત સિંધવના ભાઈ વિનોદભા સિંધવે જણાવ્યું હતું કે, ગઈકાલે રાત્રીના સમયે હુડકો વિસ્તારથી પરત મવડી વિસ્તારમાં અમારા ઘર તરફ મારા ભાઈ અને ભત્રીજો આવી રહ્યા હતા ત્યારે યશરાજ જાડેજા અને ઇન્દ્રજીત જાડેજા સાથે બોલાચાલી થઇ હતી કારણ કે આ બન્ને ભાઈઓ ત્યાં જાહેર રસ્તા પર ઘા કરી ફટાકડા ફોડી રહ્યા હતા.

આ સમયે બોલાચાલી બાદ સમાધાન થઇ ગયું હતું પછી પાછળથી રાત્રીના 2:30 વાગ્યા આસપાસ અમારા ઘરે વિશ્વેશ્વર મંદિર પાછળ મારુતિ સોસાયટીમાં આવી ઘર પર પથ્થરમારો કર્યો હતો જેથી ભાઈ અને ભત્રીજો ઘરની બહાર નીકળ્યા ત્યારે યશરાજ અને ઇન્દ્રજીત જાડેજાએ ધોકા પાઇપ વડે માર મારી હુમલો કર્યો હતો

સારવાર દરમિયાન 43 વર્ષીય ભાઈ અજીત સિંધવનું મોત નીપજ્યું છે, જયારે 21 વર્ષીય ભત્રીજો કૃણાલ હાલ સારવાર હેઠળ છે. સામાન્ય બાબતમાં છરી વડે હુમલો કરી ભાઈને મોતને ઘાટ ઉતારી દેવામાં આવ્યા છે. પોલીસ તંત્ર પાસે ન્યાયની માંગ કરીએ છીએ અમને યોગ્ય ન્યાય મળે તેવી અપેક્ષા છે. આરોપીઓ પણ નજીકમાં રહેતા હોવાથી એકબીજાને પરિચિત હતા.