Gujarat News Live: દ્વારકામાં કરા સાથે ધોધમાર વરસાદ, કચ્છમાં ફરી ભૂકંપનો આંચકો, PM મોદી એકતાનગરના પ્રવાસે

દ્વારકાના ભાણલડના ચોખંડા ગામમાં કરા સાથે વરસાદ પડતા ખેડૂતોની મુશ્કેલીમાં વધારો થયો છે. તો કલ્યાણપુર તાલુકાના રાજપરા ગામે પણ ધોધમાર વરસાદ પડ્યો છે. જેના કારણે ખેતરોમાં રહેલા પાકને નુકશાન થવાની ભીતિ સેવાઈ રહી છે. 

દેશનો સૌથી મોટો રેલવે હોલ્ડિંગ એરિયા ઉધના રેલવે સ્ટેશન પર બનાવવામાં આવ્યો છે. 10,000 સ્ક્વેર મીટરમાં આ હોલ્ડિંગ એરિયા બનાવવામાં આવ્યો છે. એક જ સમયે 15,000 જેટલા યાત્રીઓ ઊભા રહી શકે તે રીતની વ્યવસ્થા કરવામાં આવી છે. 51 જેટલા સીસીટીવી કેમેરા લગાવવામાં આવ્યા છે. હોલ્ડિંગ એરિયામાં કંટ્રોલરૂમ પણ ઊભો કરવામાં આવ્યો છે. 10 જેટલી ટિકિટ વિન્ડો ઓપન કરવામાં આવી છે. એરપોર્ટ પર જેવી સુવિધા હોય એવી સુવિધા મુસાફરોને મળી રહેશે. સ્વચ્છ ટોયલેટ બાથરૂમ સહિતની સુવિધાઓ મુસાફરોને મળી રહેશે. 
 

કચ્છના લખપત નજીક ભૂકંપનો આંચકો અનુભવાયો છે. રિક્ટર સ્કેલ પર 3.1ની તીવ્રતાનો ભૂકંપ નોંધાયો છે. લખપતથી 53 કિલોમીટર ઉત્તર ઉત્તર-પૂર્વ દિશામાં ભૂકંપનું કેન્દ્રબિંદુ નોંધાયું હતું. 31 ઓક્ટોબરના બપોરે 3 વાગ્યાને 31 મિનિટે ભૂકંપનો આંચકો અનુભવાયો હતો.