માલધારી સમાજ સાથે મારો જૂનો નાતો, આજે પણ મારા ઘરે ગોગા મહારાજનો દીવો પ્રગટે છે: હર્ષ સંઘવી

DyCM Harsh Sanghavi : ગાંધીનગર મહાનગરપાલિકાની ચૂંટણીને લઈ રાજકીય માહોલ ગરમાયો છે. ચૂંટણીના અંતિમ તબક્કામાં વિવિધ પક્ષો દ્વારા રાત્રી સભાઓ અને સમાજલક્ષી સંમેલનોનું આયોજન કરવામાં આવી રહ્યું છે. આ અંતર્ગત ભાજપ દ્વારા માલધારી મહાસંમેલનનું આયોજન કરવામાં આવ્યું હતું. નાયબ મુખ્યમંત્રી હર્ષ સંઘવીની ઉપસ્થિતિમાં યોજાયેલા આ સંમેલનમાં મોટી સંખ્યામાં માલધારી સમાજના આગેવાનો અને કાર્યકરો ઉપસ્થિત રહ્યા હતા.

'આજે પણ મારા ઘરે ગોગા મહારાજનો દીવો પ્રગટે છે'

સંમેલનમાં નાયબ મુખ્યમંત્રી હર્ષ સંઘવીએ સંબોધન કરતા માલધારી સમાજ સાથેના પોતાના જૂના સંબંધોને યાદ કર્યા હતા. તેમણે કહ્યું હતું કે, હું બલોદરનો છું અને આજે પણ મારા ઘરે ગોગા મહારાજનો દીવો પ્રગટે છે. તેમણે વધુમાં જણાવ્યું કે, રબારી સમાજના એક વડીલ પાસેથી તેમણે હીરા ઘસવાનું કામ શીખ્યું છે અને રબારી સમાજના એક હજારથી વધુ પરિવારો સાથે તેમનો જૂનો સંબંધ રહ્યો છે.

હર્ષ સંઘવીએ કહ્યું કે, માલધારી સમાજ મગજથી નહીં, દિલથી કામ કરતો સમાજ છે. તેમણે ભાજપ અને માલધારી સમાજ વચ્ચેના સંબંધોનો ઉલ્લેખ કરતા કહ્યું કે, આ નાતો વર્ષોથી મજબૂત રહ્યો છે. આ નાતો માત્ર રાજકારણનો નહીં, પરંતુ વિશ્વાસ અને લાગણીનો છે.

ગાંધીનગરમાં સૌથી મોટું પશુ દવાખાનું બનાવાશે

સંમેલનમાં સરકારની વિવિધ યોજનાઓ અને વિકાસકાર્યોનો પણ ઉલ્લેખ કરવામાં આવ્યો હતો. હર્ષ સંઘવીએ જણાવ્યું કે, ખેડૂતો સુધી સહાય પહોંચાડવાનું કામ સરકાર દ્વારા કરવામાં આવી રહ્યું છે. તેમણે આરોગ્ય ક્ષેત્રની યોજનાઓનો ઉલ્લેખ કરતા કહ્યું કે, હવે જરૂરિયાતના સમયે લોકો માટે લાખો રૂપિયાની સારવારની સુવિધા છે.

ગાંધીનગરના વિકાસ અંગે તેમણે જણાવ્યું કે, શહેરમાં શાળાઓમાં કોમ્પ્યુટરાઇઝેશન સહિતના કામો કરવામાં આવ્યા છે. શહેરમાં 25થી વધુ વિસ્તારોમાં ગાર્ડન બનાવવામાં આવ્યા છે અને તળાવો પણ વિકસાવવામાં આવ્યા છે. તેમણે ગાંધીનગર મહાનગરપાલિકા વિસ્તારમાં સૌથી મોટું પશુ દવાખાનું બનાવવાની વાત પણ કરી હતી. સરકાર અબોલ પશુ-પક્ષીઓના કલ્યાણ માટે પણ કામગીરી કરી રહી હોવાનું તેમણે જણાવ્યું. તેમણે કહ્યું કે, ગૌહત્યાના કેસમાં આરોપીઓને માત્ર પકડવામાં આવતા નથી, પરંતુ કાયદાકીય કાર્યવાહી બાદ સજાની જોગવાઈ પણ છે.

'કોઈ પણ સારૂ કામ કરી રહ્યા હોવ તો ચૌદશ આવે જ'

વધુમાં તેમણે વિરોધીઓ પર કટાક્ષ કરતાં કહ્યું હતું કે કોઈ પણ સારૂ કામ કરી રહ્યા હોવ તો ચૌદશ આવે જ, પરિવારમાં પણ પાંચ ભાઈઓ હોય તો એકાદી ચૌદસ હોય. અંતમાં તેમણે સભામાં ઉપસ્થિત લોકોને આગામી દિવસોમાં સહકાર અને સાથ આપવા માટે વચન આપવા અપીલ કરી હતી.