મોરબીના ટંકારા નજીક ભયાનક અકસ્માતનો LIVE VIDEO વાયરલ: 8 થી 10 પલટી ખાઈને કાર ટ્રાન્સફોર્મર સાથે અથડાઈ, રાજકોટના બે યુવાનોના મોત
મોરબીના ટંકારા પાસે થયેલા અકસ્માતના ખતરનાક સીસીટીવી સામે આવ્યા છે. આ અકસ્માતમાં બે યુવાનોના મોત થયા હતા, જ્યારે એક ઈજાગ્રસ્ત થયો હતો.
રાજકોટથી મોરબી તરફ પૂરઝડપે જઈ રહેલી સ્વિફ્ટ કાર શનિવારે સવારે 8:30 કલાકની અકસ્માતનો શિકાર બની હતી. આ અકસ્માતના રૂવાંટા ઊભા કરી દેતો દ્રશ્યો સામે આવ્યા છે. મળતી માહિતી પ્રમાણે ડેકોરેશનના વ્યાવસાય સાથે સંકળાયેલા રાજકોટના ત્રણ યુવાનો કારમાં સવાર થઈ રાજકોટથી મોરબી જઈ રહ્યાં હતા. આ દરમિયાન અકસ્માત થયો હતો.
સ્ટીયરિંગ પર કાબુ ગુમાવતા અકસ્માત
આ દરમિયાન ટંકારા નજીક પુરપાટ ઝડપે દોડતી કારના ચાલકે સ્ટીયરિંગ પરથી કાબૂ ગુમાવતા કાર હવામાં ફંગોળાઈને 8 થી 10 જેટલી પલટી મારી ગઈ હતી અને રોડ સાઈડના વીજ ટ્રાન્સફોર્મર સાથે ધડાકાભેર અથડાઈ હતી. આ ગમખ્વાર અકસ્માતમાં કારમાં સવાર રાજકોટના બે યુવાનોના ઘટનાસ્થળે જ કરુણ મોત નિપજ્યા હતા. હાલ આ સમગ્ર મામલે પોલીસે અકસ્માત સર્જનાર મૃતક કાર ચાલક સામે ગુનો નોંધી આગળની કાયદેસરની કાર્યવાહી હાથ ધરી છે.
બે યુવાનો બહાર ફેંકાયા
આ અકસ્માત એટલો ભયાનક હતો કે કાર જ્યારે પલટી ખાઈ રહી હતી ત્યારે અંદર બેઠેલા ત્રણ યુવાનોમાંથી કાર ચાલક અને આગળ બેઠેક એક યુવક બહાર ફંગોળાયા હતા. આ બંને યુવકો હવામાં ઉડી રોડ પર પટકાયા હતા. બંનેને ગંભીર ઈજા પહોંચતા ઘટનાસ્થળે મોત થયા હતા. જ્યારે પાછળની સીટ પર સવાર વ્યક્તિને ઈજાઓ પહોંચી છે, જેને સારવાર માટે રાજકોટની એક હોસ્પિટલમાં ખસેડવામાં આવ્યો છે.
અકસ્માતનું કારણ જાણવા પ્રયાસ
આ અકસ્માતમાં ઈજાગ્રસ્ત થયેલા જીવણ ડાભીએ મીડિયા સાથે વાત કરતા કહ્યુ કે મોરબીથી ટંકારા પહોંચ્યા ત્યારે ગાડી પલટી મારી ગઈ હતી. ત્યારબાદ શું થયું તેની મને ખબર નથી. અકસ્માત કઈ રીતે થયો તેનો પણ કંઈ ખ્યાલ નથી. તેણે જણાવ્યું કે પ્રભાત અને અમન આગળ બેઠા હતા અને હું પાછળ બેઠો હતો. ઈજાગ્રસ્ત યુવકે કહ્યુ કે ગાડી વાહન સાથે અથડાઈ નથી. મને હોઠ અને કમરમાં ઈજા થઈ છે. ગાડી ઊભી રહી ત્યારબાદ હું તેમાંથી બહાર નીકળ્યો હતો.