'વિકાસ અને અસ્મિતા' બનશે 2027નો મુખ્ય મુદ્દો? વાંસદાના મંચ પરથી દક્ષિણ ગુજરાતના રાજકારણની નવી ચાલ

ગુજરાતના રાજકારણમાં આદિવાસીઓને રીઝવવા જનજાતિ ગૌરવ દિવસની ઉજવણીમાં આખી સરકાર આદિવાસીઓના રંગે રંગાઈ છે. અવસર છે ભગવાન બિરસા મુંડાની 151 મી જન્મજયંતી એટલે કે ''જનજાતિ ગૌરવ દિવસ''નો, પરંતુ નવસારીના વાંસદામાં વન મંત્રીની વિશેષ ઉપસ્થિતિમાં થયેલી ઉજવણીમાં આગામી વિધાનસભા ચૂંટણીના સમીકરણો અત્યારથી જ બદલી નાખ્યા છે. એક તરફ મંત્રી અર્જુન મોઢવાડિયાએ આદિવાસી ઇતિહાસના પુનરુત્થાન સાથે વિદેશી તાકાતોને લઈને લાલબતી ધરી છે. તો બીજી તરફ સાંસદ ધવલ પટેલે 2027 ની ચૂંટણી માટે અત્યારથી જ કિલ્લો સર કરવાના દાવા કરી દીધા છે.

રાષ્ટ્રીય ગૌરવ દિવસની ઉજવણી

માત્ર 23 વર્ષની નાની વયે ''ઉલ ગુલાન''ના નારા સાથે અંગ્રેજ સામ્રાજ્યને હચમચાવી નાખનાર અને 25 વર્ષની વયે શહીદી વહોરનાર ભગવાન બિરસા મુંડાના ગૌરવવંતા ઇતિહાસને આઝાદી પછીના દાયકાઓમાં ક્યાં તો દબાવી દેવાયો અથવા તો હાંસિયામાં ધકેલી દેવાયો. પરંતુ, વડાપ્રધાન નરેન્દ્ર મોદીએ 15 નવેમ્બરને રાષ્ટ્રીય જનજાતિ ગૌરવ દિવસ તરીકે જાહેર કરીને આદિવાસી અસ્મિતાને વૈશ્વિક પ્લેટફોર્મ પૂરું પાડ્યું છે. આ જ પરંપરાને આગળ વધારતા વાંસદાના ગાંધી મેદાન ખાતે યોજાયેલા કાર્યક્રમમાં વન અને પર્યાવરણ મંત્રી અર્જુન મોઢવાડિયાએ આદિવાસી તેજસ્વી વિદ્યાર્થીઓનું સન્માન કરી અને જંગલ જમીનના પત્રો વિતરિત કરીને સરકારની સંવેદનશીલતા દર્શાવી હતી. એટલું જ નહીં, 51 કરોડના વિકાસકાર્યોની ભેટ આપતી વખતે મંત્રીએ શ્રીલંકા અને બાંગ્લાદેશનું ઉદાહરણ ટાંકીને આક્ષેપ કર્યો કે ભારતમાં PM નરેન્દ્ર મોદીના મજબૂત નેતૃત્વને તોડવા માટે વિદેશી શક્તિઓ સક્રિય છે. ત્યારે આદિવાસી સમાજે આવી વિદેશી ચાલબાજીઓથી દૂર રહીને દેશની વિકાસયાત્રામાં જોડાવું પડશે.

નવસારીમાં ભગવાન બિરસા મુંડાની ૧૫૧મી જન્મજ્યંતીની ભવ્ય ઉજવણી #Navsari #gujarat #breakingnews #news https://t.co/yqeZoP6ua0

— Zee 24 Kalak (@Zee24Kalak) November 15, 2026

 વિપક્ષના ગઢ પર ભાજપની નજર

વિપક્ષી ધારાસભ્યના ગઢ ગણાતા વાંસદામાં ભાજપના સાંસદ અને લોકસભા દંડક ધવલ પટેલે અઢી વર્ષમાં અબજો રૂપિયાના વિકાસકાર્યોનો હિસાબ આપીને રાજકીય માહોલ ગરમ કરી દીધો છે. પોતાના મોટાભાઈને સિકલ સેલ જેવી જીવલેણ બીમારીમાં ગુમાવ્યાનું અંગત દર્દ છલકાવતા તેમણે કેન્દ્ર અને રાજ્ય સરકાર દ્વારા આ બીમારી સામે ચાલી રહેલી રાષ્ટ્રીય અભિયાનની સરાહના કરી હતી. સાથે જ 2027 ની વિધાનસભા ચૂંટણીમાં વાંસદામાં કમળ ખિલવવાનો દાવો કરી સ્પષ્ટ સંદેશ આપી દીધો છે કે, હવે જનજાતિ સમાજ વિકાસ અને રાષ્ટ્રવાદ સિવાય કોઈ સમજૂતી કરવાના મૂડમાં નથી. આદિવાસી અસ્મિતા અને આક્રમક રાજનીતિના આ સંગમે ગુજરાતના રાજકારણમાં આગામી ટર્નિંગ પોઈન્ટના એંધાણ આપી દીધા છે. કાર્યક્રમ પૂરો થતાં જ દક્ષિણ ગુજરાતના જાણીતા ''ડીજે રોકી સ્ટાર''ના તાલે આદિવાસી યુવાનોના થનગનાટ વચ્ચે ગાંધી મેદાનથી ટાવર સુધી નીકળેલી ભવ્ય રેલીએ યુવાશક્તિનો અનોખો અંદાજ બતાવ્યો હતો.

વલસાડના નાનાપોંઢામાં જનજાતીય ગૌરવ દિવસની ભવ્ય ઉજવણી! DyCM હર્ષ સંઘવી આદિવાસી નૃત્યમાં જોડાયા #Valsad #BirsaMunda #BirsaMundaJayanti #Gujarat #viralvideo #viral #trending #trendingshorts #SHORT https://t.co/XihYABnXjg

— Zee 24 Kalak (@Zee24Kalak) November 15, 2026

 ચૂંટણીમાં જોવા મળી શકે છે નવો મુદ્દો

2027 ની ચૂંટણી પહેલા વાંસદાની આ ધરતી પરથી ફૂંકાયેલું આ રણશિંગુ સ્પષ્ટ સંકેત આપી રહ્યું છે કે, હવે માત્ર રાજકીય નારેબાજી નહીં પરંતુ ચુંટણમાં ''વિકાસ અને અસ્મિતા'' જ મુખ્ય મુદ્દો બનશે. એક તરફ દાયકાઓથી ઇતિહાસના હાંસિયામાં ધકેલાયેલા જનજાતીય નાયકોને વડાપ્રધાન મોદીએ રાષ્ટ્રીય ગૌરવ અપાવ્યું છે. તો બીજી તરફ કરોડોના વિકાસકાર્યોના જોરે વિપક્ષના ગઢમાં ગાબડા પાડવાની રણનીતિ સ્પષ્ટ દેખાઈ રહી છે. વિદેશી તાકાતોને લાલબતી અને વિકાસની હરિફાઈ વચ્ચે વાંસદાનો આદિવાસી યુવાન હવે બદલાવના રંગે રંગાઈ ચૂક્યો છે. 2027 ના રાજકીય રણમેદાનમાં આ અસ્મિતાનો પવન કઈ દિશામાં વાય છે. એ સમય જતાવશે; પરંતુ અત્યારે ભાજપે પોતાની રાજકીય પિચ પર મજબૂત બેટિંગ શરૂ કરી દીધી છે.