દિવાળી પહેલા ગુજરાત સરકાર કર્મચારીઓને આપશે મોટી ભેટ! કેબિનેટ બેઠકમાં થઈ શકે છે જાહેરાત

DA Hike : ગાંધીનગર ખાતે આવતીકાલે સવારે 10 વાગ્યે રાજ્ય સરકારની મહત્વપૂર્ણ કેબિનેટ બેઠક યોજાવા જઈ રહી છે. આ બેઠકમાં રાજ્ય સરકાર દ્વારા કર્મચારીઓના હિતમાં મોટો નિર્ણય લેવામાં આવે તેવી શક્યતા છે. ખાસ કરીને દિવાળી પહેલા સરકારી કર્મચારીઓ અને પેન્શનરોને મોંઘવારી ભથ્થા (DA)માં વધારાની ભેટ મળી શકે છે.

ગુજરાતના ઉદ્યોગો માટે ખુલશે વૈશ્વિક બજારના નવા દ્વાર, 38 દેશો સાથેના વેપાર કરારથી થશે મોટો ફાયદો

કેન્દ્ર સરકારે DAમાં 3 ટકાનો કર્યો વધારો

કેન્દ્ર સરકારે તાજેતરમાં કેન્દ્રીય કર્મચારીઓ માટે 3 ટકાના મોંઘવારી ભથ્થા (DA) વધારાની જાહેરાત કરી છે. કેન્દ્ર સરકારના આ નિર્ણય બાદ હવે ગુજરાત રાજ્યના સરકારી કર્મચારીઓની નજર પણ રાજ્ય સરકાર પર ટકેલી છે. ગુજરાત સરકાર પણ કેન્દ્ર સરકારની જેમ કર્મચારીઓના DAમાં 3 ટકાનો વધારો જાહેર કરી શકે તેવી ચર્ચાઓ ચાલી રહી છે.

ગાંધીનગરમાં ભાજપે 'કાસ્ટ ફેક્ટર' સાચવી ૨૯ વર્ષના રૂપસિંહ ઠાકોરને સોંપી મનપાની કમાન, 2027ની ચૂંટણી જવાબદાર

લાખો સરકારી કર્મચારીઓને મળશે લાભ

જો રાજ્ય સરકાર દ્વારા DA વધારાનો નિર્ણય લેવામાં આવે તો લાખો સરકારી કર્મચારીઓ અને પેન્શનરોને સીધો આર્થિક લાભ મળી શકે છે. મોંઘવારીના વધતા જતા ભાર વચ્ચે DAમાં વધારો કર્મચારીઓ માટે રાહતરૂપ સાબિત થઈ શકે છે. ખાસ કરીને દિવાળીના તહેવાર પહેલાં આ જાહેરાત થાય તો કર્મચારીઓની દિવાળી સુધરી જાય.  

કેબિનેટ બેઠક પર બધાની નજર

હાલમાં બધાની નજર આવતીકાલે યોજાનારી કેબિનેટ બેઠક પર છે. બેઠકમાં DA વધારા ઉપરાંત અન્ય મહત્વપૂર્ણ મુદ્દાઓ પર પણ ચર્ચા થઈ શકે છે. જોકે, ગુજરાત સરકાર દ્વારા DA વધારા અંગે હજુ સુધી કોઈ સત્તાવાર જાહેરાત કરવામાં આવી નથી. આવતીકાલની કેબિનેટ બેઠક બાદ જ સરકારનો અંતિમ નિર્ણય સ્પષ્ટ થશે. હવે જોવાનું એ રહેશે કે દિવાળી પહેલાં રાજ્ય સરકાર કર્મચારીઓને મોંઘવારી ભથ્થામાં વધારાની ભેટ આપે છે કે નહીં.