વડોદરા પોલીસની આકાશી સ્ટ્રાઈક: ડ્રોનની નજરથી પકડાયો 17 ગુનાઓમાં નાસતો ફરતો રીઢો ગુનેગાર
ગમે તેવો ગુનો કરો પરંતુ ગમે ત્યારે પકડાઈ શકો છો. વડોદરા પોલીસે આધુનિક ટેક્નોલોજીની મદદથી એક રીઢા ગુનેગારની ધરપકડ કરી છે. આ ગુનેગાર પર 17 જેટલા ગુનાઓ છે અને હવે તે પોલીસની ઝપેટમાં આવી ગયો છે.
કહેવાય છે કે...ગુનેગાર ગમે તેટલો શાણો કેમ ન હોય, કાયદાના લાંબા હાથથી ક્યારેય બચી નથી શકતો! પણ જ્યારે ગુનેગારને પકડવા માટે ડ્રોન પણ સાથ આપે, ત્યારે શું થાય?...વડોદરામાં કંઈક આવો જ રોમાંચક ખેલ ખેલાયો છે! 17-17 ગુનાઓમાં નાસતો ફરતો અને પોલીસ માટે માથાનો દુખાવો બનેલો એક રીઢો ગુનેગાર...કેવી રીતે વડોદરા ક્રાઈમ બ્રાંચના હાથમાં આવ્યો...
ડ્રોન ઉડ્યું...ગુનેગારોનું લોકેશન મળ્યું
આ વિઝ્યુઅલ્સ સાક્ષી છે વડોદરા પોલીસની આધુનિક અને સચોટ કામગીરીના...વડોદરા શહેરમાં વધતી ઘરફોડ ચોરીઓને નાથવા માટે પોલીસ કમિશનર અને ક્રાઈમ બ્રાંચની ટીમ એક્શન મોડમાં હતી...તેવામાં બાતમી મળી કે ગુજસીટોકના ગુનામાં જામીન પર છૂટેલો અને 17 ગુનાઓમાં વોન્ટેડ રીઢો ગુનેગાર ગુરુમુખસિંગ બાબરી ખોડીયારનગર વિસ્તારમાં છુપાયેલો છે...પોલીસને આશંકા હતી કે તે ભાગી શકે છે, એટલે જ જમીન પર પોલીસની ટીમ ગોઠવાઈ અને આકાશમાં ઉડ્યું ક્રાઈમ બ્રાંચનું ડ્રોન!
આ પણ વાંચોઃ ‘વારાણસીથી વડનગર સેવા યાત્રા’નું વડનગરમાં સમાપન, મુખ્યમંત્રી ભૂપેન્દ્ર પટેલ સહિત આ નેતાઓ
ખોડીયારનગરની ગલીઓમાં ડ્રોન કેમેરા ફરતા જ આરોપીઓનું ચોક્કસ લોકેશન ટ્રેસ થઈ ગયું...જેવો પોલીસનો કાફલો આગળ વધ્યો, ગુનેગારોએ ભાગવાની કોશિશ કરી...પણ ઉપર આકાશમાં ઉડતા ડ્રોનથી બચવું અશક્ય હતું...ક્રાઈમ બ્રાંચની ટીમે આખા વિસ્તારને કોર્ડન કરી લીધો અને ભાગવા જતા ત્રણેય આરોપીઓને રંગેહાથ દબોચી લીધા...પકડાયેલા આરોપીઓમાં મુખ્ય સૂત્રધાર ગુરુમુખસિંઘ બાવરી, દશરથ મારવાડી અને કિરપાલસિંગ જુનીનો સમાવેશ થાય છે...તેમની પાસેથી સોના-ચાંદીના દાગીના, રોકડા રૂપિયા, ત્રણ મોબાઈલ અને બે મોટરસાઈકલ મળી કુલ 4.58 લાખનો મુદ્દામાલ પણ જપ્ત કરાયો છે.
આ ત્રણ રીઢા ગુનેગારોની ધરપકડ સાથે જ વડોદરાના સમા, મકરપુરા, વાડી અને છાણી પોલીસ સ્ટેશન વિસ્તારમાં થયેલી કુલ સાત ઘરફોડ ચોરી અને વાહનચોરીના ગુનાઓનો ભેદ એકસાથે ઉકેલાઈ ગયો છે. વડોદરા ક્રાઈમ બ્રાંચના આ હાઈટેક ડ્રોન ઓપરેશનથી ગુનેગારોમાં ફફડાટ વ્યાપી ગયો છે...હાલ તો આ ત્રણેય જેલના સળિયા પાછળ ધકેલાયા છે અને પોલીસ આગળની કાયદેસરની કાર્યવાહી કરી રહી છે.
વડોદરા પોલીસની આ આકાશી સ્ટ્રાઈકે ગુનેગારોને સ્પષ્ટ અને કડક સંદેશ આપી દીધો છે કે, હવે ગુનો કરીને ગમે તેટલી ગલીઓમાં છુપાશો, કાયદાના લાંબા હાથ અને પોલીસની ત્રીજી આંખ તમને પાતાળમાંથી પણ શોધી કાઢશે.
