મેલું ઉપાડવાની પ્રથા પર બાપુનો ધડાકો, બેબાક અંદાજમાં કહ્યું કે "બંધ બેસતી પાઘડી જેને પહેરવી હોય તે પહેરે!"

Former Gujarat CM Shankersinh Vaghela: એક સમયે ગુજરાતના સીએમ અને હજૂરિયા અને ખજૂરિયા માટે અતિ જાણીતા શંકરસિંહ વાઘેલા ગુજરાતના રાજકારણના અઠંગ ખેલાડી છે. બાપુએ ભાજપ અને આરએસએસ સાથે પણ કામ કર્યું હોવાથી આજની ભાજપની રણનીતિને સારી રીતે સમજે છે. હવે તેઓ કોંગ્રેસમાં રીએન્ટ્રી કરી રહ્યાં છે ત્યારે Z 24 kalakના એડિટર દીક્ષિત સોનીના પોડકાસ્ટ બ્લેક કોફીમાં તેઓએ બેબાક પણ મેલું ઉપાડવા મામલે બોલ્યા છે.

"હિન્દુ સમાજ પર અનટચેબલિટીનું કલંક છે!", મેલું ઉપાડવાની પ્રથા પર બાપુનો ધડાકો
ગાંધીનગરની ભાગોરે આવેલા પોતાના જૂના સંસ્મરણો યાદ કરતા બાપુએ સામાજિક અસમાનતા અને અસ્પૃશ્યતા પર આકરા પ્રહાર કર્યા હતા. તેમણે કહ્યું કે તેમણે વાલ્મીકિ અને દલિત સમાજના ઘરોની નજીક જઈને જોયું છે કે ગટર વ્યવસ્થા નહોતી ત્યારે લોકો કેવી નરક જેવી સ્થિતિમાં જીવતા હતા.

"જ્યારે શૌચાલય કે ગટર નહોતી, ત્યારે વાલ્મીકિ સમાજના ભાઈઓ-બહેનો ગંદકી ગ્લોવ્ઝ વગર પોતાના માથે ઉપાડતા હતા. એ સ્તનપાન કરાવતી માતાઓની પીડા અને નરક જેવું જીવન હિન્દુ સમાજ પર મોટું કલંક છે. કોઈને મંદિરમાં ન પેસવા દયો કે પાણી ન પીવા દયો, એ માણસ છે કે ઢોર?!" જ્યારે સવર્ણ સમાજના વિરોધ વિશે પૂછવામાં આવ્યું, ત્યારે બાપુએ બેબાક અંદાજમાં કહ્યું કે "બંધ બેસતી પાઘડી જેને પહેરવી હોય તે પહેરે!" અનામત અને ગટરમાં ઉતરવાની મજબૂરી પર બોલતાં તેમણે ઉમેર્યું કે સરકારી દાવાઓ છતાં આજે પણ ગટરમાં માણસો મરી રહ્યા છે, અને આ વાસ્તવિકતા સામે આંખ આડા કાન ન થઈ શકે.

 

અર્થશાસ્ત્રની ડિગ્રી અને રાજકારણમાં આવવાનું અસલી મિશન
બાપુએ સ્પષ્ટ કર્યું કે તેઓ કોઈ સામાન્ય મહત્વાકાંક્ષા કે માત્ર "ડબલા કૂટવા" માટે રાજકારણમાં નહોતા આવ્યા. તેમની પાસે અર્થશાસ્ત્રની સાચી ડિગ્રી (MA) હતી અને જો તેઓ ઈચ્છત તો શિક્ષણ ક્ષેત્રે અથવા એનસીસી-આર્મી સાથે જોડાઈને લેફ્ટનન્ટ કર્નલ કે જનરલ સુધીની કારકિર્દી બનાવી શક્યા હોત. પરંતુ, સામાન્ય માણસની આશા-અપેક્ષાઓ પૂરી કરવા અને અન્યાય સામે લડવા માટે તેમણે સ્ટેટ પોલિટિક્સનું માધ્યમ પસંદ કર્યું.

તેમણે ઉમેર્યું કે જાહેર જીવનમાં પ્રવેશતી વખતે જ તેમની પહેલી પ્રી-કન્ડિશન એ હતી કે સાંસદ કે ધારાસભ્ય બનવું નહીં! કારણ કે એમએલએ કે એમપી બનવાથી નેતાનું કાર્યક્ષેત્ર માત્ર પોતાના મતવિસ્તાર પૂરતું મર્યાદિત થઈ જાય છે, જ્યારે આખા ગુજરાતની મોટી જવાબદારી નિભાવવા માટે જનતા વચ્ચે જઈને વ્યાપક સંગઠન ઊભું કરવું પડે છે.

પક્ષપલટો અને તોફાની રાજકારણની ટીકા
વર્તમાન રાજકીય સંસ્કૃતિ પર કટાક્ષ કરતા બાપુએ એવા નેતાઓ અને પક્ષોની ઝાટકણી કાઢી જેઓ વિરોધના નામે પથ્થરબાજી કે તોફાનો કરાવે છે. તેમણે કહ્યું કે પોલીસ પબ્લિકને મારે અને તેનાથી 'એન્ટી-ગવર્મેન્ટ' માહોલ બને તેવી સસ્તી રાજકીય માનસિકતાના તેઓ ક્યારેય સમર્થક નથી રહ્યા. જાહેર જીવનમાં સાથીદારો અને ભરોસાપાત્ર લોકો દ્વારા થતા કાવતરાઓ વિશે વાત કરતા તેમણે સ્વીકાર્યું કે માનવસ્વભાવમાં છેતરામણીના ચાન્સીસ હંમેશા રહે છે, છતાં તેમણે હંમેશા પ્રજાને જ પોતાનું અસલી હાઇકમાન્ડ ગણીને રાજકારણ કર્યું છે.