6 હત્યાના આરોપીને ક્રાઈમ બ્રાન્ચે ગુરુગ્રામથી પકડ્યો તો ફટાક દઈને બોલ્યો-હું પાનસિંહ તોમરનો વંશજ છું

ઉદય રંજન, અમદાવાદ: કહેવાય છે કે ઝર જમીન અને જોરૂ હંમેશા કજીયા ના છોરું.... અને જમીનનો વિવાદ માણસને કેટલો ખતરનાક બનાવી શકે છે તેનું ઉદાહરણ મધ્યપ્રદેશના મુરેનામાં જોવા મળ્યું હતું. વર્ષ 2023માં મુરેનાના લેપા ગામે એક જ પરિવારના 6 લોકોની જાહેરમાં બંદૂકની ગોળીઓથી વીંધીને હત્યા કરી નાખવામાં આવી હતી. આ ખૂની ખેલનો મુખ્ય આરોપી, જે બીજું કોઈ નહીં પણ પ્રખ્યાત ડાકુ પાનસિંહ તોમરનો જ દૂરનો કૌટુંબિક સભ્ય રામસિંહ તોમર હતો, તે છેલ્લા દોઢ વર્ષથી ફરાર હતો. પરંતુ ગુજરાત પોલીસની બાજનજરમાંથી તે બચી ન શક્યો. મુરેના મધ્યપ્રદેશના હત્યા કાંડના આરોપીને અમદાવાદ ક્રાઇમ બ્રાન્ચે છેક હરિયાણાના ગુરુગ્રામથી આ 30 હજારના ઇનામી વોન્ટેડને ઝડપી લીધો છે.

અદાવત અને બદલાની આગ

• અદાવત અને બદલાની આગ કેવી હોય છે, તેના દ્રશ્યો મે 2023માં મધ્યપ્રદેશના ચંબલ વિસ્તારના મુરેના જિલ્લાના લેપા ગામે જોવા મળ્યા હતા. વર્ષોથી અહીં બે પરિવારો વચ્ચે જમીનનો વિવાદ ચાલી રહ્યો હતો. 
• રણજીતસિંહ મુન્નેસિંહ તોમરના પરિવારની દીકરીના લગ્ન પ્રસંગે પરિવારના સભ્યો લેપા ગામે આવ્યા હતા. તે સમયે જ બીજા જૂથના આરોપી રામસિંહ ધીરસિંહ તોમર અને તેના પરિવારના સભ્યોએ બંદૂકો લઈને હુમલો કરી દીધો. 
• અંધાધૂંધ ગોળીબારમાં રણજીતસિંહના પરિવારની ૩ મહિલાઓ અને ૩ પુરુષો સહિત કુલ 6 લોકો ઢળી પડ્યા, જેમાં પિતા ગજેન્દ્રસિંગ બદલુસિંગ તોમર , દીકરા સત્યપ્રકાશસિંગ ગજેન્દ્રસિંગ તોમર, બીજા દીકરા સંજુસિંગ ગજેન્દ્રસિંગ તોમર પુત્ર વધુ મધુદેવી સુનિલસિંહ તોમર પુત્રવધૂ બબલી દેવી નરેન્દ્રસિંગ તોમર અને પુત્રવધૂ કેશકલીદેવી વિરેન્દ્રસિંગ તોમરના મોત નિપજ્યા.
• આ ભયાનક હત્યાકાંડ બાદ સિહોનિયા પોલીસ સ્ટેશનમાં 9 આરોપીઓ વિરુદ્ધ હત્યા અને આર્મ્સ એક્ટની કલમો હેઠળ ગુનો નોંધવામાં આવ્યો હતો અને આરોપીઓ પર 30,000 રૂપિયાનું ઇનામ જાહેર કરાયું હતું.
• આ હત્યાકાંડ પાછળનું કારણ  10 વર્ષ જૂનો બદલો હતો. પોલીસ તપાસમાં ખૂલાસો થયો છે કે આ હત્યાકાંડ અચાનક થયેલી બબાલનું પરિણામ નહોતો, પરંતુ 10 વર્ષ જૂના બદલાની આગ હતી. 
• લેપા ગામમાં જ વર્ષ 2013માં જમીન વિવાદના કારણે હાલના પકડાયેલા આરોપી રામસિંહ તોમરના કાકા વિરભાણસિંહ અને મોટા કાકા શોભરણસિંહની રણજીતસિંહ તોમરના પરિવારે હત્યા કરી હતી. 
• આ હત્યાનો બદલો લેવા માટે રામસિંહ અને તેનો ભાઈ છેલ્લા 10 વર્ષથી તક શોધી રહ્યા હતા. જ્યારે રણજીતસિંહનો પરિવાર લગ્ન પ્રસંગે ગામમાં આવ્યો, ત્યારે રામસિંહે ગોળીઓ વરસાવીને પોતાના કાકાની હત્યાનો બદલો લીધો હતો.

હત્યા બાદ ફરાર થયો, ઓળખ છૂપાવીને કામ કરતો રહ્યો

• 6 લોકોની હત્યા કર્યા બાદ આરોપી 37 વર્ષીય રામસિંહ ધીરસિંહ તોમર ફરાર થઈ ગયો. 
• તે મહારાષ્ટ્ર, ગુજરાત, રાજસ્થાન અને હરિયાણામાં પોતાની ઓળખ છુપાવીને સિક્યુરિટી ગાર્ડ અને મજૂર તરીકે કામ કરતો રહ્યો. 
• અમદાવાદ શહેર ક્રાઇમ બ્રાન્ચને બાતમી મળી કે આ ખૂંખાર આરોપી હરિયાણાના ગુરુગ્રામમાં ગોપાલપુર GIDC વિસ્તારમાં આવેલા એક વેરહાઉસમાં કામ કરી રહ્યો છે. 
• ક્રાઇમ બ્રાન્ચની એક ટીમ તાત્કાલિક ગુરુગ્રામ પહોંચી, ગઢી-હરસરુ રોડ પર વોચ ગોઠવી અને વેશપલટો કરી ને આરોપી રામસિંહ તોમરને ઝડપી પાડ્યો હતો અને પૂછ પરછ હાથ ધરી હતી જેમાં તેનું મુરેના હત્યાકાંડના આરોપીઓ પાનસિંહ તોમર સાથેનું કનેક્શન પણ સામે આવ્યું છે. 
• આરોપી દાવો કરી રહ્યો છે કે પોતે પાનસિંહ તોમરનો પારિવારિક વંશજ છે.
• પકડાયેલા આરોપી રામસિંહ તોમરનો ગુનાહિત ઇતિહાસ પણ છે, તેની સામે મધ્યપ્રદેશના ભીંડ જિલ્લાના ગોરમી પોલીસ સ્ટેશનમાં અગાઉ ગુનો નોંધાયેલો છે. 
• હાલ અમદાવાદ ક્રાઇમ બ્રાન્ચે આરોપીની પૂછપરછ કર્યા બાદ, તેને મધ્યપ્રદેશના સિહોનિયા પોલીસ સ્ટેશનને સોંપવા માટેની કાયદેસરની કાર્યવાહી હાથ ધરી છે. 
• ગુજરાત પોલીસની આ કામગીરી થી ૬ લોકોનો હત્યારો આખરે જેલના સળિયા પાછળ ધકેલાયો છે.