IPL 2027માં રોહિત શર્મા કરી શકે છે મુંબઈ ઈન્ડિયન્સની કેપ્ટનશીપ, હાર્દિક પંડ્યાનનું શું થશે?

Rohit Sharma : IPL 2027 પહેલાં મુંબઈ ઈન્ડિયન્સે કેટલાક મોટા ફેરફારો કર્યા છે. કિરોન પોલાર્ડને નવા હેડ કોચ તરીકે નિયુક્ત કરવામાં આવ્યા છે અને કોચિંગ સ્ટાફમાં ઘણા નવા ચહેરાઓનો સમાવેશ કરવામાં આવ્યો છે. થોડા સમયથી એવી અટકળો ચાલી રહી હતી કે હાર્દિક પંડ્યા હવે મુંબઈ ઈન્ડિયન્સનો ભાગ નહીં રહે, જેના કારણે નવો કેપ્ટન કોણ બનશે તે અંગે પ્રશ્નો ઊભા થયા હતા. એવી શક્યતા વ્યક્ત કરવામાં આવી રહી છે કે કેપ્ટનશીપ ફરી એકવાર રોહિત શર્માને સોંપવામાં આવી શકે છે.

રોહિત શર્મા ફરી મુંબઈ ઈન્ડિયન્સનો કેપ્ટન બની શકે છે

2026 ઈન્ડિયન પ્રીમિયર લીગ પૂર્ણ થયા બાદ મુંબઈ ઈન્ડિયન્સે હાર્દિક પંડ્યાને કેપ્ટન પદેથી હટાવવાનો નિર્ણય લીધો છે. ધ ઈન્ડિયન એક્સપ્રેસના એક અહેવાલ મુજબ, રોહિત શર્મા હવે મુંબઈ ઈન્ડિયન્સના નવો કેપ્ટન બની શકે છે. એક સૂત્રએ જણાવ્યું હતું કે, રોહિત શર્માએ કેપ્ટનશીપ માટે તિલક વર્માના નામનું સૂચન કર્યું હતું, પરંતુ ફ્રેન્ચાઈઝીએ તેને ફરીથી આ જવાબદારી સંભાળવા માટે વિનંતી કરી છે. રોહિત ન્યૂઝીલેન્ડ જવા રવાના થયો તે પહેલાં ઘણી બાબતો પર ચર્ચા કરવામાં આવી હતી અને નવા કોચની નિમણૂક વખતે પણ તેના મંતવ્યો ધ્યાનમાં લેવામાં આવ્યા હતા.

IND vs NZ: ભારતની અડધી ટીમ બદલાઈ જશે? કુલદીપ-વરુણ સહિતના આ ખેલાડીઓને મળી શકે છે તક

મુંબઈ ઈન્ડિયન્સ ટૂંક સમયમાં જાહેરાત કરી શકે છે

મુંબઈ ઈન્ડિયન્સે હજુ સુધી રોહિત શર્મા અંગે કોઈ સત્તાવાર જાહેરાત કરી નથી. અહેવાલ મુજબ, કોચિંગ સ્ટાફ અંગેના નિર્ણયો ફાઈનલ થયા પછી ટીમ મેનેજમેન્ટ ખેલાડીઓના રીટેન્શન અંગે નિર્ણય લેશે. તમામ ટીમોએ નવેમ્બરના મધ્ય સુધીમાં રિલીઝ અને રીટેઈન ખેલાડીઓની યાદી સબમિટ કરવાની હોય છે. રીટેન્શનની સમયમર્યાદા નજીક આવી રહી છે, ત્યારે ટીમ મેનેજમેન્ટ ટૂંક સમયમાં રોહિત શર્માને કેપ્ટન તરીકે જાહેર કરી શકે છે.

હાર્દિક પંડ્યાનું શું થશે?

એવી ચર્ચાઓ ચાલી રહી છે કે હાર્દિક પંડ્યા મુંબઈ ઈન્ડિયન્સ છોડીને ટ્રેડ દ્વારા અન્ય ટીમમાં જોડાઈ શકે છે. જોકે, આવી કોઈ ટ્રેડ શક્ય ન બને, તો તેણે રોહિત શર્માની કેપ્ટનશીપ હેઠળ રમવું પડી શકે છે. અહેવાલમાં જણાવ્યા અનુસાર, જો ટ્રેડ ન થાય, તો હાર્દિક રોહિતની કેપ્ટનશીપ હેઠળ રમવા માટે સંમત થયો છે. મુંબઈ ઈન્ડિયન્સનું ભવિષ્ય નવેમ્બરના પ્રથમ બે અઠવાડિયામાં સ્પષ્ટ થઈ જશે.

દરમિયાન કિરોન પોલાર્ડે મહેલા જયવર્દનેનું સ્થાન લઈને નવા હેડ કોચ તરીકે જવાબદારી સંભાળી લીધી છે. ટીમ મેનેજમેન્ટે રોબિન ઉથપ્પાને બેટિંગ કોચ, મિશેલ મેકક્લેનાઘનને બોલિંગ કોચ અને ટી. દિલીપને ફિલ્ડિંગ કોચ તરીકે નિયુક્ત કર્યા છે. આ ઉપરાંત, ધવલ કુલકર્ણીની ડેવલપમેન્ટલ બોલિંગ કોચ તરીકે નિમણૂક કરવામાં આવી છે.