ટ્રાઇ નેશન સિરીઝમાં પાકિસ્તાનને આ ભૂલ પડી ગઈ ભારે! ICCએ ફટકારી સજા

ICC Fined Pakistan: પાકિસ્તાને 2026ની ટ્રાઇ નેશન સિરીઝની ફાઇનલમાં શ્રીલંકાને હરાવીને ટ્રોફી જીતી હતી. આ ટુર્નામેન્ટ માટે ઈંગ્લેન્ડ અને શ્રીલંકાએ પાકિસ્તાનનો પ્રવાસ કર્યો હતો. ઈંગ્લેન્ડનું પ્રદર્શન અત્યંત નબળું રહ્યું, જેના કારણે તે ટુર્નામેન્ટમાંથી વહેલા બહાર થઈ ગયું. ફાઇનલમાં પાકિસ્તાને શ્રીલંકા સામે ઐતિહાસિક રન ચેઝ કરીને જીત મેળવી. જોકે, ફાઇનલ દરમિયાન પાકિસ્તાની ટીમે એક મોટી ભૂલ કરી હતી, જેના માટે ICCએ તેને દંડ ફટકાર્યો છે.

'હું કોઈનાથી ડરતો નથી...' સિરીઝ જીત્યા બાદ કોચ ગૌતમ ગંભીર કોના પર થયા ગુસ્સે?

ICCએ ફટકાર્યો દંડ

ICCએ પાકિસ્તાન ટીમની મેચ ફીમાંથી 5% રકમ કાપી લીધી છે. ફાઇનલ દરમિયાન બોલિંગ કરતી વખતે પાકિસ્તાન નિર્ધારિત ઓવર રેટ કરતાં એક ઓવર પાછળ હતું. તેઓ નક્કી કરેલા સમયમાં પોતાની ફાળવેલી ઓવરો પૂરી કરવામાં નિષ્ફળ રહ્યા હતા. ICCની આચારસંહિતા મુજબ, જો કોઈ ટીમ નિર્ધારિત સમયમાં પોતાની ઓવરો પૂરી ન કરી શકે, તો દરેક ઓવર પાછળ મેચ ફીના 5% જેટલો દંડ ફટકારવામાં આવે છે.

પાકિસ્તાન એક ઓવર પાછળ હોવાથી, તેની મેચ ફીમાંથી 5% રકમ કાપવામાં આવશે. પાકિસ્તાનના કેપ્ટન શાહીન આફ્રિદીએ આ ભૂલ અને તે બદલ મળેલા દંડનો સ્વીકાર કરી લીધો છે, જેના કારણે હવે કોઈ ઔપચારિક સુનાવણીની જરૂર રહી નથી.

પાકિસ્તાનનો સફળ રન ચેઝ

લાહોરમાં રમાયેલી આ શ્રેણીની ફાઇનલમાં શ્રીલંકાએ પ્રથમ બેટિંગ કરતા 50 ઓવરમાં 8 વિકેટના નુકસાને 325 રન બનાવ્યા હતા. કામિન્દુ મેન્ડિસે 131 રનની શાનદાર ઇનિંગ રમી હતી, જ્યારે પવન રત્નાયકેએ 77 રનનું યોગદાન આપ્યું હતું. પાકિસ્તાન તરફથી શાહીન આફ્રિદી, સલમાન અલી આગા, નસીમ શાહ અને હારિસ રઉફે 2-2 વિકેટ ઝડપી હતી.

પાકિસ્તાનને જીતવા માટે 326 રનનો ટાર્ગેટ મળ્યો હતો. ફાઇનલ જેવી ભારે દબાણવાળી મેચમાં ટાર્ગેટનો પીછો કરવો સામાન્ય રીતે પડકારજનક હોય છે, પરંતુ ફખર ઝમાને 127 રનની ધમાકેદાર ઇનિંગ રમી, જ્યારે સાદ બેગે 74 રન બનાવ્યા. આ ઉપરાંત, અરાફાત મિનહાસે 61 રનનું યોગદાન આપ્યું હતું. આના પરિણામે, પાકિસ્તાનની ટીમે 48.3 ઓવરમાં સફળતાપૂર્વક ટાર્ગેટ હાંસલ કરી લીધો.

પાકિસ્તાન માટે આ એક સૌથી સફળ રન ચેઝ છે. અગાઉ, 2002ની નેટવેસ્ટ ટ્રોફીની ફાઈનલમાં ભારતે ઈંગ્લેન્ડ સામે 326 રનનો ટાર્ગેટ હાંસલ કર્યો હતો. ફાઈનલમાં શ્રીલંકા સામે 326 રનનો ટાર્ગેટ સફળતાપૂર્વક પાર કરીને પાકિસ્તાને ભારતીય ટીમ દ્વારા સ્થાપિત આ મોટા રેકોર્ડની બરાબરી કરી લીધી છે.