મોહમ્મદ શમીને ટીમમાં મળ્યું સ્થાન, આ દિવસે રમાશે મેચ, જાણો તમામ વિગતો

ભારતના અનુભવી ફાસ્ટ બોલર મોહમ્મદ શમીએ 2026-27 રણજી ટ્રોફી માટે બંગાળની ટીમમાં સ્થાન મેળવ્યું છે. 7 ઓક્ટોબરે ક્રિકેટ એસોસિએશન ઓફ બંગાળે આગામી રણજી સિઝનની શરૂઆતની મેચ માટે 17 સભ્યોની ટીમની જાહેરાત કરી હતી, જેમાં વધારાના સાત ખેલાડીઓને સ્ટેન્ડબાય તરીકે રાખવામાં આવ્યા છે. શમી મુખ્ય ટીમનો ભાગ છે. દરમિયાન, ટીમ ઈન્ડિયામાં શમીની સંભવિત વાપસી અંગેની અટકળો પણ તેજ બની છે.

ચીફ સિલેક્ટર અજીત અગરકરનો કાર્યકાળ પૂરો થયા બાદ ભુવનેશ્વર કુમારે ટીમ ઈન્ડિયામાં વાપસી કરી છે, ન્યુઝીલેન્ડ સામેની T20 શ્રેણી માટેની ટીમમાં ભુવીનો સમાવેશ કરવામાં આવ્યો છે. આ નિર્ણય આશ્ચર્યજનક હતો, કારણ કે ક્રિકેટ નિષ્ણાતો અને ચાહકો એમ માનતા હતા કે 36 વર્ષીય ભુવનેશ્વર હવે ક્યારેય ટીમ ઈન્ડિયા માટે રમશે નહીં. આ ઘટનાક્રમે શમીની વાપસી અંગેની ચર્ચાને પણ વેગ આપ્યો છે, જોકે તેને પહેલા રણજી ટીમ માટે પસંદ કરવામાં આવ્યો છે.

દિલ્હી સામે બંગાળની પ્રથમ મેચ

બંગાળ 11 થી 14 ઓક્ટોબર દરમિયાન દિલ્હી સામે તેની શરૂઆતની રણજી ટ્રોફી મેચ રમવા માટે તૈયાર છે. આ મેચ કલ્યાણીમાં આવેલા બંગાળ ક્રિકેટ એકેડેમીના મેદાન પર રમાશે. ટીમમાં સામેલ કરાયેલા શમીનું પ્લેઈંગ ઈલેવનમાં સ્થાન લગભગ નિશ્ચિત છે. શમીએ અગાઉની સિઝનમાં રણજી ટ્રોફી અને અન્ય સ્થાનિક ટુર્નામેન્ટ્સમાં પણ બંગાળનું પ્રતિનિધિત્વ કર્યું હતું.

અભિમન્યુ ઈશ્વરન કેપ્ટન

બંગાળ ટીમની કેપ્ટનશીપ અભિમન્યુ ઈશ્વરનને સોંપવામાં આવી છે. 31 વર્ષીય ઈશ્વરન સ્થાનિક ક્રિકેટમાં સતત સારું પ્રદર્શન કરી રહ્યો છે. લાંબા ફોર્મેટમાં ધીરજપૂર્વકની બેટિંગ માટે જાણીતા અભિમન્યુને હજુ સુધી ટીમ ઈન્ડિયા માટે ડેબ્યૂ કરવાની તક મળી નથી, જોકે ઘણી વખત તેને ટેસ્ટ ટીમમાં સામેલ કરવા અંગે ચર્ચાઓ થઈ છે. આ દરમિયાન, સુદીપ ઘરામીને વાઈસ-કેપ્ટનની જવાબદારી સોંપવામાં આવી છે.

બંગાળની ટીમ

અભિમન્યુ ઈશ્વરન (કેપ્ટન), સુદીપ ઘરામી (વાઈસ-કેપ્ટન), સુદીપ ચેટર્જી, અભિષેક પોરેલ (વિકેટકીપર), શાકિર ગાંધી (વિકેટકીપર), અંકુર પોલ, સુમંત ગુપ્તા, અંકિત શુક્લા, શુભમ ચેટર્જી, મોહમ્મદ શમી, આકાશ દીપ, મુકેશ કુમાર, સૂરજ જયસ્વાલ, પ્રદીપ્ત પ્રમાણિક, આમિર ગની, મોહમ્મદ કૈફ અને સૌમ્યદીપ મંડલ.

સ્ટેન્ડબાય ખેલાડીઓ: કરણ લાલ, અખિલેશ યાદવ, ગીત પુરી, અભિષેક રમન, શુભમ સરકાર, સુમિત મોહંતા અને આદિત્ય પુરોહિત.