ક્યાંક મુંબઈ ઈન્ડિયન્સ જેવી ભૂલ ના કરે પંજાબ કિંગ્સ, હાર્દિક પંડ્યાની એન્ટ્રીથી શ્રેયસ ઐયરને કેમ ખતરો?

Punjab Kings : સ્ટાર ઓલરાઉન્ડર હાર્દિક પંડ્યા IPL 2027માં પંજાબ કિંગ્સ તરફથી રમશે. મુંબઈ ઈન્ડિયન્સે તેના કેપ્ટનને રિલીઝ કરવા માટે સંમતિ દર્શાવી છે અને તેના બદલામાં ફાસ્ટ બોલર અર્શદીપ સિંહને પોતાની ટીમમાં સામેલ કર્યો છે. છેલ્લા પાંચ વર્ષથી હાર્દિક IPLમાં માત્ર કેપ્ટન તરીકે જ રમ્યો છે. 2022માં તેણે ગુજરાત ટાઇટન્સનું નેતૃત્વ કર્યું અને ટીમને ચેમ્પિયન બનાવી. 2023માં પણ તે આ જ ફ્રેન્ચાઈઝી સાથે જોડાયેલો રહ્યો અને ગુજરાતને ફાઈનલ સુધી પહોંચાડ્યું.

IPL Trade: મુંબઈ ઈન્ડિયન્સના કેપ્ટન હાર્દિક પંડ્યા પંજાબ કિંગ્સમાં ટ્રાન્સફર, અર્શદીપ સિંહની MIમાં એન્ટ્રી... IPL પહેલાનો સૌથી મોટો અપસેટ!

2015થી 2021 સુધી હાર્દિક પંડ્યા મુંબઈ ઈન્ડિયન્સ માટે એક ખેલાડી તરીકે રમ્યો હતો. 2022માં તે નવી ફ્રેન્ચાઈઝી ગુજરાત ટાઇટન્સમાં જોડાયો અને તેને પહેલીવાર કેપ્ટનશીપ કરવાની તક મળી. તેના નેતૃત્વ હેઠળ ગુજરાત ટાઇટન્સ તેની પ્રથમ સીઝનમાં જ ચેમ્પિયન બની ગઈ. 2024માં તે મુંબઈ ઈન્ડિયન્સમાં પાછો ફર્યો, પરંતુ માત્ર એક ખેલાડી તરીકે નહીં, પણ કેપ્ટન તરીકે. મુંબઈ ઈન્ડિયન્સે રોહિત શર્મા પાસેથી કેપ્ટનશીપ પાછી લઈ લીધી, જેણે ટીમને પાંચ ટાઈટલ જીતાડ્યા હતા અને ટીમની કમાન હાર્દિકને સોંપી દીધી.

હાર્દિક સતત પાંચ વર્ષ સુધી કેપ્ટન રહ્યો

હવે મોટો પ્રશ્ન એ છે કે શું સતત પાંચ વર્ષ સુધી કેપ્ટન તરીકે રહ્યા પછી હાર્દિક પંડ્યા હવે માત્ર એક ખેલાડી તરીકે રમવા માટે તૈયાર છે? કે પછી તેણે પંજાબ કિંગ્સ સાથે જોડાવાનો નિર્ણય એ શરતે લીધો છે કે તેને કેપ્ટનશીપ આપવામાં આવશે? કારણ કે તે મુંબઈ ઈન્ડિયન્સ માટે એક સામાન્ય ખેલાડી તરીકે રમવાનું ચાલુ રાખી શક્યો હોત. સમગ્ર વિવાદ કેપ્ટનશીપને લઈને જ હતો. ગત સીઝનમાં નબળા પ્રદર્શન બાદ મુંબઈ ઈન્ડિયન્સે પોતાનો કેપ્ટન બદલવાનો નિર્ણય લીધો. સંભવ છે કે હાર્દિક આ નિર્ણયથી નાખુશ હતો, જેના કારણે આખરે તેણે ફ્રેન્ચાઈઝી છોડવાનો નિર્ણય લીધો.

શ્રેયસની પણ રોહિત જેવી જ સ્થિતિ થશે?

IPL 2027 પહેલા થયેલા આ મોટા ટ્રેડ પછી એવો પ્રશ્ન થવો સ્વાભાવિક છે કે શું હાર્દિક પંડ્યા પંજાબ કિંગ્સનો કેપ્ટન બનશે, કે પછી ફ્રેન્ચાઈઝી શ્રેયસ અય્યર પર જ પોતાનો વિશ્વાસ જાળવી રાખશે? IPL કેપ્ટન તરીકે શ્રેયસ અય્યરની સફર સફળ રહી છે. તેણે 2024માં કોલકાતા નાઈટ રાઈડર્સને ચેમ્પિયન બનાવી અને ત્યારબાદ 2025માં પંજાબ કિંગ્સને ફાઈનલ સુધી પહોંચાડ્યું. 2026માં તેના નેતૃત્વ હેઠળ પંજાબ કિંગ્સે સતત છ મેચ જીતી હતી, પરંતુ ત્યારબાદ તેનું અભિયાન પાટા પરથી ઉતરી ગયું. ટીમ પ્લેઓફમાં પહોંચવામાં નિષ્ફળ રહી અને પાંચમા સ્થાને રહીને સીઝન પૂરી કરી.

શ્રેયસ અય્યરની કેપ્ટનશીપની ટીકા પણ થઈ

2026ની IPL સીઝનના બીજા ભાગ દરમિયાન, શ્રેયસ અય્યરની કેપ્ટનશીપ તપાસના દાયરામાં આવી અને તેની ટીકા પણ થઈ. તેમ છતાં કેપ્ટન તરીકેનો તેનો એકંદરે કાર્યકાળ સકારાત્મક રહ્યો છે. એ પણ નોંધવું જોઈએ કે શ્રેયસ અય્યર હાલમાં ટીમ ઈન્ડિયાનો T20 કેપ્ટન છે. જોકે, હાર્દિક પંડ્યાના આગમને ચાહકોમાં ચિંતા જન્માવી છે. ડર છે કે ક્યાંક પંજાબ કિંગ્સ એ જ ભૂલ ન કરે જે ભૂતકાળમાં મુંબઈ ઈન્ડિયન્સે કરી હતી. જ્યારે તેમણે ચેમ્પિયનશિપ જીતાડનાર કેપ્ટન રોહિત શર્મા પાસેથી નેતૃત્વની જવાબદારી છીનવી લીધી હતી. શ્રેયસ અય્યરના નેતૃત્વના વ્યાપક વખાણ થતા હોવા છતાં સામે હાર્દિક પંડ્યા છે, જેણે ગુજરાતથી મુંબઈ જતી વખતે એક ચોક્કસ શરત મૂકી હતી કે તેને કેપ્ટનપદ આપવામાં આવે. જો તેણે પંજાબ કિંગ્સ સમક્ષ પણ આવી જ શરત મૂકી હોય, તો શ્રેયસ અય્યર માટે સંભવિત ખતરો બની શકે છે.

હાર્દિક પંડ્યાની સેલરીમાં વધારો

સ્ટાર ઓલરાઉન્ડર હાર્દિક પંડ્યાને પોતાની ટીમમાં સામેલ કરવા માટે પંજાબ કિંગ્સ કેટલી ઉત્સુક છે, તે તેના પગારમાં થયેલા વધારા પરથી સ્પષ્ટ થાય છે. તેની સેલરી 16.5 કરોડથી વધીને 18 કરોડ થઈ છે. હવે એ જોવાનું રહે છે કે પંજાબે હાર્દિકને માત્ર એક ખેલાડી તરીકે ટીમમાં લીધો છે કે પછી તેને કેપ્ટનશીપની જવાબદારી પણ સોંપવામાં આવશે.