અફવાઓ પર પૂર્ણવિરામ: ભારત-શ્રીલંકા વનડે મેચ દિલ્હીમાં જ રમાશે, અમદાવાદ ખસેડવાના દાવાનો BCCIએ કર્યો ઇનકાર

India vs Sri Lanka ODI : ભારતીય ક્રિકેટ કંટ્રોલ બોર્ડ (BCCI)એ દિલ્હીના અરુણ જેટલી સ્ટેડિયમમાં યોજાનારી ભારત અને શ્રીલંકા વચ્ચેની વન-ડે મેચ અંગેની સ્થિતિ સ્પષ્ટ કરી છે. બોર્ડે પુષ્ટિ કરી છે કે 13 ડિસેમ્બરની મેચ દિલ્હીમાં જ રમાશે. વર્ષના અંતે બંને ટીમો વચ્ચે ત્રણ મેચની વન-ડે શ્રેણી યોજાનાર છે. પ્રથમ વન-ડે બાદ શ્રીલંકાની ટીમ 16મી તારીખે બેંગલુરુના એમ. ચિન્નાસ્વામી સ્ટેડિયમમાં બીજી મેચ રમશે અને ત્રીજી મેચ 19 ડિસેમ્બરે અમદાવાદમાં યોજાશે.

ન્યૂઝીલેન્ડ પ્રવાસ પહેલા ટીમ ઈન્ડિયા માટે ખરાબ સમાચાર, સ્ટાર બેટ્સમેન ઈજાગ્રસ્ત

એવા અહેવાલો હતા કે ધુમ્મસને કારણે મેચ યોજવામાં મુશ્કેલીઓ અને BCCI દ્વારા યજમાનીના અધિકારો પાછા ખેંચવાની અટકળોને પગલે આ મેચ દિલ્હીથી અમદાવાદના નરેન્દ્ર મોદી સ્ટેડિયમમાં ખસેડવામાં આવશે. જોકે, બોર્ડના સચિવ દેવજીત સૈકિયાએ આ અહેવાલોને નકારી કાઢ્યા છે અને જણાવ્યું છે કે BCCIએ આવો કોઈ નિર્ણય લીધો નથી. પરિણામે, બંને ટીમો વચ્ચેની પ્રથમ વન-ડે મેચ આયોજન મુજબ દિલ્હીમાં જ રમાશે.

સૈકિયાએ શું કહ્યું ?

દેવજીત સૈકિયાએ જણાવ્યું છે કે, ભારત-શ્રીલંકા વન-ડે મેચને દિલ્હીથી અમદાવાદ ખસેડવાના અહેવાલો ખોટા છે. BCCIએ આવો કોઈ નિર્ણય લીધો નથી. અમે અમારા મીડિયાના સાથીઓને વિનંતી કરીએ છીએ કે તેઓ કાર્યક્રમ અંગેની કોઈપણ માહિતી માટે માત્ર BCCIના સત્તાવાર નિવેદનો પર જ આધાર રાખે. વધુમાં એ વાત ફરીથી કહેવી મહત્વપૂર્ણ છે કે દ્વિપક્ષીય મેચો મુખ્યત્વે એક પ્રમાણભૂત નીતિને અનુસરીને ફાળવવામાં આવે છે.

શ્રીલંકાની ટીમ T20 શ્રેણી પણ રમશે

વન-ડે મેચો ઉપરાંત શ્રીલંકાની ટીમ આ પ્રવાસ દરમિયાન T20 મેચો પણ રમશે. ડિસેમ્બરમાં ત્રણ T20 મેચો રમાશે. પ્રથમ મેચ 22મી તારીખે રાજકોટમાં યોજાશે. ત્યારબાદની મેચો અનુક્રમે 24 અને 27 ડિસેમ્બરે કટક અને પુણેમાં યોજાશે.

વેસ્ટ ઈન્ડિઝ, ન્યુઝીલેન્ડ અને શ્રીલંકા સામે મેચો

ભારતીય ટીમ હાલમાં વેસ્ટ ઈન્ડિઝ સામે પાંચ મેચની T20 શ્રેણી રમી રહી છે અને તેમાં 2-1થી આગળ છે. બાકીની બે મેચો 14 ઓક્ટોબરે હૈદરાબાદમાં અને 17 ઓક્ટોબરે બેંગલુરુમાં યોજાવાની છે. ત્યારબાદ ટીમ ઓક્ટોબર-નવેમ્બરમાં ન્યુઝીલેન્ડના પ્રવાસે જશે, જ્યાં તે પાંચ T20, ત્રણ ODI અને બે ટેસ્ટ મેચ રમશે. પરત ફર્યા બાદ ટીમ ઈન્ડિયા શ્રીલંકા સામે રમશે.