લો બોલો! સ્કૂટી લઈને મેદાનમાં ઘૂસી ગયો એક વ્યક્તિ... રોકવી પડી ભારત-ન્યૂઝીલેન્ડ મેચ

IND A vs NZ A: ક્રાઇસ્ટચર્ચમાં ભારત A અને ન્યૂઝીલેન્ડ A વચ્ચેની બીજી અનધિકૃત ટેસ્ટના પ્રથમ દિવસે એક એવી ઘટના બની જેણે બધાને ચોંકાવી દીધા હતા. એક વૃદ્ધ વ્યક્તિ સ્કૂટી લઈને સીધા મેદાનમાં ઘૂસી ગયા હતા. જેના કારણે મેચમાં વિક્ષેપ પડ્યો હતો.

સ્કૂટી લઈને મેદાનમાં ઘૂસી ગયો એક વ્યક્તિ

આ ઘટના 31 ઓક્ટોબર હેગલી ઓવલ ખાતે પ્રથમ દિવસના અંતિમ સેશન દરમિયાન બની હતી. ન્યૂઝીલેન્ડ Aના ફાસ્ટ બોલર બ્રેટ રેન્ડેલ 83મી ઓવર માટે રન-અપ શરૂ કરવા જઈ રહ્યો હતો, ત્યારે ભારત Aના બેટ્સમેન આકાશ દીપે તેને અટકવાનો ઈશારો કર્યો. આકાશ દીપે જોયું કે એક વૃદ્ધ વ્યક્તિ સ્કૂટર ચલાવતા-ચલાવતા બરાબર સાઈટ સ્ક્રીનની સામે આવી ગયા હતા.

શરૂઆતમાં તો રેન્ડેલ મૂંઝવણમાં મુકાઈ ગયો કે તેને કેમ રોકવામાં આવ્યા, પરંતુ જલ્દી જ પરિસ્થિતિ સ્પષ્ટ થઈ ગઈ. એક વૃદ્ધ વ્યક્તિ પોતાના સ્કૂટર પર મેદાન પાર કરી રહ્યા હતા કદાચ તેઓ દિવસની રમતની અંતિમ ક્ષણો જોવા માટે બેસવાની જગ્યા શોધી રહ્યા હતા.

WTC પોઈન્ટ્સ ટેબલમાં મોટી ઉથલપાથલ, ઓસ્ટ્રેલિયા ત્રીજા સ્થાને, હવે ભારત ફાઇનલ માટે કેવી રીતે થશે ક્વોલિફાય?

આકાશ દીપે બોલરને અટકાવ્યો

આકાશ દીપે બોલરને વિનંતી કરી કે જ્યાં સુધી તે વૃદ્ધ વ્યક્તિ સુરક્ષિત રીતે મેદાન પાર ન કરી લે ત્યાં સુધી રાહ જુએ. આ વિચિત્ર અને રમુજી દ્રશ્ય જોઈને ભારતીય ખેલાડીઓ પોતાની હસી રોકી શક્યા નહીં. કોમેન્ટેટર્સે પણ મજાક-મસ્તી કરતા તે વૃદ્ધ વ્યક્તિને મેચ જોવા માટે આટલી સરસ જગ્યા શોધવા બદલ અભિનંદન આપ્યા.

હેગલી ઓવલ તેના સુંદર નજારાઓ અને મેદાનની આસપાસના ખુલ્લા લીલાછમ વિસ્તારો માટે જાણીતું છે, જ્યાં પ્રેક્ષકો બેસીને ક્રિકેટનો આનંદ માણતા હોય છે. જોકે, મેચ દરમિયાન એક પ્રેક્ષકને સ્કૂટર પર મેદાન પાર કરતા જોવો એ ભારતીય ટીમ માટે એકદમ અણધાર્યો અનુભવ હતો.

જુરેલે ઇનિંગ્સને સંભાળી

મેદાન પર બનેલી આ વિચિત્ર ઘટના ઉપરાંત ઈન્ડિયા Aના કેપ્ટન ધ્રુવ જુરેલે પ્રથમ દિવસે બેટિંગમાં અદભૂત સંઘર્ષશક્તિ અને મક્કમતા દર્શાવી હતી. તેના અણનમ 99 રનની મદદથી, દિવસના અંતે ઈન્ડિયા Aનો સ્કોર 7 વિકેટે 291 રન સુધી પહોંચ્યો હતો.

ઈન્ડિયા Aને મજબૂત શરૂઆત મળી હતી, જેમાં દેવદત્ત પડિક્કલ અને સાઈ સુદર્શને પ્રથમ વિકેટ માટે 91 રનની ભાગીદારી નોંધાવી હતી. સુદર્શન 41 રન બનાવીને જારોડ મેકકેનો શિકાર બન્યો હતો. પડિક્કલે અડધી સદી ફટકારી હતી, પરંતુ તેમના આઉટ થયાના થોડા સમય બાદ જ ઈન્ડિયા Aની ઇનિંગ્સ ડગમગી ગઈ હતી.

ટીમે માત્ર 7 રનમાં ચાર વિકેટ ગુમાવી દીધી હતી, જેનાથી સ્કોર 5 વિકેટે 137 રન થઈ ગયો હતો. આવી મુશ્કેલ પરિસ્થિતિમાં કેપ્ટન જુરેલે ઇનિંગ્સને સંભાળવાની જવાબદારી ઉપાડી અને તેની સંઘર્ષપૂર્ણ બેટિંગે ટીમને દિવસના અંતે મજબૂત સ્થિતિમાં પહોંચાડવામાં મદદ કરી.