પાકિસ્તાનને પછાડી ભારતનો ગોલ્ડન પંચ! એશિયન ગેમ્સમાં ભારતીય ક્રિકેટ ટીમે લહેરાવ્યો તિરંગો

Ind vs Pak : એશિયન ગેમ્સ 2026ની પુરુષોની ક્રિકેટ ફાઇનલમાં ભારત અને પાકિસ્તાન વચ્ચે ટક્કર જોવા મળી હતી. જેમાં ભારતે પાકિસ્તાનીઓને પછાડીને ગોલ્ડ મેડલ જીતી લીધો છે. ફરી એકવાર પાકિસ્તાનનો ભારત સામે પરાજય થયો છે. પ્રથમ બેટિંગ કરતા ભારતીય ટીમે 211 રનનો વિશાળ સ્કોર બનાવ્યો હતો. જવાબમાં પાકિસ્તાનની ટીમ 192 રન જ બનાવી શકી હતી અને ભારતે 19 રને પાકિસ્તાનને હરાવીને ગોલ્ડ મેડલ જીતી લીધો છે. તો પાકિસ્તાને સિલ્વર મેડલથી સંતોષ માનવો પડ્યો. જ્યારે શ્રીલંકાએ બ્રોન્ઝ મેડલ જીત્યો છે.

અભિષેક શર્માની ધમાકેદાર બેટિંગ

અભિષેક શર્મા, તિલક વર્મા અને શિવમ દુબેએ શાનદાર ઇનિંગ્સ રમી હતી. વૈભવ સૂર્યવંશી અને અભિષેક શર્માએ ભારતીય ટીમને તોફાની શરૂઆત અપાવી હતી. જોકે, વૈભવ મોટી ઇનિંગ્સ રમી શક્યો નહીં અને 9 બોલમાં બે સિક્સરની મદદથી 15 રન બનાવીને આઉટ થયો હતો. જો કે, ત્યાંથી અભિષેક શર્માએ બાજી સંભાળી લીધી અને 28 બોલમાં 61 રનની શાનદાર ઈનિંગ રમી હતી. આ દરમિયાન તેણે 3 ચોગ્ગા અને 7 છગ્ગા ફટકાર્યા હતા.

તિલક વર્માએ 22 બોલમાં 51 રન ફટકાર્યા

અંતિમ ઓવરોમાં, શિવમ દુબે અને તિલક વર્માએ ભારતીય ટીમ માટે આક્રમક ઇનિંગ્સ રમી હતી. અહેમદ દાનિયાલે શિવમ દુબેને કેચ આઉટ કરાવ્યો. દુબેએ 15 બોલમાં 27 રન બનાવ્યા, જેમાં 2 ચોગ્ગા અને 2 છગ્ગાનો સમાવેશ થતો હતો. તો તિલક વર્માએ શાનદાર ઇનિંગ્સ રમતા 22 બોલમાં 51 રન બનાવ્યા હતા. તો ઈશાન કિશને પણ 18 બોલમાં 20 રન બનાવ્યા હતા. શ્રેયસે પણ 24 બોલમાં 21 રન બનાવ્યા હતા, જેમાં તેણે 2 ચોગ્ગા ફટકાર્યા હતા.

પાકિસ્તાનની બેટિંગ

ટાર્ગેટનો પીછો કરતા વોશિંગ્ટન સુંદરે પાકિસ્તાની ટીમને પ્રથમ ઝટકો આપ્યો અને કેપ્ટન સાહિબઝાદા ફરહાન 10 રન બનાવીને આઉટ થયો. ત્યારબાદ અક્ષર પટેલે વિકેટકીપર-બેટ્સમેન ઉસ્માન ખાનને આઉટ કર્યો, જે માત્ર 3 રન જ બનાવી શક્યો હતો. ત્યારબાદ અક્ષરે માઝ સદાકતને આઉટ કર્યો.

ત્યારબાદ શિવમ દુબેએ સૈમ અયુબને આઉટ કરીને ભારતને ચોથી સફળતા અપાવી. ત્યારબાદ વોશિંગ્ટન સુંદરે અબ્દુલ સમદને આઉટ કરીને પાંચમી વિકેટ ઝડપી. પાકિસ્તાન તરફથી હસન નવાઝે સૌથી વધુ 95 રનની ઈનિંગ રમી હતી, પરંતુ તે પોતાની સદી પુરી કરી શક્યો નહોતો અને શિવમ દુબેએ તેને આઉટ કર્યો હતો.