WTC 2027માં ભારત માટે સૌથી વધુ વિકેટ લેનાર ટીમમાંથી બહાર, ગિલની કેપ્ટનશિપમાં આખરે ચાલી શું રહ્યું છે?
ICC વર્લ્ડ ટેસ્ટ ચેમ્પિયનશિપના ભાગરૂપે ભારત અને ન્યૂઝીલેન્ડ વચ્ચેની પ્રથમ મેચ શરૂ થઈ ગઈ છે. ભારતની પ્લેઈંગ ઈલેવનમાંથી મોહમ્મદ સિરાજ અને રવિન્દ્ર જાડેજાને બહાર રાખવા અંગે સવાલો ઉઠી રહ્યા છે.
ભારત અને ન્યુઝીલેન્ડ વચ્ચેની પ્રથમ ટેસ્ટમાં ભારતની પ્લેઈંગ ઈલેવન જાહેર થતાં જ ચાહકો ચોંકી ગયા હતા, કારણ કે ટીમમાં મોહમ્મદ સિરાજ અને રવિન્દ્ર જાડેજાનો સમાવેશ કરવામાં આવ્યો નહોતો. ત્યારે પ્રશ્ન એ ઉભો થાય છે કે શું આ પ્લેઈંગ ઈલેવન કેપ્ટન શુભમન ગિલે પસંદ કરી હતી, કે પછી તેમાં કોઈ બહારની દખલગીરી હતી?
મોહમ્મદ સિરાજ અને રવિન્દ્ર જાડેજા બહાર
ભારત અને ન્યુઝીલેન્ડ વચ્ચેની ટેસ્ટ મેચ આમ પણ ચર્ચાનો વિષય છે, પરંતુ ધ્યાન ખાસ કરીને પ્લેઈંગ ઈલેવન પર કેન્દ્રિત થયું. ટોસ સમયે ગિલે જાહેરાત કરી કે મોહમ્મદ સિરાજ કે રવિન્દ્ર જાડેજામાંથી કોઈ પણ આ મેચમાં રમશે નહીં. સિરાજની જગ્યાએ પ્રસિદ્ધ કૃષ્ણાને સામેલ કરવામાં આવ્યો, જ્યારે જાડેજાના સ્થાને વોશિંગ્ટન સુંદરને તક આપવામાં આવી. દિવસના અંતે એ સ્પષ્ટ થઈ ગયું કે આ ફેરફારો કારગત નીવડ્યો નથી.
IND vs NZ : 74મી ઓવરમાં એવું તો શું થયું કે ગિલ અને પંત પડિક્કલ પર થયા ગુસ્સે! વીડિયો વાયરલ
WTC 2027માં ભારત માટે સૌથી વધુ વિકેટ લેનાર બહાર
રસપ્રદ વાત એ છે કે, 2025-27 વર્લ્ડ ટેસ્ટ ચેમ્પિયનશિપ સાયકલમાં અત્યાર સુધી મોહમ્મદ સિરાજે ભારત માટે સૌથી વધુ વિકેટ લીધી છે. તેણે 11 મેચોમાં 43 વિકેટ ઝડપી છે. તે હાલમાં આ ટુર્નામેન્ટના તમામ બોલરોમાં ચોથા ક્રમે છે. બીજી તરફ, રવિન્દ્ર જાડેજાએ આ જ સાયકલમાં 11 મેચોમાં 33 વિકેટ લીધી છે. આ બંને ખેલાડીઓએ જસપ્રીત બુમરાહ કરતાં પણ વધુ વિકેટ લીધી છે. તેમ છતાં આ બંને ખેલાડીઓને પ્લેઈંગ ઈલેવનમાંથી બહાર રાખવામાં આવ્યા હતા.
પહેલા દિવસે પ્રસિદ્ધ કે સુંદરને એક પણ વિકેટ ના મળી
પ્રથમ દિવસની રમત પૂરી થઈ ત્યાં સુધીમાં પ્રથમ બેટિંગ કરનાર ન્યુઝીલેન્ડે પાંચ વિકેટના નુકસાને 243 રન બનાવ્યા હતા. જસપ્રીત બુમરાહે ત્રણ વિકેટ ઝડપી, જ્યારે અંશુલ કંબોજ અને આકાશ દીપે એક-એક વિકેટ લીધી. પ્રસિદ્ધ અને સુંદરને એક પણ વિકેટ મળી નહોતી. પ્રસિદ્ધે 16 ઓવરમાં 58 રન આપ્યા, જ્યારે સુંદરે પોતાની 16 ઓવરમાં 38 રન આપ્યા. પ્રસિદ્ધ આજના દિવસનો સૌથી મોંઘા બોલર સાબિત થયો.
ન્યૂઝીલેન્ડે મેચ પર પકડ જમાવી
પ્રથમ દિવસના અંત સુધીમાં ન્યૂઝીલેન્ડે મેચ પર પકડ બનાવી લીધી છે. જોકે પ્રથમ સત્રમાં ભારતનું પ્રદર્શન સારું રહ્યું હતું, પરંતુ ત્યારબાદ ન્યૂઝીલેન્ડે શાનદાર વાપસી કરી. હવે મેચમાં ટકી રહેવા માટે બીજા દિવસે ભારતે જોરદાર વાપસી કરવી પડશે. જો ટીમ ઈન્ડિયા આ મેચ હારી જાય છે, તો કેપ્ટન શુભમન ગિલે ચોક્કસપણે જવાબ આપવો પડશે કે સિરાજ અને જાડેજાને ટીમમાંથી બહાર રાખવાનો નિર્ણય શા માટે લેવામાં આવ્યો હતો અને કોના કહેવા પર લેવામાં આવ્યો હતો.