હાર્દિક પંડ્યા ફરી ઈજાને કારણે બહાર, વિસ્ફોટક ઓલરાઉન્ડરની ટીમમાં એન્ટ્રી!

Ind A vs Aus A: ભારતનો સ્ટાર ઓલરાઉન્ડર હાર્દિક પંડ્યા ઈજાને કારણે ઓસ્ટ્રેલિયા A સામેની ત્રણ મેચની અનઓફિશિયલ વન-ડે શ્રેણીમાંથી બહાર થઈ ગયો છે. તેની જગ્યાએ મુંબઈના વિસ્ફોટક ઓલરાઉન્ડર સૂર્યાંશ શેડગેનો ટીમમાં સમાવેશ કરવામાં આવ્યો છે.

IPL 2026 પછી ક્રિકેટથી દૂર રહેલા હાર્દિક પંડ્યાની ગયા મહિને જ આ શ્રેણી માટે ઈન્ડિયા A ટીમમાં પસંદગી કરવામાં આવી હતી. જોકે, ઈજાને કારણે તે આ સ્થાનિક શ્રેણીમાં રમી શકશે નહીં.

સૂર્યાંશ શેડગેનો ટીમમાં સમાવેશ

'ટાઈમ્સ ઓફ ઈન્ડિયા'ના અહેવાલ મુજબ, સૂર્યાંશ શેડગેએ તાજેતરમાં બેંગલુરુમાં BCCIના 'સેન્ટર ઓફ એક્સેલન્સ' ખાતે ફિટનેસ ટેસ્ટ પાસ કર્યો છે. મેડિકલ ટીમ પાસેથી મંજૂરી મળ્યા બાદ, તે તરત જ પુડુચેરી જવા રવાના થયો અને ટીમ સાથે જોડાઈ ગયો છે.

શેડગેએ આ વર્ષે જૂનમાં બેલફાસ્ટમાં આયર્લેન્ડ સામેની T20 મેચમાં ભારત માટે આંતરરાષ્ટ્રીય ડેબ્યૂ કર્યું હતું. આ ફેરફારને કારણે શેડગે હવે મુંબઈની રણજી ટ્રોફીની શરૂઆતની મેચ ચૂકી જશે, જે 11 ઓક્ટોબરે વાનખેડે સ્ટેડિયમમાં શરૂ થવાની છે.

નમન ધીરના સ્થાને અનુકુલ રોય

માત્ર હાર્દિક પંડ્યા જ નહીં, નમન ધીર ઓસ્ટ્રેલિયા A સામેની આગામી શ્રેણીમાં પણ રમી શકશે નહીં. 1 ઓક્ટોબરથી શરૂ થનારી વેસ્ટ ઈન્ડિઝ સામેની પાંચ મેચની T20 શ્રેણી માટે વોશિંગ્ટન સુંદરના સ્થાને નમનનો ભારતીય સિનિયર ટીમમાં સમાવેશ કરવામાં આવ્યો છે.

નમન ધીરના સ્થાને અનુકુલ રોયનું નામ ઈન્ડિયા A ટીમમાં સામેલ કરવામાં આવ્યું છે. કેપ્ટન ઋતુરાજ ગાયકવાડના નેતૃત્વમાં ઈન્ડિયા A અને ઓસ્ટ્રેલિયા A વચ્ચેની શ્રેણી 6 ઓક્ટોબરથી 11 ઓક્ટોબર દરમિયાન પુડુચેરીમાં રમાશે.

ઓસ્ટ્રેલિયા A શ્રેણી માટે ભારતની અપડેટેડ ટીમ

ઋતુરાજ ગાયકવાડ (કેપ્ટન), દેવદત્ત પડિક્કલ (વાઈસ-કેપ્ટન), પ્રિયાંશ આર્ય, સાઈ સુદર્શન, રજત પાટીદાર, કુમાર કુશાગ્ર (વિકેટકીપર), નિશાંત સિંધુ, વિપ્રજ નિગમ, અર્શિન કુલકર્ણી, અરશદ ખાન, પ્રભસિમરન સિંહ (વિકેટકીપર), ગુરજાપનીત સિંહ, યશ ઠાકુર અને સૂર્યાંશ શેડગે.