ન્યૂઝીલેન્ડને લાગ્યો બેવડો ઝટકો, ભારત વિરુદ્ધ વનડે સિરીઝમાંથી બે સ્ટાર ખેલાડીઓ બહાર
ભારત અને ન્યૂઝીલેન્ડ વચ્ચે બુધવારથી પાંચ મેચની વનડે સિરીઝ શરૂ થઈ રહી છે. આ પહેલા યજમાન ટીમને મોટો ઝટકો લાગ્યો છે. ટીમના બે સ્ટાર ખેલાડી રચિન રવીન્દ્ર અને માર્ક ચેપમેન ઈજાને કારણે પાંચ મેચની વનડે સિરીઝમાંથી બહાર થઈ ગયા છે.
ભારત સામે વનડે સિરીઝ પહેલા ન્યૂઝીલેન્ડને ઈજાને કારણે બે ઝટકા લાગ્યા છે. માર્ક ચેપમેન અને રચિન રવીન્દ્ર ટીમમાંથી બહાર થઈ ગયા છે. ચેપમેન હેમસ્ટ્રિંગની ઈજામાંથી સાજો થઈ રહ્યો છે, જ્યારે રવીન્દ્રને ખભાની સમસ્યા છે. આ બંને ખેલાડી ભારત સામે વનડે સિરીઝમાં રમી શકશે નહીં. ન્યૂઝીલેન્ડના પસંદગીકારોએ ટીમમાં ફેરફાર કર્યાં છે અને હેનરી નિકોલ્સ, મેટ ફિશર, ડીન ફોક્સક્રોફ્ટ અને ટિમ સાઇફર્ટને ટીમમાં સામેલ કરવામાં આવ્યા છે.
સાઇફર્ટને આ પહેલા માત્ર ચોથી અને પાંચમી વનડે માટે પસંદ કરવામાં આવ્યો હતો, હવે તે પાંચ મેચની સિરીઝ માટે ઉપલબ્ધ રહેશે. નિકોલ્સ પ્રથમ ત્રણ મેચ માટે ટીમ સાથે જોડાશે, જ્યારે ફોક્સક્રોફ્ટ છેલ્લી બે મેચ દરમિયાન ટીમમાં રહેશે. નિકોલ્સે વેલિંગ્ટન ફાયરબર્ડ્સ વિરુદ્ધ કેન્ટરબરી માટે પોતાની બીજી મેચમાં 119 રન બનાવ્યા, ત્યારબાદ તેને ટીમમાં તક મળી. લિસ્ટ એ ક્રિકેટમાં આ તેની 13મી સદી હતી. ફોક્સક્રોફ્ટ, ઈન્ડિયા એ વિરુદ્ધ રેડ-બોલ સિરીઝ પૂરી કર્યાં બાદ ટીમ સાથે જોડાશે.
ફિટ થવામાં લાગશે સમય
મેટ ફિશર, જેને ચોથી અને પાંચમી વનડે માટે પસંદ કરવામાં આવ્યો હતો, તે વનડે સિરીઝ દરમિયાન ટીમ સાથે રહેશે. આ વચ્ચે મેટ હેનરી સોમવારે ટીમ સાથે જોડાશે. મેચ માટે તેની ઉપલબ્ધતા ફિટનેસ ટેસ્ટ બાદ નક્કી થશે.
આ પણ વાંચોઃ 'હું કોઈનાથી ડરતો નથી...' સિરીઝ જીત્યા બાદ કોચ ગૌતમ ગંભીર કોના પર થયા ગુસ્સે?
તાજેતરમાં થયેલા એમઆરઆઈ સ્કેનમાં સામે આવ્યું છે કે ચેપમેનને સંપૂર્ણ ફિટ થવા માટે હજુ બે સપ્તાહ અને રિબેબિલિટેશનની જરૂર છે. રવીન્દ્રને ખભાની ઈજામાંથી સાજા થવા સમય જોઈએ. ન્યૂઝીલેન્ડના કોચ રોબ વાલ્ટરે કહ્યુ કે આ બંને ખેલાડીનું બહાર થવું નિરાશાજનક છે. ન્યૂઝીલેન્ડની ટીમ પ્રથમ વનડે પહેલા સોમવારે ઓકલેન્ડમાં ભેગી થશે. પ્રથમ વનડે બુધવારે ઈડન પાર્કમાં રમાશે.
ભારત વિરુદ્ધ વનડે સિરીઝ માટે ન્યૂઝીલેન્ડની અપડેટેડ ટીમઃ વનડે 1-3: મિચેલ સેન્ટરન (કેપ્ટન), માઇકલ બ્રેસવેલ, ડેવોન કોનવે, જેકબ ડફી, મેટ હેનરી, કાઇલ જેમીસન, ટોમ લાથમ, ડેરિલ મિચેલ, હેનરી નિકોલ્સ, ગ્લેન ફિલિપ્સ, ટિમ સાઇફર્ટ, નાથન સ્મિથ, વિલ યંગ, બ્લેયર ટિકનર.
વનડે 4 અને 5: મિચેલ સેન્ટનર, ફિન એલન, માઇકલ બ્રેસવેલ, ક્રિસ્ટિયન ક્લાર્ક, જેકબ ડફી, મેટ ફિશર, ડીન ફોક્સક્રોફ્ટ, લોકી ફર્ગ્યુસન, મિચ હે, નિક કેલી, ટિમ સેઇફર્ટ, બ્લેયર ટિકનર, વિલ યંગ.
