ભારતીય ટીમને લાગ્યો મોટો ઝટકો, વેસ્ટ ઈન્ડિઝ સામેની ત્રીજી વનડેમાંથી આ ખેલાડી બહાર

Prasidh Krishna : ભારતીય ફાસ્ટ બોલર પ્રસિદ્ધ કૃષ્ણા વેસ્ટ ઈન્ડિઝ સામેની ચાલુ વનડે શ્રેણીમાંથી બહાર થઈ ગયો છે. બુધવારે રમાયેલી બીજી વનડે દરમિયાન પ્રસિદ્ધને ઈજા થઈ હતી, જેના કારણે તે તેનો 10 ઓવરનો ક્વોટા પૂરો કરી શક્યા નહોતો. આ મેચમાં ભારતે વેસ્ટ ઈન્ડિઝને 8 વિકેટથી હરાવ્યું હતું.

પ્રથમ બેટિંગ કરતા વેસ્ટ ઈન્ડિઝે ગુવાહાટીમાં તેનો અત્યાર સુધીનો સર્વોચ્ચ વનડે સ્કોર નોંધાવ્યો હતો. જોન કેમ્પબેલ (101 રન), શાઈ હોપ (104 રન) અને અમીર જાંગૂ (114 રન)ની સદીઓની મદદથી ટીમે 50 ઓવરમાં 7 વિકેટે 405 રન બનાવ્યા હતા. જવાબમાં શુભમન ગિલની બેવડી સદી (અણનમ 233 રન) અને રોહિત શર્માની સદીની મદદથી ભારતે 39 બોલ બાકી રહેતા વનડે ઈતિહાસનો બીજો સૌથી સફળ રન ચેઝ કર્યો હતો.

પ્રસિદ્ધ કૃષ્ણા બહાર

ભારતીય ફાસ્ટ બોલર પ્રસિદ્ધ કૃષ્ણા ઈજાને કારણે વેસ્ટ ઈન્ડિઝ સામેની ત્રીજી અને અંતિમ વનડે રમી શકશે નહીં. ભારતીય ટીમ શનિવારે મુલ્લાનપુરમાં અંતિમ વનડે રમવાની છે. બીજી વનડે દરમિયાન તે ઈજાગ્રસ્ત થયો હતો અને માત્ર પાંચ ઓવર જ બોલિંગ કરી શક્યો હતો. જોકે વેસ્ટ ઈન્ડિઝે 7 વિકેટે 405 રન બનાવ્યા હતા, છતાં ભારતે 43.3 ઓવરમાં 8 વિકેટથી મેચ જીતી હતી અને શ્રેણીમાં 2-0ની સરસાઈ મેળવી હતી.

બીજી વનડે બાદ ભારતના બેટિંગ કોચ સિતાંશુ કોટકે પ્રસિદ્ધની ઈજાની પુષ્ટિ કરી હતી. ભારત અને વેસ્ટ ઈન્ડિઝ વચ્ચેની ત્રીજી અને અંતિમ વનડે શનિવારે મુલ્લાનપુરમાં રમાશે. 6 ઓક્ટોબરથી લખનૌમાં શરૂ થનારી T20 શ્રેણી માટે પસંદ કરાયેલી ટીમમાં પ્રસિદ્ધનો સમાવેશ કરવામાં આવ્યો નથી.

બોલરોની જોરદાર ધોલાઈ

એશિયન ગેમ્સની ટીમનો હિસ્સો એવા જસપ્રીત બુમરાહ અને ટીમની બહાર રહેલા મોહમ્મદ સિરાજની ગેરહાજરીમાં ભારત 2027ના વર્લ્ડ કપને ધ્યાનમાં રાખીને યુવા પ્રતિભાઓને પરખી રહ્યું છે. જોકે, ફાસ્ટ બોલિંગ આક્રમણના પ્રદર્શને ગંભીર પ્રશ્નો ઊભા કર્યા છે અને આ વિભાગમાં અનુભવનો અભાવ સ્પષ્ટ જોવા મળ્યો. ભુવનેશ્વર કુમાર અને મોહમ્મદ શમી જેવા અનુભવી ખેલાડીઓને સતત નજરઅંદાજ કરીને નવા વિકલ્પો શોધવાના ભારતના પ્રયાસોના પરિણામો ખાસ સારા રહ્યા નથી.

જમ્મુ-કાશ્મીરથી ભારતીય ટીમનું પ્રતિનિધિત્વ કરનાર ત્રીજા ક્રિકેટર આકિબ નબીએ તેની 8.5 ઓવરમાં 84 રન આપ્યા હતા, સપાટ પીચ પર વેસ્ટ ઈન્ડિઝના બેટ્સમેનોને રોકવા માટે તેણે સંઘર્ષ કરવો પડ્યો હતો. ગુરનૂર બ્રારે 96 રન આપીને બે વિકેટ ઝડપી હતી, જ્યારે પ્રસિદ્ધ કૃષ્ણાએ પાંચ ઓવરમાં 45 રન આપીને એક વિકેટ લીધી હતી.