IPL 2027 માં રમતા જોવા મળશે બાંગ્લાદેશી ક્રિકેટરો, 7 ખેલાડીઓએ કરાવ્યું રજીસ્ટ્રેશન

IPL 2027: આગામી 16 ડિસેમ્બરે યોજાનાર આઈપીએલ ઓક્શનને લઈને અત્યારથી ચર્ચા શરૂ થઈ ગઈ છે. ખેલાડીઓના રિટેન્શનની ડેડલાઈન નજીક આવી રહી છે. આ વચ્ચે ઘણી ફ્રેન્ચાઇઝીઓ વચ્ચે ખેલાડીઓના ટ્રેડ ચાલી રહ્યાં છે. તેવામાં એક મોટા સમાચાર પણ સામે આવી રહ્યાં છે. આઈપીએલ 2027મા બાંગ્લાદેશના ખેલાડીઓ પણ સામેલ થશે. BCCIએ તેની એન્ટ્રીનો માર્ગ મોકળો કરી દીધો છે. કહેવામાં આવી રહ્યું છે કે આશરે સાત બાંગ્લાદેશી ખેલાડીઓએ હરાજી માટે નોંધણી કરાવી છે.

બાંગ્લાદેશી ખેલાડીઓની આઈપીએલમાં એન્ટ્રી

આઈપીએલની દરેક નવી સિઝન પહેલા મિની ઓક્શનનું આયોજન કરવામાં આવે છે. આ વખતે ગોવામાં 16 ડિસેમ્બરે ઓક્શન યોજાવાનું છે. તેની તૈયારીઓ અત્યારથી શરૂ થઈ ગઈ છે. એક રિપોર્ટ અનુસાર બાંગ્લાદેશના ખેલાડીઓએ હરાજી માટે રજીસ્ટ્રેશન કરાવ્યું છે. તેમાં સૌથી મોટું નામ ફાસ્ટ બોલર મુસ્તફિઝુર રહમાનનું છે. પાછલા વર્ષે મુસ્તફિઝુરને કોલકત્તાએ બહાર કરી દીધો હતો. ત્યારબાદ ખુબ વિવાદ થયો હતો. ભારત અને બાંગ્લાદેશના સંબંધોમાં તણાવ જોવા મળ્યો હતો.

આ પણ વાંચોઃ હાર્દિક પંડ્યા પંજાબમાં ગયો, હવે મુંબઈ ઈન્ડિયન્સની કેપ્ટનશીપ કોણ સંભાળશે? 

શું હતો વિવાદ?

પાછલા વર્ષે કોલકત્તા નાઇટ રાઇડર્સે મુસ્તફિઝુર રહમાનને 9.20 કરોડમાં ખરીદ્યો હતો. તે આઈપીએલમાં સૌથી મોંઘો બાંગ્લાદેશી ખેલાડી બન્યો હતો. આ વચ્ચે બાંગ્લાદેશમાં હિંદુઓ પર હુમલાની અસર આઈપીએલ પર પડી હતી. મુસ્તફિઝુરનો ખુબ વિરોધ થયો હતો. અનેક લોકો અને સંગઠનોએ તેને આઈપીએલમાંથી હટાવવાની માગ કરી હતી. અંતમાં BCCIના આદેશ પર કોલકત્તાએ તેને રિલીઝ કરી દીધો હતો. ત્યારબાદ આ વિવાદ વધી ગયો હતો. બાંગ્લાદેશે સુરક્ષાના કારણોનો હવાલો આપતા ભારતમાં ટી20 વિશ્વકપ રમવાનો ઇનકાર કરી દીધો હતો.

શહરયાર નફીસે આપી જાણકારી

બાંગ્લાદેશ ક્રિકેટ બોર્ડના ક્રિકેટ ઓપરેશન્સ અધિકારી શહરયાર નફીસે આઈપીએલ રજીસ્ટ્રેશનને લઈને મોટી જાણકારી આપી છે. તેણે કહ્યુ કે મુસ્તફિઝુર સિવાય નાહિદ રાણા, રિશાદ હુસૈન, હસન મહમૂદ, તૌહીદ હ્રદૌય, તસ્કીન અહમદ અને શોરિફુલ ઇસ્લામે પણ ઓક્શન માટે રજીસ્ટ્રેશન કરાવ્યું છે. નફીસે કહ્યુ કે આ એક સાધારણ પ્રક્રિયા છે અને બીસીસીઆઈએ તમામ ક્રિકેટ બોર્ડ પાસે ખેલાડીઓના નામ માગ્યા છે, જે આગામી ઓક્શનમાં સામેલ થવા ઈચ્છે છે.