CJPની સાથે સાથે કોંગ્રેસ સહિતના વિપક્ષી દળોની ભીંસમાં લેવાની રણનીતિનો ભાજપ પાસે શું છે તોડ?
આવતી કાલે એટલે કે 10મી ઓક્ટોબરે સીજેપીએ જંતર મંતર પર વિરોધ પ્રદર્શનની જાહેરાત કરી છે. ચૂંટણી પંચ અને જ્ઞાનેશકુમાર પર એસઆઈઆર મામલે ગંભીર આરોપ લગાવીને રાજીનામું પણ માંગ્યું છે. બીજી બાજુ કોંગ્રેસ અને અન્ય વિપક્ષીદળોએ પણ મોરચો માંડેલો છે ત્યારે ભાજપ વિપક્ષની આ રણનીતિનો તોડ કઈ રીતે કાઢશે?
કોકરોચ જનતા પાર્ટીની સાથે સાથે કોંગ્રેસ અને અન્ય વિપક્ષી પાર્ટીઓ પણ એસઆઈઆરના મુદ્દે ચૂંટણી પંચ અને મુખ્ય ચૂંટણી કમિશનર જ્ઞાનેશકુમાર સામે મોરચો માંડી બેઠા છે. જેને પગલે 10મી ઓક્ટોબરે દિલ્હીના જંતર મંતર પર કોકરોચ જનતા પાર્ટીએ મોટું વિરોધ પ્રદર્શન યોજ્યું છે અને દેશભરમાંથી લોકોને આહ્વાન કર્યું છે કે તેમાં ભાગ લે. ત્યારે કેન્દ્રમાં ભાજપના નેતૃત્વવાળું એનડીએ સત્તા પર છે અને ભાજપ પાસે વિપક્ષી દળો અને કોકરોચ જનતા પાર્ટીને કાઉન્ટર કરવા માટે શું કોઈ રણનીતિ ઘડાઈ છે?
સોશિયલ મીડિયા પર પ્રભાવી કેમ્પેઈન
આ મુદ્દે સોશિયલ મીડિયા દ્વારા બનનારા સંભવિત નકારાત્મક પ્રભાવને ડામવા માટે એનડીએ સામાજિક અને પ્રાદેશિક સમીકરણોને સાધી રહ્યું છે. સંસદના ચોમાસું સત્રથી લઈને અત્યાર સુધી વિપક્ષ સતત સત્તાધારી ગઠબંધનને લપેટામાં લેવાની કોશિશ કરી રહ્યું છે. પહેલા વિદ્યાર્થી આંદોલન અને ત્યારબાદ ઝેન ઝીની આકરી પ્રતિક્રિયાનો લઈને સરકારે હવે મોટું પગલું ભરતા આંદોલનકારીઓની માંગણી સ્વીકારી અને મામલો રફેદફે કર્યો.
જો કે સરકારનું એવું માનવું છે કે વિપક્ષ જે મનસૂબા લઈને બેઠો હતો તે પૂરા થઈ ન શક્યા. ત્યારે હવે વિપક્ષ SIR મુદ્દે ચૂંટણી પંચ અને જ્ઞાનેશકુમારને ટાર્ગેટ પર લીધા છે. દિલ્હીમાં છેલ્લા કેટલાક સમયથી કોંગ્રેસ સહિતના વિપક્ષી દળો રસ્તાઓ પર મોરચો માંડીને બેઠા છે. બીજી બાજુ કોકરોચ જનતા પાર્ટી પણ 10મી ઓક્ટોબરથી મોરચો જંતરમંતર પર મોરચો ખોલશે. ભાજપ તેને અરાજકતા ફેલાવવાના પ્રયત્નો ગણાવી રહ્યો છે. ભાજપે પણ સ્થિતિને કાબૂમાં રાખવા માટે પ્રવક્તાઓ અને દિગ્ગજ નેતાઓની ફોજ કામે લગાડી છે. જે વિપક્ષી દળોના આરોપોના પલટવાર કરી જવાબ આપી રહ્યા છે.
- આ સમગ્ર મામલાની અસર મુદ્દે ભાજપના એક મહાસચિવે કહ્યું કે વિપક્ષને પ્રદર્શન કરવાનો હક છે પણ જે રીતે બંધારણીય સંસ્થાઓ પર હુમલા કરી રહ્યો છે તે લોકતંત્રને નુક્સાન પહોંચાડે તેવું છે.
- આથી તેમને જનતાનું સમર્થન મળશે નહીં. તેઓ સરકારને પણ તેમાં લપેટીને નેતાઓની છબી ખરાબ કરવાની કોશિશ કરી રહ્યા છે. પણ તેમને સફળતા મળશે નહીં.
- એનડીએની એકજૂથતા પર કોઈ અસર નહીં પડે.
- ચિરાગ પાસવાને પણ કહ્યું છે કે જો વિપક્ષને કોઈ પણ શંકા હોય તો પંચ સાથે સીધી વાત કરે.
ભાજપની રણનીતિ!
- એકબાજુ આ ઘટનાક્રમો ચાલુ છે ત્યાં બીજી બાજુ ભારતીય જનતા પાર્ટીએ તો પોતાના સંગઠનના કાર્યક્રમોને બરાબર ચાલુ રાખ્યા છે.
- પાર્ટીએ વિપક્ષના આ આંદોલન વચ્ચે સેવા સંકલ્પ અભિયાન દ્વારા લોકો અને ખાસ કરીને યુવાઓ સુધી પોતાની પહોંચમાં વ્યાપક વધારો કર્યો છે.
- આ સાથે જ પ્રાદેશિક અને સામાજિક સમીકરણો પર વધુ કામ થઈ રહ્યું છે જેનાથી ચૂંટણી રાજકારણ અને રણનીતિ પર વિપક્ષના આ પ્રકારના આંદોલનોથી જનતામાં સરકાર વિરુદ્ધ નકારાત્મક માહોલ ન બને.
અવ્યવસ્થા ફેલાવવાનો પ્રયત્ન- ભાજપ
- વિપક્ષ અને કોકરોચ જનતા પાર્ટી દ્વારા થઈ રહેલા પ્રદર્શનો પર ભાજપે ગુરુવારે ત્રણ પત્રકાર પરિષદો કરી. આ કડીમાં સિદ્ધાર્થ યાદવે કહ્યું કે જે તસવીરો વાયરલ થઈ રહી છે તે પ્રદર્શનની નહીં પરંતુ રાજધાનીમાં ફેલાવવામાં આવેલી અરાજકતા દર્શાવે છે.
- આ પ્રદર્શનોમાં કોઈ સામાન્ય નાગરિકો ભાગ લેતા નથી.
- પ્રવક્તા પ્રદીપ ભંડારીએ આરોપ લગાવ્યો કે કોંગ્રેસ રસ્તાઓ પર પ્રદર્શનો કરીને દેશમાં નેપાળ અને બાંગ્લાદેશ જેવી અરાજકતા ફેલાવવાની કોશિશ કરે છે.
- પાર્ટીએ આંદોલનકારીઓને નિયંત્રિત કરનારા મહિલા પોલીસકર્મીઓ સાથે જે ગેરવર્તણૂંક થઈ તેની પણ ટીકા કરી.
હવે આવનારા સમયમાં એ જોવાનું રહેશે કે વિપક્ષી દળો અને કોકરોચ જનતા પાર્ટીના સરકાર, ચૂંટણી પંચ, મુખ્ય ચૂંટણી કમિશનર જ્ઞાનેશકુમાર વિરુદ્ધના આંદોલનો અને વિરોધ પ્રદર્શનો જનતાની નસ પકડી શકે છે કે નહીં.
