બંગાળની ખાડીમાં ફરી મંડરાયું વાવાઝોડાનું જોખમ: 'અકવાન' તોફાન બનશે વધુ ખતરનાક, અનેક રાજ્યોમાં ભારે વરસાદની આગાહી
IMD Weather Warning: માત્ર ત્રણ સપ્તાહની અંદર બંગાળની ખાડીમાં ત્રીજા ચક્રવાત અકવાનનો ખતરો ઉભો થયો છે. હવામાન વિભાગની ચેતવણી બાદ તમિલનાડુ, આંધ્ર પ્રદેશ અને ઓડિશામાં હાઈ એલર્ટ જાહેર કરવામાં આવ્યું છે.
Cyclone Akvan: ઓક્ટોબર અને નવેમ્બરનો મહિનો પૂર્વી ભારતના સમુદ્રી રાજ્યો માટે ભારે પડી રહ્યો છે. બંગાળની ખાડીમાં વધુ એક ખતરનાક વાવાઝોડાની સંભાવના બની રહી છે. તાજેતરમાં આવેલા ચક્રવાત અર્ણબ અને ચક્રવાત મુરૂસુ (Cyclone Murasu) બાદ વધુ એક તોફાન અકવાન વિકરાળ સ્વરૂપ ધારણ કરી રહ્યું છે. હવામાન વિભાગની ચેતવણી બાદ તમિલનાડુ, આંધ્ર પ્રદેશ અને ઓડિશા સહિત ઘણા રાજ્યોમાં હાઈ એલર્ટ જાહેર કરવામાં આવ્યું છે.
શું કહે છે IMD નું નવું અપડેટ?
હવામાન વિભાગના લેટેસ્ટ બુલેટિન અનુસાર બંગાળની ખાડીની ઉપર બનેલું ડીપ ડિપ્રેશન હવે ગંભીર ચક્રવાતી તોફાનમાં પરિવર્તિત થઈ રહ્યું છે.
નામકરણઃ આ સંભવિત ચક્રવાતનું નામ અકવાન (Akvan) રાખવામાં આવ્યું છે, આ નામ ઈરાને આપ્યું છે.
ગતિ અને તાકાત
આ સિસ્ટમ ઉત્તર-ઉત્તર પશ્ચિમ દિશામાં આગળ વધતા આંધ્ર પ્રદેશ અને ઓડિશાના કિનારા તરફ વધી રહ્યું છે. તે ખતરનાક વાવાઝોડામાં બદલાઈ શકે છે, જે દરમિયાન પવનની ગતિ 120થી 130 કિમી પ્રતિ કલાક રહી શકે છે.
રાજ્યો પર શું થશે અસર?
આ ચક્રવાતી તોફાનને કારણે ઘણા રાજ્યોમાં મૂશળધાર વરસાદ અને ભયંકર આંધીનું અનુમાન વ્યક્ત કરવામાં આવ્યું છે.
આંધ્ર પ્રદેશ: 19 અને 20 નવેમ્બરે સમુદ્રી વિસ્તારમાં ભારે વરસાદની ચેતવણી આપવામાં આવી છે. ઉત્તરી દરિયાકાંઠાના જિલ્લામાં કેટલીક જગ્યાએ અતિભારે વરસાદ પડી શકે છે. 19 નવેમ્બરની સાંજ સુધી ભારે પવન ફૂંકાવા લાગશે.
ઓડિશાઃ તાજેતરમાં અર્ણબ ચક્રવાતને કારણે તબાહીનો સામનો કરી ચુકેલા ઓડિશામાં સરકારે કમર કસી લીધી છે. 18 નવેમ્બરથી હળવો વરસાદ શરૂ થઈ જશે, જે 19થી 31 નવેમ્બર વચ્ચે દક્ષિણી જિલ્લામાં ભારેથી અતિભારે વરસાદમાં પરિવર્તિત થશે.
તમિલનાડુ, પુડુચેરી અને કરાઈકલઃ ઉત્તરી કિનારાના જિલ્લામાં ભારે વરસાદ અને સમુદ્રમાં ઊંચા મોજા ઉછળવાની ચેતવણી આપવામાં આવી છે. 18 અને 19 નવેમ્બરે અહીં હવામાન ખરાબ રહેશે.
અન્ય રાજ્યઃ આ સિસ્ટમની અસર તેલંગણા, છત્તીસગઢ, ઝારખંડ અને પશ્ચિમ બંગાળ પર પડશે. જ્યાં 19-21 નવેમ્બર વચ્ચે ભારે વરસાદ પડવાની સંભાવના છે.
સરકારો એલર્ટ, NDRF તૈનાત
છેલ્લા બે તોફાનોથી થયેલા નુકસાનને જોતા આ વખતે તંત્ર હાઈ એલર્ટ પર છે. ઓડિશાના ડિઝાસ્ટર મેનેજમેન્ટ મંત્રી સુરેશ પુજારીએ જણાવ્યુ કે તમામ જિલ્લા, ખાસ કરી દક્ષિણી અને સમુદ્રી વિસ્તારને હાઈ એલર્ટ પર રાખવામાં આવ્યા છે. દરેક જિલ્લામાં 24 કલાક કંટ્રોલ રૂમ સક્રિય કરવામાં આવ્યો છે. આ સિવાય કોઈપણ ઈમરજન્સી સ્થિતિનો સામનો કરવા માટે NDRF, ODRAF અને ફાયરની ટીમોને તૈનાત રાખવામાં આવી છે. માછીમારોને દરિયો ન ખેડવાની સૂચના આપવામાં આવી છે.