બિલ્કિસ બાનો કેસમાં સુપ્રીમ કોર્ટનો મોટો ચુકાદો, બે દોષિતોની સજા પર રોક લગાવી જામીન આપ્યા
Bilkis Bano Case : સુપ્રીમ કોર્ટે બિલ્કિસ બાનો ગેંગરેપ અને પરિવારના સભ્યોની હત્યાના કેસમાં મોટો ચુકાદો આપ્યો છે. સુપ્રીમ કોર્ટે આજીવન કેદની સજા ભોગવી રહેલા બે દોષિતોના જામીન મંજૂર કર્યા છે.
Bilkis Bano Case : સુપ્રીમ કોર્ટે બિલ્કીસ બાનો ગેંગરેપ અને તેમના પરિવારના સભ્યોની હત્યાના કેસમાં આજીવન કેદની સજા ભોગવી રહેલા બે દોષિતોને મોટી રાહત આપી છે. સર્વોચ્ચ અદાલતે બિપિનચંદ્ર કનૈયાલાલ જોશી અને પ્રદીપ રામલાલ મોઢિયાની આજીવન કેદની સજા પર રોક લગાવી દીધી છે અને તેમના જામીન મંજૂર કર્યા છે. બંને દોષિતો જેલમાં 17 વર્ષથી વધુ સમય વિતાવી ચૂક્યા છે. જોકે, તેમની દોષિત ઠેરવવાની સજા સામે દાખલ કરવામાં આવેલી અપીલ પર સુનાવણી ચાલુ રહેશે.
ઝી ન્યૂઝનું ઓપરેશન 'કાલા પાણી', સત્ય બોલવા બદલ ગ્રામજનોને ધમકી આપ્યાનો આરોપ
સોમવારે, જસ્ટિસ એમ.એમ. સુન્દરેશ અને જસ્ટિસ પ્રસન્ના બી. વરાલેની ખંડપીઠે આ બે દોષિતો દ્વારા દાખલ કરવામાં આવેલી અરજીઓ પર આ આદેશ આપ્યો હતો. આ અરજીઓમાં બોમ્બે હાઈકોર્ટના 2017ના ચુકાદાને પડકારવામાં આવ્યો હતો, જેમાં ટ્રાયલ કોર્ટ દ્વારા આપવામાં આવેલી સજા અને દોષિત ઠેરવવાના નિર્ણયને યથાવત રાખવામાં આવ્યો હતો.
બંને દોષિતો જેલમાં 17 વર્ષથી વધુ સમય વિતાવી ચૂક્યા છે
સુનાવણી દરમિયાન દોષિતો વતી હાજર રહેલા વરિષ્ઠ વકીલ સિદ્ધાર્થ લુથરાએ દલીલ કરી હતી કે બંને વ્યક્તિઓ 17 વર્ષથી વધુ સમયથી કસ્ટડીમાં છે. તેમણે વધુમાં જણાવ્યું હતું કે દોષિતોમાંથી એક ગંભીર રીતે દિવ્યાંગ છે. બચાવ પક્ષે એ પણ ધ્યાન દોર્યું હતું કે આરોપીઓમાંથી એકનું નામ શરૂઆતની FIRમાં નહોતું અને ઘટના બન્યાના લગભગ ત્રણ વર્ષ પછી તેને કેસમાં સામેલ કરવામાં આવ્યો હતો.
પોતાના આદેશમાં ખંડપીઠે જણાવ્યું હતું કે બંને દોષિતો દ્વારા દાખલ કરવામાં આવેલી અપીલોમાં એવા મુદ્દાઓ ઉઠાવવામાં આવ્યા છે જેના પર તથ્યો અને કાયદા બંનેના આધારે વિચારણા કરવાની જરૂર છે. કોર્ટે રાહત આપવા માટે તેમના લાંબા જેલવાસ અને એક દોષિતની ગંભીર દિવ્યાંગતાને પણ સંબંધિત સંજોગો તરીકે ધ્યાનમાં લીધી હતી.
સરકારે જામીનનો વિરોધ કર્યો
એડિશનલ સોલિસિટર જનરલ રાજા ઠાકરેએ દોષિતોની જામીન અરજીનો સખત વિરોધ કર્યો હતો. તેમણે દલીલ કરી હતી કે ટ્રાયલ કોર્ટ અને બોમ્બે હાઈકોર્ટ બંનેએ આ કેસમાં પુરાવાઓની તપાસ કરી લીધી છે. ગુનાની ગંભીરતાને જોતા, તેમણે દલીલ કરી હતી કે દોષિતોને કોઈ રાહત આપવી જોઈએ નહીં. જોકે, અપીલોમાં ઉઠાવવામાં આવેલા મુદ્દાઓ અને અન્ય સંજોગોને ધ્યાનમાં રાખીને, સુપ્રીમ કોર્ટે બંને વ્યક્તિઓની સજા પર રોક લગાવી દીધી છે. અદાલતે જામીનની શરતો નક્કી કરવાનું કામ સંબંધિત ટ્રાયલ કોર્ટપર છોડ્યું છે.
કેસની સમગ્ર વિગતો
આ કેસ 2002ના ગુજરાત રમખાણો સાથે જોડાયેલો છે. તે સમયે, 21 વર્ષીય બિલ્કીસ બાનો પાંચ મહિનાની ગર્ભવતી હતી. રમખાણો દરમિયાન તેના પર સામૂહિક બળાત્કાર ગુજારવામાં આવ્યો હતો અને તેના પરિવારના સાત સભ્યોની હત્યા કરવામાં આવી હતી. જેમાં તેની ત્રણ વર્ષની પુત્રીનો પણ સમાવેશ થાય છે.
2008માં મુંબઈની એક વિશેષ અદાલતે આ કેસમાં 11 વ્યક્તિઓને દોષિત ઠેરવી આજીવન કેદની સજા સંભળાવી હતી. બાદમાં બોમ્બે હાઈકોર્ટે તેમની સજા યથાવત રાખી હતી.
ગુજરાત સરકારના નિર્ણયને સુપ્રીમ કોર્ટે પલટી નાખ્યો હતો
15 ઓગસ્ટ, 2022ના રોજ, ગુજરાત સરકારે આ 11 દોષિતોને તેમની સજા માફી આપીને મુક્ત કર્યા હતા. જોકે, 8 જાન્યુઆરી, 2024ના રોજ સુપ્રીમ કોર્ટે આ નિર્ણયને પલટી નાખ્યો હતો. અદાલતે જણાવ્યું હતું કે ગુજરાત સરકાર પાસે દોષિતોને સમય પહેલા મુક્ત કરવાનો નિર્ણય લેવાની સત્તા નથી. આના પગલે, તમામ દોષિતોએ જેલમાં પાછા ફરવું પડ્યું હતું.