બેંગલુરુમાં દિવાળી પાર્ટીની આડમાં નશાની મહેફિલ! ડ્રિંક્સ, ડ્રગ્સ, મ્યૂઝિકનો યુવાઓને જલસો કરાવવાનું આયોજન, 4ની ધરપકડ
ટેક હબ ગણાતા બેંગલુરુમાં દિવાળી પાર્ટીના નામે રેવ પાર્ટીનો ખેલ સામે આવ્યો છે. આ દરમિયાન પોલીસે દરોડો પાડતા ભારે પ્રમાણમાં ગાંજો, ડ્રગ્સ, જેવી ચીજો જપ્ત કરી. પાર્ટી માટે ઈન્ટરનેટ પર એડ ચલાવવામાં આવી હતી. જેમાં વેન્યુની જો કે સટીક જાણકારી નહતી અપાઈ.
બેંગલુરુમાં પોલીસે એક પુલ પાર્ટી પર દરોડા પાડતા વિપુલ પ્રમાણમાં ગાંજો, ડ્રગ્સ અને MDMA પકડી પાડ્યા. આ પાર્ટીમાં અનેક મહિલાઓનો પણ ઉપયોગ કરાયો હતો. પોલીસના જણાવ્યાં મુજબ આ ગેરકાયદેસર પૂલ પાર્ટી મરાઠાહલ્લીમાં દિવાળી સેલિબ્રેશનની આડમાં યોજવામાં આવી હતી.
પોલીસે પૂલ પાર્ટીના નામે આયોજિત કરાયેલી આ રેવ પાર્ટીનો પર્દાફાશ કરતા કહ્યું કે આ એક ઓનલાઈન એપ દ્વારા યુવા છોકરા અને છોકરીઓ માટે અજાણ્યાઓની પાર્ટી તરીકે યોજવામાં આવી હતી. આ પાર્ટી યમલૂરમાં કરિયામ્મના અગ્રહારા રોડ પર એક પ્રાઈવેટ વિલામાં થઈ રહી હતી.
દિવાળી પાર્ટીના નામે રેવ પાર્ટી
પોલીસે રેડ દરમિયાન મળેલી ચીજો જપ્ત કરીને ફોરેન્સિક એનાલિસિસ માટે મોકલી આપી છે. CCB અધિકારીઓની રેડ બાદ મરાઠાહલ્લી પોલીસ સ્ટેશનમાં પણ કેસ નોંધાયો છે.
આ મામલે અરિહંત પાંડે, અભિનવ પાંડે, અને પાર્થ નામના 3 સંદિગ્ધોની ધરપકડ કરવામાં આવી છે. તેમણે વોટ્સએપ, ટેલિગ્રામ દ્વારા યુવા છોકરા અને છોકરીઓને ભેગા કર્યા હતા. પ્રમોશનલ પોસ્ટમાં છોકરીઓની ભડકાઉ તસવીરો અને વીડિયો હતા. જેમાં કેટલાક મેસેજ આ પ્રકારે હતા કે 'આ દિવાળી તમારા માટે ક્રેઝી થવાની છે, હું એક ક્રેઝી પૂલ પાર્ટી હોસ્ટ કરી રહ્યો છું. અંધારું થયા બાદ ડ્રિંક્સ, મ્યૂઝિક, ભોજન, અને પૂલના યાદગાર વાઈબ્સની સાથે..'
વેન્યૂ છૂપાવીને રાખ્યું
આ ઈવેન્ટની એડ ઓનલાઈન કરાઈ હતી. જેમાં તેને 50 લોકોની પૂલ પાર્ટી ગણાવવામાં આવી હતી. પાર્ટીમાં આવવા માટે 1710 રૂપિયાની એન્ટ્રી ફી, મહિલાઓ માટે 1080 રૂપિયા અને કપલ્સ માટે 2400 રૂપિયા ફી રાખવામાં આવી હતી. આ ઉપરાંત પાર્ટીમાં ઉપલબ્ધ અન્ય નશીલી વસ્તુઓ માટેઅલગથી ચાર્જ લગાવવામાં આવ્યા હતા.
આ પૂલ પાર્ટી રાતે 9 વાગ્યાથી સવારે 5 વાગ્યા સુધી ચાલવાની હતી. પોલીસને જાણકારી ન મળે એટલે કે આરોપી દર વખતે અલગ અલગ જગ્યાઓ પર પાર્ટી યોજતા હતા અને ફોન પર લોકોને વેન્યૂ જણાવતા હતા. આ પાર્ટીઓ 'FV Social 404' અને 'Hopzyx' એપ દ્વારા ઓનલાઈન યોજાઈ હતી.
તેમાં સામેલ લોકોમાં 'FV Social 404' ના અરિહંત પાંડે, અભિનવ પાંડે, અને 'Hopzyx' એપના પાર્થ સામેલ છે. આ એપ ભારતના અલગ અલગ શહેરોમાં આવી જ પાર્ટીઓ યોજે છે. આ પાર્ટી કરિયામ્મન અગ્રહારા રોડ પર અનુરાગ ચૌહાણ નામના એક ઘરમાં યોજવામાં આવી હતી. CCBની રેડમાં જાણવા મળ્યું કે એક પ્રાઈવેટ પાર્ટીની આડમાં મંજૂરી વગરના કામ થતા હતા. રેડ દરમિયાન માહિતી મળી કે પાર્ટી માટે કોી પણ માન્ય ઓથોરિટી પાસે પરમિશન લેવાઈ નહતી. હુક્કા, દારૂ, સિગારેટ, અને ડ્રગ્સ જેવી પ્રતિબંધિત ચીજોની સાથે સાથે ગેરકાયદેસર ગતિવિધિઓ પણ જોવા મળી. મરાઠાહલ્લીમાં 4 લોકો સામે કેસ નોંધાયો છે અને પોલીસે આરોપીઓની ધરપકડ કરી છે.
