રોહિત શેટ્ટીના ઘર પર ફાયરિંગ, બોલિવૂડ કલાકારોને ધમકી... હવે હેરી બોક્સરની અમેરિકામાં ધરપકડ

ગેંગસ્ટર હેરી બોક્સરની અમેરિકામાં ધરપકડ કરવામાં આવી છે. ફિલ્મ નિર્માતા રોહિત શેટ્ટીના ઘરની બહાર થયેલી ફાયરિંગની ઘટનાના સંદર્ભમાં તેનું નામ સામે આવ્યું હતું. તેણે સોશિયલ મીડિયા પોસ્ટ દ્વારા આ હુમલાની જવાબદારી લીધી હતી. ત્યારબાદ બોલિવૂડ ફિલ્મ ઉદ્યોગના વિવિધ વ્યક્તિઓને ધમકીભર્યા ઓડિયો મેસેજ પણ મોકલવામાં આવ્યા હતા, જે તેના તરફથી આપવામાં આવ્યા હોવાનું માનવામાં આવે છે.

લોરેન્સ બિશ્નોઈ ગેંગ સાથે સંકળાયેલો છે હેરી બોક્સર

હેરી બોક્સર લોરેન્સ બિશ્નોઈ ગેંગ સાથે સંકળાયેલો છે. એવો આરોપ છે કે તે અમેરિકામાં રહીને ગેંગને ઓપરેટ કરી રહ્યો હતો. તેની સામે હત્યા અને ખંડણી સહિતના અનેક ગંભીર આરોપો છે. યુએસ એજન્સી ICEએ કેલિફોર્નિયામાં તેની અટકાયત કરી છે.

ગાઝિયાબાદની વસુંધરા પોલીસ ચોકીમાં જોરદાર વિસ્ફોટ... 'તહરીક-ઉલ-મુજાહિદ્દીન હિન્દુસ્તાન'એ લીધી જવાબદારી!

હિમાંશુ ભાઉ અને નીરજ ફરીદપુરીયા પણ કસ્ટડીમાં

હેરી બોક્સર પહેલાં ગેંગસ્ટર હિમાંશુ ભાઉ અને નીરજ ફરીદપુરીયાની પણ અમેરિકામાં ધરપકડ કરવામાં આવી હતી. અહેવાલો અનુસાર, આ બંને ભારતમાં અનેક ગુનાહિત કેસોમાં વોન્ટેડ છે. કાયદા અમલીકરણ એજન્સીઓ વિદેશમાં રહીને ભારતમાં ગુનાહિત પ્રવૃત્તિઓ ચલાવતા ગેંગસ્ટરોને પકડવા માટે સક્રિયપણે કામ કરી રહી છે. હેરી બોક્સરની ધરપકડને આ પ્રયાસોમાં એક મહત્વપૂર્ણ સફળતા માનવામાં આવે છે.

રોહિત શેટ્ટીના ઘરની બહાર ફાયરિંગ થયું હતું

1 ફેબ્રુઆરી, 2026ના રોજ મોડી રાત્રે ફિલ્મ નિર્દેશક રોહિત શેટ્ટીના જુહુ સ્થિત ઘરની બહાર ફાયરિંગની ઘટના બની હતી. હુમલાખોરે શેટ્ટી ટાવરની બહાર અનેક રાઉન્ડ ફાયરિંગ કર્યું હતું. ઘટના સમયે રોહિત શેટ્ટી ઘરે હાજર હતા. જોકે, કોઈને ઈજા થઈ નહોતી.

ફાયરિંગ બાદ સોશિયલ મીડિયા પર એક પોસ્ટ સામે આવી, જેમાં શુભમ લોન્કર, અર્જુ બિશ્નોઈ, હેરી બોક્સર અને હરમન સંધુએ આ હુમલાની જવાબદારી સ્વીકારી. આ પોસ્ટમાં રોહિત શેટ્ટીને ધમકી પણ આપવામાં આવી હતી, જેમાં જણાવાયું હતું કે તેને અગાઉ ચેતવણી આપવામાં આવી હતી, પરંતુ તેણે તેને ગંભીરતાથી લીધી નહોતી. વધુમાં પોસ્ટમાં એવી ધમકી પણ આપવામાં આવી હતી કે ભવિષ્યમાં વધુ ગંભીર ઘટનાઓ બની શકે છે.

રાજસ્થાનનો રહેવાસી છે હેરી બોક્સર

અહેવાલો અનુસાર, હેરી બોક્સરનું સાચું નામ હરિશ્ચંદ્ર છે. તે રાજસ્થાનના કોટપુતલી-બહેરોડ જિલ્લામાં આવેલા બાનસુરનો વતની છે. પોલીસના જણાવ્યા અનુસાર, રાજસ્થાન ઉપરાંત તે દિલ્હી, હરિયાણા અને પંજાબમાં અનેક ગંભીર ગુનાહિત ઘટનાઓમાં સંડોવાયેલો રહ્યો છે.

તેના ગુનાહિત ઇતિહાસને ધ્યાનમાં રાખીને, હરિયાણા પોલીસે તેને મોસ્ટ વોન્ટેડ ગુનેગારોની યાદીમાં સામેલ કર્યો છે. જ્યારે ભારતમાં પોલીસે તેના પર ગાળિયો કસવાનું શરૂ કર્યું, ત્યારે તે સુરક્ષા એજન્સીઓને થાપ આપીને દેશમાંથી ફરાર થઈ ગયો. તે અમેરિકમાં રહીને ભારતમાં લોરેન્સ બિશ્નોઈ ગેંગને ઓપરેટ કરી રહ્યો હતો.