Gujarat News Live: મહેસુલી કર્મચારીઓની હડતાળ મામલે મોટા સમાચાર, CMની અધ્યક્ષતામાં શુક્રવારે કેબિનેટ બેઠક, ગાંધીનગરમાં બેફામ દારૂ વેચાય છે: ગેનીબેન

મહેસુલી કર્મચારીઓની હડતાળ મામલે મહત્વના સમાચાર સામે આવ્યા છે. મહેસુલી કર્મચારીઓના પ્રશ્નો અંગે ચાલી રહેલી હડતાળ મુદ્દે કૃષિ મંત્રી જીતુ વાઘાણીની અધ્યક્ષતામાં બેઠક મળશે. હડતાળમાં સમાધાન અને માંગણીઓ પર ચર્ચા કરવામાં આવશે.

મુખ્યમંત્રી ભૂપેન્દ્ર પટેલની અધ્યક્ષતામાં શુક્રવારે સવારે 10 વાગે કેબિનેટ બેઠક મળશે. આ બેઠકમાં પીએમ મોદીના 25 વર્ષના શાસન સંદર્ભે આભાર પ્રસ્તાવ રજૂ થશે. તો રાજ્યમાં ઓછા વરસાદવાળા વિસ્તારની સમિક્ષા કરવામાં આવશે અને આવા વિસ્તારોમાં પાણી, ઘાસચારા સંદર્ભે સમિક્ષા થશે. કૃષિ વાવેતર તથા ખેડૂતો દ્વારા અછતગ્રસ્ત જાહેર કરવાની માંગ પર પણ સમિક્ષા થશે. તો રાજ્યમાં આગામી તહેવારો દરમિયાન અનાજ વિતરણ પર ચર્ચા થશે. UCC લાગુ થતાં તેની અસર અને પ્રક્રિયા પર ચર્ચા થશે તેમજ રાજ્ય સરકારના આગામી આયોજનો અને નીતિગત વિષયો પર ચર્ચા થશે.

ગાંધીનગર મહાનગરપાલિકાની ચૂંટણી 11 ઓક્ટોબરે યોજાવાની છે ત્યારે દારૂ મુદ્દે પણ રાજકારણ ગરમાયું છે. સાંસદ ગેનીબેન ઠાકોર દ્વારા આક્ષેપ કરવામાં આવ્યો છે કે ગાંધીનગરમાં દારૂનું બેફામ વેચાણ થઈ રહ્યું છે અને તેને લઈને ફરિયાદો પણ મળી રહી છે. ગ્રામ્ય વિસ્તારોનો મહાનગરપાલિકામાં સમાવેશ થયો હોવા છતાં પાયાની સુવિધાઓનો પૂરતો વિકાસ થયો નથી. ત્યારે જો પ્રજા આશીર્વાદ આપશે તો તેમણે ગ્રામ્ય વિસ્તારોમાં પાયાની સુવિધાઓ માટે કામ કરવાની ખાતરી આપી છે.
 

ભાડા વિધેયક મામલે સરકાર સાથે બેઠક બાદ અમદાવાદ બાર એસોસિએશનમાં મતભેદ સામે આવ્યા છે. કેટલાક વકીલોએ પ્રમુખ જગત ચોક્સી સામે વિરોધ નોંધાવી વિનોદ દીક્ષિતને કાર્યકારી પ્રમુખ તરીકે પસંદ કર્યા હોવાનો દાવો કર્યો છે. વિનોદ દીક્ષિતે કહ્યું કે, સરકાર લેખિત બાંહેધરી નહીં આપે ત્યાં સુધી 10 ઓક્ટોબર સુધી હડતાળ યથાવત્ રહેશે. બીજી તરફ જગત ચોક્સીએ સ્પષ્ટ કર્યું કે હડતાળ ચાલુ છે અને પ્રમુખ તરીકે તેઓ જ જવાબદારી નિભાવી રહ્યા છે. બંને પક્ષના નિવેદનથી એસોસિએશનમાં વિવાદ વધુ વકર્યો છે.