Gujarat News Live: CM ભુપેન્દ્ર પટેલની PM મોદી સાથે મુલાકાત, દશેરા પહેલા આરોગ્ય વિભાગ એક્શનમાં, મહુવામાં મહિલા બુટેલગરની દાદાગીરી

સુરત મઢી સુગર ફેક્ટરીના પ્રમુખ તરીકે સમીર ભક્તની બિનહરીફ વરણી થઈ છે. ઉપપ્રમુખ પદે કિસાન પરિવર્તન પેનલના જીતુ બામણી બિનહરીફ ચૂંટાયા છે. પ્રમુખ અને ઉપપ્રમુખ પદ માટે એકથી વધુ ઉમેદવારી ફોર્મ ન આવતા બિનહરીફ વરણી થઈ છે. આગામી અઢી વર્ષના કાર્યકાળ માટે નવા હોદ્દેદારોની વરણી કરાઈ. બારડોલી પ્રાંત અધિકારીની અધ્યક્ષતામાં ચૂંટણી પ્રક્રિયા યોજાઈ હતી. સુગર ફેક્ટરીની સામાન્ય ચૂંટણીમાં સહકાર અને કિસાન પરિવર્તન પેનલ વચ્ચે કાંટાની ટક્કર થઈ હતી, ત્યારે ચૂંટણી સમયે હરીફ પેનલના વિજેતા ડિરેક્ટરને ઉપપ્રમુખ પદ મળતા લોકો ચોંકી ગયા હતા. બિનહરીફ વરણી બાદ હવે ખેડૂતોના હિત અને ફેક્ટરીના સંચાલન પર સૌની નજર રહેશે.

મુખ્યમંત્રી ભુપેન્દ્ર પટેલે પ્રધાનમંત્રી નરેન્દ્ર મોદી સાથે મુલાકાત કરી હતી. CM ભુપેન્દ્ર પટેલ એક દિવસની દિલ્હી મુલાકાતે પહોંચ્યા હતા અને PM મોદી સાથેની મુલાકાત દરમિયાન ગુજરાતના વિકાસ સંદર્ભે પ્રધાનમંત્રીનું માર્ગદર્શન મેળવ્યું હતું. ગુજરાતના અલગ અલગ વિકાસ કાર્યો અને પ્રોજેક્ટ સંદર્ભે પણ ચર્ચા થઈ હતી.

ટાઈગર શ્રોફ પર ફાયરિંગ કરનારા તમામ આરોપી પોલીસ સકંજામાં આવ્યા છે. રાજસ્થાનના કોટાથી ત્રણેયની ધરપકડ કરવામાં આવી છે. આરોપીઓ દિલ્લી પહોંચીને નેપાળ ભાગવાની ફિરાકમાં હતા. ત્રણ પૈકી એક આરોપી સગીર હોવાનું સામે આવ્યું છે. બે આરોપી હરિયાણાના છે, તો એક બિહારનો હોવાનું સામે આવ્યું છે. 

ભાવનગરના મહુવામાં મહિલા બુટલેગરની દાદાગીરી સામે આવી છે. દરોડા પાડવા ગયેલી SMCની ટીમ સાથે ઝપાઝપી કરી હતી. પોલીસે મહિલા બુટલેગર સહિત બે વ્યક્તિને ઝડપી પાડ્યા છે. શહેરના કાળ ભૈરવ ચોક પાસે બનેલી ઘટનાનો વીડિયો વાયરલ થયો છે. મહિલા બુટલેગર અને તેના ભાઈ લાલુ બોઘાની ધરપકડ કરાઈ છે. 
 

દશેરાના એક દિવસ પહેલા આરોગ્ય વિભાગ એક્શનમાં આવ્યું છે. અમદાવાદ, રાજકોટ સહિત અલગ અલગ શહેરોમાં ચેકિંગ હાથ ધરવામાં આવ્યું હતું. અમદાવાદના વસ્ત્રાપુરમાં ગાંઠિયાની દુકાનમાં મળ્યું અખાદ્ય તેલ આવ્યું હતું, તો રાજકોટમાં ફરસાણ બનાવતા 3 એકમોને નોટિસ ફટકારવામાં આવી છે.