Gujarat News Live: નવમાં નોરતે વરસાદનું વિધ્ન, અમદાવાદ એરપોર્ટ પર કસ્ટમની મોટી કાર્યવાહી, રાજકોટમાં લૂંટ કેસના આરોપીએ કર્યું ફાયરિંગ

અમેરિકાના રાષ્ટ્રપતિ ટ્રમ્પે રશિયા વિરુદ્ધના લિન્ડસે ગ્રેહામ એક્ટ હેઠળના મોટાભાગના નવા પ્રતિબંધો અને ટેરિફ માફ કર્યા. ભારત સહિત અન્ય કેટલાક દેશોને રશિયન ઓઈલ-ગેસ  ખરીદવા પર ટેરિફમાંથી વિશેષ છૂટ આપવામાં આવી. જો કે આ છૂટછાટો કાયમી નથી, રાષ્ટ્રપતિ અથવા સેક્રેટરી ઓફ સ્ટેટ આગળની કાર્યવાહી યોગ્ય ન ગણે ત્યાં સુધી જ અમલમાં રહેશે.

ભરૂચના વાગરાની સાયખા GIDCમાં SynZeal Pharmachem કંપનીમાં પ્રચંડ બ્લાસ્ટ. ગોઝારી દુર્ઘટનામાં કામદારોનાં મૃત્યુઆંક વધીને 5 થયો. બ્લાસ્ટની ઘટનામાં અન્ય 2 કામદારો સારવાર હેઠળ. રાસાયણિક પ્રક્રિયા દરમિયાન ધડાકો થતાં ઔદ્યોગિક વિસ્તારમાં ભયનો માહોલ. ભયાનક બ્લાસ્ટના કારણે મશીનરીના પાર્ટ્સ વેરવિખેર થયાં. ઇન્ડસ્ટ્રિયલ સેફ્ટી એન્ડ હેલ્થ વિભાગની ટીમે તપાસ શરૂ કરી.

સુરેન્દ્રનગર જિલ્લાના સુદામડા ગામ ખાતે પોલીસ અને એક નામચીન શખ્સ વચ્ચે ઘર્ષણની ઘટના સામે આવી છે. અનેક ગુનાઓમાં સંડોવાયેલો અને લાંબા સમયથી ગુનાહિત ઇતિહાસ ધરાવતો આ આરોપી પોલીસ પકડમાંથી ભાગવાનો પ્રયાસ કરી રહ્યો હતો. તેને કાબૂમાં લેવા અને ભાગતો રોકવા માટે પોલીસે સ્વબચાવમાં ફાયરિંગ કરવું પડ્યું હતું. આ ઘટનામાં આરોપી ઈજાગ્રસ્ત થતાં તેને ત્વરિત સારવાર અર્થે નજીકની હોસ્પિટલમાં ખસેડવામાં આવ્યો છે.

રાજકોટમાં સન્સનીખેજ લૂંટ વિથ મર્ડર કેસના આરોપીને સાથે રાખીને પોલીસ જ્યારે ઘટનાસ્થળે પંચનામું કરી રહી હતી, ત્યારે જ આરોપીએ અચાનક પોલીસ ટુકડી પર ફાયરિંગ કરવાનો પ્રયાસ કર્યો હતો. આ અણધારી ઘટનાને પગલે ક્રાઈમ બ્રાંચની ટીમે તુરંત સ્વબચાવમાં વળતો પ્રહાર કરીને આરોપીના પગના ભાગે ગોળી મારી તેને કાબૂમાં લીધો હતો. ફાયરિંગમાં ઘવાયેલા આરોપીને તાત્કાલિક સારવાર અર્થે સિવિલ હોસ્પિટલ ખાતે ખસેડવામાં આવ્યો છે, જ્યાં પોલીસ બંદોબસ્ત વચ્ચે તેની સારવાર ચાલી રહી છે.

અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પરથી ફરી એકવાર ગેરકાયદેસર સોનાની તસ્કરીનો પર્દાફાશ થયો છે. અબુધાબીથી આવેલા એક મુસાફર શંકાસ્પદ જણાતા કસ્ટમ વિભાગે તપાસ હાથ ધરી હતી, જેમાં મુસાફરની ટ્રોલી બેગમાં ખૂબ જ ચાલાકીથી છુપાવવામાં આવેલા 24 કેરેટ સોનાના તાર મળી આવ્યા હતા. અધિકારીઓએ મુસાફર પાસેથી ₹42.49 લાખની કિંમતનું કુલ 282.910 ગ્રામ સોનું જપ્ત કરીને કાયદેસરની કાર્યવાહી હાથ ધરી છે.

ગુજરાતમાં હવામાન વિભાગ દ્વારા રાજ્યના કેટલાક ભાગોમાં આવતીકાલે વરસાદ વરસવાની શક્યતા વ્યક્ત કરવામાં આવી છે. આ અણધાર્યા હવામાન પલટાના કારણે ખાસ કરીને સૌરાષ્ટ્ર તેમજ દક્ષિણ ગુજરાતના વિવિધ વિસ્તારોમાં વરસાદી માહોલ જોવા મળી શકે છે. જેમાં નવસારી અને વલસાડ જિલ્લાના કેટલાક ભાગોમાં હળવાથી મધ્યમ વરસાદની સંભાવના સેવાઈ રહી છે. વરસાદની આ આગાહીને પગલે આ વિસ્તારોના લોકો અને ખાસ કરીને ખેડૂતોમાં ચિંતા સાથે તૈયારીઓ પણ જોવા મળી રહી છે.

આજે નવલી નવરાત્રિનું સાતમું નોરતું છે. આજના પવિત્ર દિવસે નવદુર્ગાના સાતમા સ્વરૂપ એવા મા કાલરાત્રિની વિશેષ પૂજા-અર્ચના અને ભક્તિભાવપૂર્વક આરાધના કરવામાં આવે છે. મા કાલરાત્રિ ભક્તોના તમામ દૂષણો અને નકારાત્મકતાનો નાશ કરનારા દેવી તરીકે પૂજાય છે. ગઇકાલે છઠ્ઠા નોરતે રાજ્યભરમાં ખેલૈયાઓ મન મૂકીને ગરબે ઘૂમ્યા હતા અને મા અંબાના ગરબાની રમઝટ બોલાવી હતી, ત્યારે આજે સાતમા નોરતે પણ ખેલૈયાઓમાં ગરબે ઘૂમવાનો ઉત્સાહ અને ઉમંગ બેવડાયેલો જોવા મળી રહ્યો છે.