Beauty Tips: નવરાત્રીમાં ચહેરો દેખાશે એકદમ ખીલેલો, અત્યારથી રોજ 10 મિનિટ માટે લગાવો આ ફેસપેક

Navratri 2026 Beauty Tips: નવરાત્રીની તૈયારી યુવતીઓ અત્યારથી શરૂ કરી ચૂકી છે. કપડાથી લઈને જ્વેલરી સૌથી ખાસ અને સૌથી અલગ હોય તે માટે ખરીદી પણ શરૂ થઈ ગઈ હશે. પરંતુ આ બધી તૈયારીઓમાં ચહેરાનું ધ્યાન રાખવાનું ભૂલી ન જતા. નવરાત્રી પર કપડાં અને જ્વેલરીનો ઉઠાવ ત્યારે જ વધારે સારો આવશે જ્યારે ચહેરા પર પણ ગ્લો હશે. જો તમે અત્યારથી જ ચહેરા પર આ ફેસપેક લગાડવાનું શરૂ કરશો તો નવરાત્રિના ઉજાગરા પછી પણ ચહેરા પર ગ્લો રહેશે.

નવરાત્રીની ખરીદી કરવા માટે તડકામાં ફર્યા પછી સ્કિન ટેન અને ડલ થઈ જાય છે. સ્કિનનું ટેનિંગ નવરાત્રી પહેલા દૂર કરવા અને ચહેરા પર ગ્લો જાળવી રાખવા માટે એક દેશી ફેસપેક રોજ લગાડી શકો છો. અત્યારથી જ ચહેરા પર દસ મિનિટ લગાડવાનું શરૂ કરી દો. નવરાત્રી સુધીમાં ચહેરા પર નેચરલ ગ્લો વધી જશે. તમારે ફેશિયલ કરાવવા પાર્લર પણ નહીં જવું પડે.

આ દેશી ફેસપેક નો ફાયદો એ છે કે તેમાં નેચરલ વસ્તુઓનું જ ઉપયોગ કરવાનો છે અને તેને ચહેરા પર રોજ પણ લગાડી શકો છો. તો ચાલો જાણીએ નવરાત્રી પર ચહેરા પર ઇન્સ્ટન્ટ ગ્લો લાવે તેવો ફેસપેક કેવી રીતે બનાવવો.

ફેસપેક માટેની સામગ્રી

ચણાનો લોટ, હળદર, ચંદન, મધ, કેસર, ગુલાબજળ અથવા કાચું દૂધ

ફેસપેક બનાવવાની રીત

એક વાટકીમાં બે ચમચી ચણાનો લોટ લેવો અને તેમાં એક ચમચી ચંદન પાઉડર અને ચપટી હળદર ઉમેરો. જો તમારી સ્કિન ઓઇલી હોય તો ફેસપેકમાં ગુલાબજળ ઉમેરો અને જો સ્કીન ડ્રાય હોય તો કાચું દૂધ ઉમેરો. ફેસપેકમાં દૂધ અથવા ગુલાબજળ ઉમેર્યા પછી બધી જ સામગ્રીને મિક્સ કરી ઘટ્ટ પેસ્ટ બનાવો. આ પેસ્ટમાં મધ અને કેસરના તાંતણા ઉમેરો. 5 થી 10 મિનિટ ફેસ પેકને રેસ્ટ આપો.

ચહેરાને બરાબર સાફ કર્યા પછી ચહેરા અને ગરદન પર તૈયાર કરેલી પેસ્ટ સારી રીતે લગાવો. 10 થી 15 મિનિટ માટે ફેસ પેકને ચહેરા પર લગાવી રાખો અને ત્યાર પછી ચહેરા પર 1 મિનિટ માટે હળવા હાથે મસાજ કરો. છેલ્લે ઠંડા પાણીથી ચહેરો સાફ કરી લો.

આમ તો આ ફેસપેકને તમે રોજ પણ લગાડી શકો છો પરંતુ રોજ સમય ન મળે તો સપ્તાહમાં બે થી ત્રણ વખત આ ફેસપેક અચૂક લગાવો. ચણાનો લોટ, ચંદન જેવી વસ્તુથી બનેલું આ ફેસ પેક ચહેરા પર ગ્લો વધારશે અને સ્કીનનું ટેક્સચર સુધારશે. ફેસપેક માં રહેલું ચંદન અને હળદર સ્કિનની રંગત નિખારવામાં પણ મદદ કરશે.

(Disclaimer: અહીં આપેલી માહિતી અને ઘરગથ્થુ ઉપચાર સામાન્ય માહિતી પર આધારિત છે. તેને અપનાવતા પહેલા તબીબી સલાહ લેવી જોઈએ. ZEE24kalak તેની પુષ્ટિ કરતું નથી.)