ડોક્ટર બનવાનું સપનું તૂટ્યું, પણ હાર ન માની, કોચિંગ વગર 2 વખત UPSC ક્રેક કરી IAS બની આયુષી

UPSC Success Story : યુનિયન પબ્લિક સર્વિસ કમિશન (UPSC)ની સિવિલ સર્વિસીસ પરીક્ષા દેશની સૌથી કઠિન પરીક્ષાઓમાંની એક માનવામાં આવે છે. ઘણા ઉમેદવારો મોટી કોચિંગ સંસ્થાઓમાં વર્ષો સુધી તૈયારી કરે છે અને મોટી ફી ચૂકવે છે, તેમ છતાં ઘણા લોકોને સફળતા મળતી નથી. આ પરિસ્થિતિ વચ્ચે ઓડિશાના મયુરભંજ જિલ્લાના બારીપદાની રહેવાસી આયુષી પ્રધાને કોઈપણ કોચિંગ સંસ્થાની મદદ લીધા વિના માત્ર સ્વ-અભ્યાસ અને દ્રઢ નિશ્ચયના જોરે ઓલ ઈન્ડિયા રેન્ક-36 મેળવીને સૌને ચોંકાવી દીધા છે.

NEETમાં નિષ્ફળતા બાદ જીવનની દિશા બદલી

મધ્યમ વર્ગ પરિવારમાંથી આવતી આયુષીએ તેનું શરૂઆતનું શિક્ષણ ભુવનેશ્વરમાં પૂર્ણ કર્યું. ધોરણ 12 પછી તેણે ડોક્ટર બનવાની ઈચ્છા સાથે NEET પરીક્ષા આપી હતી, પરંતુ તેમાં સફળતા મળી નહોતી. શરૂઆતના આ ઝડકાથી નિરાશ થવાને બદલે તેણે કમ્પ્યુટર સાયન્સમાં B.Tech કર્યું અને ત્યારબાદ MBAની ડિગ્રી મેળવી.

MBA પૂર્ણ કર્યા પછી તેને એક પ્રતિષ્ઠિત ખાનગી કંપનીમાં નોકરી મળી. જોકે, તેની માતા સાથે એક ગામમાં NGOમાં કામ કરતી વખતે ગ્રામીણ વિસ્તારોમાં લોકોને પડકારોનો સામનો કરતા જોઈને તેનો દ્રષ્ટિકોણ બદલાઈ ગયો. તેને સમજાયું કે સમાજમાં પાયાના સ્તરે પરિવર્તન લાવવા માટે સિવિલ સર્વિસીસમાં જોડાવું એ શ્રેષ્ઠ માર્ગ છે. પરિણામે તેણે પોતાની કોર્પોરેટ નોકરી છોડી દીધી અને UPSC પરીક્ષાની તૈયારી શરૂ કરી.

સ્વ-અભ્યાસ અને સતત પ્રયાસો દ્વારા સફળતા હાંસલ કરી

આયુષીએ કોઈ મોંઘા કોચિંગ સેન્ટરમાં પ્રવેશ લીધો નહોતો. તેણે જાતે અભ્યાસક્રમ સમજ્યો અને તૈયાર કર્યો, સંદર્ભ પુસ્તકો પસંદ કર્યા અને ઇન્ટરનેટ તથા મોક ટેસ્ટનો અસરકારક રીતે ઉપયોગ કરીને પોતાની રણનીતિ બનાવી.

પ્રથમ પ્રયાસ: તેણે તેના પ્રથમ પ્રયાસમાં જ પ્રિલિમ્સ અને મેઈન્સ પરીક્ષા પાસ કરી લીધી હતી, પરંતુ ઇન્ટરવ્યુના તબક્કે માત્ર 13 ગુણના તફાવતને કારણે અંતિમ પસંદગીમાં રહી ગઈ હતી.

બીજો પ્રયાસ: હિંમત હાર્યા વિના તેણે બીજો પ્રયાસ આપ્યો અને 'ઓલ ઈન્ડિયા રેન્ક 334' મેળવ્યો, જેનાથી તેને IDES (ઇન્ડિયન ડિફેન્સ એસ્ટેટ્સ સર્વિસ)માં સ્થાન મળ્યું.

ત્રીજો પ્રયાસ (IAS): IDESમાં ફરજ બજાવતી વખતે તેણે તેનો અભ્યાસ ચાલુ રાખ્યો અને 2023માં પોતાના ત્રીજા પ્રયાસમાં ઓલ ઈન્ડિયા રેન્ક 36 મેળવીને IAS અધિકારી બનવાનું પોતાનું સ્વપ્ન સાકાર કર્યું. માત્ર 26 વર્ષની વયે આયુષી પ્રધાને બે વાર પડકારજનક UPSC પરીક્ષા પાસ કરીને પોતાની ક્ષમતા સાબિત કરી છે.

IAS આયુષી પ્રધાનના લગ્ન 2022ની બેચના UPSC અધિકારી સૌવિક સાથે થયા છે. તેમના પતિ IDES અધિકારી તરીકે ફરજ બજાવે છે.

વિદ્યાર્થીઓ માટે એક બોધપાઠ

આયુષી પ્રધાનની સફળતા દર્શાવે છે કે નિષ્ફળતાઓ માત્ર સીમાચિહ્નો છે, અંતિમ મુકામ નથી. યોગ્ય દિશા, શિસ્તબદ્ધ સ્વ-અભ્યાસ અને અડગ આત્મવિશ્વાસ સાથે કોઈપણ મોટા લક્ષ્યને હાંસલ કરી શકાય છે, ભલે તે માટે કોઈ કોચિંગ ન લીધું હોય, તો પણ સફળતા મેળવી શકાય છે.