બારૂદના ઢગલા પર પશ્ચિમ એશિયા: સાઉદી અને હૂથીઓ વચ્ચે લાલ સાગરમાં આર-પારનો જંગ!, જાણો કેમ બન્યા મરણિયા

Bab el-Mandeb : પશ્ચિમ એશિયા એકવાર ફરી યુદ્ધની સ્થિતિમાં ધકેલાયું છે. યમનની ધરતી પર છેડાયેલો જંગ રોકાવાના બદલે વધુ ઘાતક બનતો જઈ રહ્યો છે. સાઉદી અરેબિયા અને યમનના વિદ્રોહી જૂથ હૂથી વચ્ચે વર્ચસ્વની આ લડાઈ હવે એ ખતરનાક મોડ પર પહોંચી ચૂકી છે જ્યાં બંને પક્ષો એકબીજાને નેસ્તનાબૂદ કરવા માટે મરણિયા બન્યાં છે.

• સાઉદી-હૂતી વચ્ચે હવે આર-પારની લડાઈ!
• હૂતીનો સાઉદી પર ભીષણ મિસાઈલ હુમલો
• રિયાધ પર હૂતીનો હુમલો, સાઉદીનો પલટવાર
• બાબ અલ-મંદેબને મુક્ત કરાવવાની જંગ
• લાલ સાગરમાં ખુની મહાયુદ્ધનું એલાન?

 સાઉદી અરેબિયાની આર્થિક કરોડરજ્જુ નિશાના પર

સપ્ટેમ્બર મહિનાથી સળગી રહેલો આ જંગ હવે વધુ ભયાનક બની ગઈ છે. એક તરફ હૂથી વિદ્રોહીઓ સાઉદી અરેબિયાની આર્થિક કરોડરજ્જુ એટલે કે તેલ રિફાઇનરીઓ અને રાજધાની રિયાધને નિશાન બનાવી રહ્યા છે, તો બીજી તરફ સાઉદી સમર્થિત યમની સરકારી દળોએ પણ હવે આર-પારના મૂડમાં મોટું જમીની અને હવાઈ અભિયાન છેડી દીધું છે.

હૂથી વિદ્રોહીઓએ લાલ સાગરના કિનારે આવેલા બંદરગાહ શહેર મોચા અને વ્યૂહાત્મક રીતે અત્યંત મહત્વપૂર્ણ મય્યુન દ્વીપ પર કબ્જો કરીને પોતાની તાકાતનો પરચો બતાવ્યો. આના જવાબમાં જ્યારે દબાણ વધ્યું ત્યારે હૂથીઓએ સીધા સાઉદી અરેબિયાની રાજધાની રિયાધને ધ્રુજાવવાનો પ્રયાસ કર્યો.

હાલમાં જ હૂથી વિદ્રોહીઓએ દાવો કર્યો કે તેમણે સાઉદી અરેબિયાની ઉર્જા ક્ષેત્રની દિગ્ગજ કંપની અરામકોની ફેસિલિટી પર બેલેસ્ટિક મિસાઈલો અને ડ્રોનથી ભીષણ હુમલો કર્યો છે. આ હુમલા યમન પર વધારવામાં આવેલા સાઉદી હવાઈ હુમલાનો સીધો જવાબ છે. છેલ્લા કેટલાક દિવસોમાં યમનના અલગ-અલગ ભાગો પર 60થી વધુ હવાઈ અને મિસાઈલ હુમલા નોંધાયા છે.

“યમનની સેનાએ સર્વશક્તિમાન ઈશ્વરની મદદથી, અનેક બેલેસ્ટિક મિસાઈલો અને ડ્રોનનો ઉપયોગ કરીને બે મોટા સૈન્ય ઓપરેશન કર્યા. પહેલો હુમલો સાઉદી દુશ્મનની રાજધાની રિયાધમાં અરામકોને નિશાન બનાવીને કરવામાં આવ્યો, જ્યારે બીજો હુમલો ખુરૈસ વિસ્તારમાં અરામકો પર કરવામાં આવ્યો. સર્વશક્તિમાન ઈશ્વરની કૃપાથી, બંને ઓપરેશન પોતાના મકસદમાં સફળ રહ્યા. ઈશ્વરની કૃપાથી હુમલા સચોટ રહ્યા અને જે જગ્યાઓને નિશાન બનાવવામાં આવી હતી, ત્યાં ભીષણ આગ લાગી ગઈ.” - યાહ્યા સારેઆ, હુતી લશ્કરી પ્રવક્તા

સાઉદી અરેબિયાની વાયુસેનાનું મજબૂત સમર્થન 
બીજી તરફ યમનની સરકારી સેનાએ હજારો જમીની સૈનિકો સાથે દક્ષિણ-પશ્ચિમના અત્યંત મહત્વપૂર્ણ વ્યૂહાત્મક વિસ્તાર તૈજ પર ફરીથી કબ્જો કરવા માટે મોટું જમીની અભિયાન શરૂ કરી દીધું છે. આ ઓપરેશનને સાઉદી અરેબિયાની વાયુસેનાનું મજબૂત સમર્થન પ્રાપ્ત છે.

સાઉદી લડાકુ વિમાનોએ હૂથીઓના મુખ્ય ગઢ સના પર તાબડતોડ હવાઈ હુમલા કર્યા છે. હુમલા દરમિયાન થયેલા વિસ્ફોટોથી ધરતી ધ્રુજી ઊઠી. જોકે આ હુમલાઓમાં મોત કે ઈજાગ્રસ્તોનો સત્તાવાર આંકડો હજુ સામે આવ્યો નથી, પરંતુ આ હુમલા બતાવી રહ્યા છે કે આવનારા દિવસો વધુ લોહિયાળ બનવાના છે...

• આ આખા સૈન્ય અભિયાનનું સૌથી મોટું અને વ્યૂહાત્મક કેન્દ્ર છે બાબ અલ-મંદેબ...
• આ એ સાંકડો સમુદ્રી માર્ગ છે જે લાલ સાગરને એડનની ખાડી અને હિંદ મહાસાગર સાથે જોડે છે...
• એશિયાને યુરોપ સાથે જોડતા આ માર્ગ પરથી દરરોજ દુનિયાભરનો અબજો ડોલરનો વેપાર અને સાઉદી અરેબિયાની મુખ્ય તેલ નિકાસ પસાર થાય છે...

અલ-મંદેબ પર હૂથીઓના વધતા પ્રભાવને ખતમ કરવાનો પ્રયાસ

યમનની સરકારી સેના અને સાઉદી ગઠબંધન બાબ અલ-મંદેબ પર હૂથીઓના વધતા પ્રભાવને ખતમ કરવા માટે એડીચોટીનું જોર લગાવી રહ્યા છે. જો આ માર્ગ હૂથીઓના કંટ્રોલમાં રહે છે, તો વૈશ્વિક ઉર્જા પુરવઠા અને આંતરરાષ્ટ્રીય વેપાર પર સંકટના વાદળો ઘેરાઈ શકે છે.

લાલ સાગરમાં વધતા તણાવ વચ્ચે હવે આ જંગ વધુ મોટા ક્ષેત્રમાં ફેલાતો જોવા મળી રહ્યો છે. રિયાધમાં યોજાયેલી મક્કા સંરક્ષણ સમજૂતીની ઈમરજન્સી મીટિંગમાં એક મોટો મોડ આવ્યો છે. આ બેઠકમાં સાઉદી અરેબિયા, પાકિસ્તાન અને તુર્કીયે સામૂહિક સંરક્ષણ વ્યવસ્થાને સક્રિય કરતા સાઉદી અરેબિયાની સુરક્ષા માટે પોતાના સૈન્ય દળોની ઝડપી તૈનાતી પર સંમતિ દર્શાવી દીધી છે.

માત્ર યમનનો આંતરિક મામલો નથી 

યાદ અપાવી દઈએ કે સપ્ટેમ્બરમાં પાકિસ્તાને વિદેશી ધરતી પર યુદ્ધમાં સામેલ થવાનો ઈનકાર કરી દીધો હતો, પરંતુ હવે આ નવી સંરક્ષણ સમજૂતી પછી પશ્ચિમ એશિયાનું ભૌગોલિક-રાજકીય સમીકરણ સંપૂર્ણપણે બદલાતું દેખાઈ રહ્યું છે. એ જ કારણ છે કે આ મોરચાની લડાઈ માત્ર યમનનો આંતરિક મામલો નથી રહી ગઈ પરંતુ આ આખી ગ્લોબલ ઈકોનોમી માટે ચિંતાનો વિષય બની ગઈ છે...