સુરતના ડીડોલી કેનાલમાં 10 દિવસની ભક્તિ બાદ બાપ્પાની આવી હાલત! 2500થી વધુ ગણેશ મૂર્તિઓને સમિતિએ આપ્યું સન્માન
Surat News: ગણેશ ઉત્સવ દરમિયાન જે વિઘ્નહર્તા દેવની 10 થી 12 દિવસ સુધી અત્યંત ભક્તિભાવ પૂર્વક પૂજા-અર્ચના, આરતી અને સેવા કરવામાં આવી હતી, તે જ બાપ્પાની મૂર્તિઓ ઉત્સવ પૂર્ણ થતાં કેટલાક લોકો કેનલમાં કે રોડ કિનારે બિનવારસી અને રજડતી હાલતમાં મૂકીને ચાલ્યા ગયા હતા.
પ્રશાંત ઢીવરે/સુરત: ગણેશ ઉત્સવ પૂર્ણ થયા બાદ ભક્તિભાવથી પૂજાયેલી બાપ્પાની કેટલીક મૂર્તિઓ કેનલ અને રોડ કિનારે બિનવારસી હાલતમાં જોવા મળતાં ‘સાંસ્કૃતિક રક્ષા સમિતિ’ વહારે આવી હતી. સમિતિના કાર્યકરોએ ડીંડોલી કેનલ તથા આસપાસના વિસ્તારમાંથી 2500થી વધુ ગણેશ મૂર્તિઓ આદરપૂર્વક બહાર કાઢી હતી.
મૂર્તિઓનું શાસ્ત્રોક્ત વિધિ-વિધાન સાથે સન્માનપૂર્વક વિસર્જન કરવાની પ્રક્રિયા હાથ ધરવામાં આવશે. SMC અને તંત્ર દ્વારા કૃત્રિમ તળાવો સહિતની વ્યવસ્થા કરાઈ હોવા છતાં આવી બેદરકારી સામે આવતાં ચિંતા વ્યક્ત થઈ રહી છે, જ્યારે સમિતિની કામગીરીને સ્થાનિકો દ્વારા બિરદાવવામાં આવી રહી છે.
ભગવાન ગણેશજીની મૂર્તિઓની ગરિમા જાળવવા અને ભક્તોની આસ્થાનું અપમાન થતું અટકાવવા માટે 'સાંસ્કૃતિક રક્ષા સમિતિ' તાત્કાલિક વહારે આવી હતી. સમિતિના કાર્યકરોએ ભારે જહેમત ઉઠાવીને ડીંડોલી કેનલ અને આસપાસના વિસ્તારમાંથી અંદાજે 2500 થી વધુ ગણેશજીની મૂર્તિઓને અત્યંત આદર અને સન્માનપૂર્વક બહાર કાઢી હતી. આ તમામ મૂર્તિઓનું સમિતિ દ્વારા આગામી સમયમાં શાસ્ત્રોક્ત વિધિ-વિધાન અને સંપૂર્ણ આદર સાથે યોગ્ય જગ્યાએ વિસર્જન કરવામાં આવશે.
અહીં નોંધનીય બાબત એ છે કે સુરત મહાનગરપાલિકા (SMC) અને સ્થાનિક વહીવટી તંત્ર દ્વારા પર્યાવરણની સુરક્ષા માટે કૃત્રિમ તળાવો સહિતની પૂરતી વ્યવસ્થાઓ કરવામાં આવી હોવા છતાં, કેટલાક લોકોની આવી ગંભીર બેદરકારી સામે આવી છે. તંત્રની અપીલ છતાં મૂર્તિઓને આ પ્રકારે બિનવારસી હાલતમાં છોડી દેવી એ ચિંતાનો વિષય બન્યો છે. ત્યારે સાંસ્કૃતિક રક્ષા સમિતિની આ કામગીરીને સ્થાનિકો વતી વ્યાપક બિરદાવવામાં આવી રહી છે.
