મહાભારત કાળની પરંપરા આધુનિક યુગમાં આજે પણ જીવંત: દ્વારકાના શિવરાજપુરમાં યોજાયો ઐતિહાસિક મલ કુસ્તી મેળો
Dwarka News: મહાભારત કાળની પરંપરા આધુનિક યુગમાં પણ જીવંત રહી છે. દ્વારકાના શિવરાજપુર ગામે ભાદરવી પૂનમે 400 વર્ષ જૂનો મલ કુસ્તી મેળો જામ્યો છે. શિવરાજપુર ગામે ભવ્ય મલ કુસ્તી મેળો યોજાયો છે.
Dwarka News: દેવભૂમિ દ્વારકાના શિવરાજપુર ગામે ભાદરવી પૂનમના પાવન પર્વે હજરત જાકૂપીર દાદાની દરગાહ ખાતે 400 વર્ષથી વધુ જૂની પરંપરાગત મલ કુસ્તી સ્પર્ધા યોજાઈ હતી. હિન્દુ-મુસ્લિમ એકતાના પ્રતીક સમાન આ મેળામાં ઓખામંડળ, બારાડી અને બરડા પંથકમાંથી 300 થી વધુ કુસ્તીબાજોએ ઉત્સાહભેર ભાગ લીધો હતો.
મહાભારત કાળની આ સદીઓ જૂની પરંપરામાં મલ્લવીરોએ પોતાની અદ્ભુત કળા, શારીરિક તાકાત અને ટેકનિકનું પ્રદર્શન કર્યું હતું. મેદાનમાં જ્યારે બે કુસ્તીબાજો આમને-સામને ઉતરે છે, ત્યારે ચપળતાથી હરીફને પછાડવાના દાવપેચ જોઈને ઉપસ્થિત દર્શકોમાં રોમાંચ અને ઉત્સાહ બેવડાઈ જાય છે.
પ્રાચીન સમયમાં રાજા-મહારાજાઓ યુવાનોને શારીરિક કસરત તરફ પ્રોત્સાહિત કરવા આવા મેળાઓ યોજતા હતા. જ્યાં ઉત્કૃષ્ટ પ્રદર્શન કરનારને સૈનિક કે સેનાપતિ જેવા હોદ્દા અપાતા હતા. આ જ ઐતિહાસિક પરંપરાને આજે પણ અહીં જીવંત રાખવામાં આવી રહી છે.
આધુનિક યુગમાં યુવાનોને મોબાઈલ અને ઓનલાઈન ગેમ્સથી દૂર રાખી મેદાન સાથે જોડીને તંદુરસ્ત જીવનશૈલી અપનાવવાનો સંદેશ આપતા આ રોમાંચક મુકાબલાને નિહાળવા માટે હજારોની સંખ્યામાં લોકો ઉમટી પડ્યા હતા અને આ મેળો મુખ્ય આકર્ષણ બન્યો હતો.
