Gujarat Breaking News Live: ગુજરાત સહિત દેશ-વિદેશમાં અનેક મોટી ઘટનાઓ બની રહી છે, જેમાં સરકારના નિર્ણયો, રાજકીય પાર્ટીઓના નિવેદનો, દેશના લોકોને અસર કરતા મુદ્દાઓ, અકસ્માતો, હવામાનના સમાચાર અને અન્ય મહત્વપૂર્ણ ઘટનાઓ તેમજ લેટેસ્ટ સમાચાર અને બ્રેકિંગ અપડેટ્સ માટે Zee 24 Kalak Gujarati સાથે જોડાયેલા રહો..
દાહોદના દેવગઢ બારિયાથી મોટા સમાચાર સામે આવ્યા છે. અહીં ભાજપને મોટો ઝટકો લાગ્યો છે. દેવગઢ બારિયા ભાજપના પ્રમુખ હરેશભાઈ કરણસિંહના પિતા કરણ મામા કોંગ્રેસમાં જોડાયા છે. કોંગ્રેસ જિલ્લા પ્રમુખની હાજરીમાં તેમણે કોંગ્રેસનો ખેસ પહેર્યો છે. ભાજપના પાયાના નેતા તરીકે ઓળખાતા કરણ મામા પૂર્વ તાલુકા પ્રમુખ રહી ચૂક્યા છે. છએલ્લા 30 વર્ષથી ખજૂરી ગામના સરપંચ તરીકે જવાબદારી સંભાળી રહ્યાં છે. હવે પુત્ર ભાજપમાં અને પિતા કોંગ્રેસમાં જોડાયા છે.
આમ આદમી પાર્ટીના રાષ્ટ્રીય સંયોજક અને દિલ્હીના પૂર્વ મુખ્યમંત્રી અરવિંદ કેજરીવાલ અને તેમની પુત્રી હર્ષિતા કેજરીવાલને જાનથી મારી નાખવાની ધમકી મળી છે. આ ધમકી લોરેન્સ બિશ્નોઈ ગેંગના નામ પર આપવામાં આવી છે. આ સાથે સાત કરોડની ખંડણી માગવામાં આવી છે. દિલ્હીના તિલક નગરના ધારાસભ્ય જરનૈલ સિંહને ધમકીભર્યા ફોન કોલ અને વોટ્સએપ પર મેસેજ મળ્યો છે. ત્યારબાદ તેમણે મોહાલી પોલીસમાં ફરિયાદ દાખલ કરાવી છે.
યુપી વિધાનસભા ચૂંટણી 2027 પહેલા નવા ગઠબંધનની જાહેરાત થઈ ગઈ છે. AIMIM પ્રમુખ અસદુદ્દીન ઓવૈસી અને આઝાદ સમાજ પાર્ટીના અધ્યક્ષ ચંદ્રશેખર આઝાદે સાથે આવી સામાજિક પરિવર્તન મોર્ચો બનાવવાની જાહેરાત કરી છે. બંને નેતાઓએ તેને ભાજપ વિરુદ્ધ મજબૂત વિકલ્પ ગણાવ્યો છે. અસદુદ્દીન ઓવૌસીએ ચંદ્રશેખર આઝાદને ઉત્તર પ્રદેશમાં મુખ્યમંત્રી પદનો ચહેરો જાહેર કર્યો છે. તેમણે જણાવ્યું કે ભાજપને રોકવા માટે સામાજિક પરિવર્તન મોર્ચો મજબૂત વિકલ્પ બનશે. અત્યાર સુધી તેમના સમાજના લોકોનો માત્ર મતના રૂપમાં ઉપયોગ કરવામાં આવ્યો છે. તેમનો પ્રયાસ આ મોર્ચાને મજબૂત બનાવવાનો હશે.
ભાવનગરના સિંહોરમાં અકસ્માતમાં એક યુવકનું મોત થયું છે. એસટી બસ અને બાઇક વચ્ચે અકસ્માત સર્જાયો છે. અકસ્માતમાં અમિત નામના યુવકનું મોત થયું છે. સિંહોર પોલીસે મૃતદેહને પોસ્ટમોર્ટમ માટે મોકલી આપ્યો છે અને તપાસ હાથ ધરી છે.
અમદાવાદ-ભાવનગર નેશનલ હાઈવે પર અકસ્માત સર્જાયો છે. ગમખ્વાર અકસ્માતમાં બે લોકોના મોત થયા છે, જ્યારે ત્રણ લોકોને ઈજા પહોંચી છે. અમદાવાદના પરિવારને આ અકસ્માત નડ્યો છે. અકસ્માત એટલો ભીષણ હતો કે ઘટનાસ્થળે બે લોકોના મોત થયા છે.
સુરત શહેરમાં બીજા માળેથી નીચે પડી જતાં બે વર્ષના બાળકીનું મોત થયું છે. ડીંડોલીમાં નવનિર્મિત બાંધકામ સાઇડ પર બાળકીના માતા-પિતા કામ કરી રહ્યાં હતા. આ દરમિયાન બાળકી બિલ્ડિંગના બીજા માળે રમી રહી હતી. બીજા માળેથી પડી જતાં બાળકીનું મોત થયું છે.
રાજ્ય સરકાર દ્વારા 18 નવેમ્બર સુધી બીરસા મુંડા જયંતીની ઉજવણી કરવામાં આવશે. આદિવાસી વિસ્તારમાં ચૂંટણી પહેલા સરકાર જોર લગાવશે. આદિવાસી જિલ્લાની દરેક વિધાનસભામાં કાર્યક્રમનું આયોજન થશે. 15 નવેમ્બરે જનજાતિ ગૌરવ દિવસની ઉજવણી કરાશે. 14 આદિવાસી જિલ્લાઓની 55 વિધાનસભા બેઠકો પર 49 કાર્યક્રમ યોજાશે. આદિવાસી જિલ્લાઓમાં જોહાર કેફે શરૂ કરાશે.
રાજ્યભરની સરકારી કચેરીઓમાં ચાર દિવસની દિવાળીની રજાઓ પૂર્ણ થઈ ગઈ છે. આજથી સરકારી કચેરીઓ રાબેતા મુજબ શરૂ થઈ ગઈ છે.
જમ્મુ-કાશ્મીરના કિશ્તવાડ જિલ્લામાં બુધવારે લાપતા બે વિશેષ પોલીસ અધિકારીઓ (એસપીઓ) ના મૃતદેહ મળવાથી સુરક્ષા એજન્સીઓમાં હડકંપ મચી ગયો છે. બંનેના મૃતદેહ ગોળીઓથી વિંધેલી હાલતમાં મળી આવ્યા છે. ખાસ વાત છે કે તેમના સર્વિસ હથિયાર ઘટનાસ્થળેથી મળ્યા નથી. આ ઘટનામાં આતંકીઓની સંડોવણીની આશંકા વ્યક્ત કરવામાં આવી રહી છે. જોકે અધિકારીઓએ હજુ આતંકી હુમલાની પુષ્ટિ કરી નથી.
ભરૂચના ઔતિહાસિક ગોલ્ડન બ્રિજની નીચે દારૂનું વેચાણ થવું હોવાનો વીડિયો સોશિયલ મીડિયામાં વાયરલ થયો છે. વાયરલ વીડિયો મામલે સ્થાનિક લોકો વચ્ચે બોલાચાલી અને ગાળા-ગાળીના દ્રશ્યો સામે આવ્યા છે. ગોલ્ડન બ્રિજ નજીક પોલીસ ચોકી હોવા છતાં ત્યાં ગેરકાયદેસર દારૂનું વેચાણ થતાં અનેક સવાલો ઉભા થયા છે.
નવસારી જિલ્લાના વાસંદા તાલુકામાં દીપડાએ બાળકને શિકાર બનાવવાનો પ્રયાસ કર્યો છે. સરા ગામમાં 7 વર્ષીય બાળક પર દીપડાએ હુમલો કર્યો છે. દીપડાએ બાળકને ખેંચવાનો પ્રયાસ કર્યો હતો. દીપડાના હુમલા બાદ બાળકને સારવાર માટે ખસેડવામાં આવ્યો છે.
અમૂલ દ્વારા આજથી દૂધના ભાવમાં વધારો ઝીંકવામાં આવ્યો છે. અમૂલ ગોલ્ડના ભાવમાં 4 રૂપિયા પ્રતિ લીટરનો વધારો થયો છે. અમૂલ ગોલ્ડનો નવો ભાવ 74 રૂપિયા પ્રતિ લીટર થઈ ગયો છે. અમૂલ દ્વારા તાજેતરમાં ઘી અને બટરના ભાવ પણ વધારવામાં આવ્યા હતા. અમૂલના ભાવ વધારાથી લોકોમાં નારાજગી જોવા મળી છે. આજે અમૂલ સ્ટોર પર દૂધ લેવા પહોંચેલા લોકોએ ઝી 24 કલાકને જણાવ્યું કે અમૂલ મનસ્વી રીતે ભાવ વધારો લાગૂ કરે છે. અન્ય વિકલ્પ ન હોવાથી ફરજીયાત અમૂલનું દૂધ લેવું પડે છે.
