Gujarat News Live: આજથી વિક્રમ સંવત 2083ની શરૂઆત, સોના-ચાંદીના ભાવમાં ફરી ભાવ વધારો, PM મોદીએ યુક્રેનના રાષ્ટ્રપતિ સાથે કરી વાતચીત

રાજ્યના નિકાસ ક્ષેત્રને નવી ઊંચાઈઓ પર લઈ જવા માટે ગુજરાત સરકારે એક અત્યંત મહત્વપૂર્ણ નિર્ણય લીધો છે. ઉદ્યોગ અને ખાણ વિભાગ હેઠળ ગાંધીનગર ખાતે મુખ્ય કાર્યાલય ધરાવતી સંપૂર્ણપણે રાજ્ય સરકારની માલિકીની 'ગુજરાત એક્સપોર્ટ પ્રમોશન કાઉન્સિલ' ની સત્તાવાર સ્થાપના કરવામાં આવી છે. મુખ્ય સચિવની અધ્યક્ષતામાં બનેલું બોર્ડ ઓફ ડિરેક્ટર્સ આ કાઉન્સિલનું સમગ્ર સંચાલન સંભાળશે. આ કાઉન્સિલ દ્વારા રાજ્યના MSME, સ્ટાર્ટઅપ્સ અને સ્થાનિક ઉદ્યોગોને આંતરરાષ્ટ્રીય બજારમાં પહોંચવામાં મદદ કરવામાં આવશે. આ ઉપરાંત, દરેક જિલ્લામાં નિકાસ વધારવા માટે 'ડિસ્ટ્રિક્ટ એક્સપોર્ટ પ્રમોશન પ્લાન' તૈયાર કરાશે, જેથી ગુજરાતની પ્રોડક્ટ્સને ગ્લોબલ બ્રાન્ડ બનાવી શકાય અને આયાત પરની નિર્ભરતા ઘટાડી શકાય.

દિવાળીના તહેવાર દરમિયાન સુરત શહેરમાં સફાઈ જાળવવી સુરત મહાનગરપાલિકા માટે મોટો પડકાર બની રહી હતી. દિવાળીના એક જ દિવસમાં શહેરમાંથી કુલ ૩,૫૬૯ મેટ્રિક ટન કચરો નીકળ્યો હતો, જે સામાન્ય દિવસોની સરખામણીએ ૭૫૯ મેટ્રિક ટન વધુ છે. આ પરિસ્થિતિને પહોંચી વળવા માટે મનપા દ્વારા રાત્રી દરમિયાન પણ વિશેષ સફાઈ કર્મચારીઓની ટીમ તૈનાત કરવામાં આવી હતી. કર્મચારીઓની ત્વરિત કામગીરીને કારણે ગણતરીના કલાકોમાં જ શહેરના તમામ મુખ્ય રોડ-રસ્તા સાફ કરીને ચમકાવી દેવામાં આવ્યા હતા.

કચ્છના ભુજ તાલુકાના નારાણપર નજીક કાર અને બાઇક વચ્ચે સર્જાયેલા ગંભીર અકસ્માતમાં ૨ લોકોના કરૂણ મોત નીપજ્યા છે, જ્યારે ૧ વ્યક્તિ ઈજાગ્રસ્ત થયો છે. આ ઘટનાને પગલે સ્થાનિક લોકો અને સમાજમાં ભારે રોષ વ્યાપી ગયો હતો અને મામલો તંગ બન્યો હતો. ઉશ્કેરાયેલા ટોળાએ અકસ્માત સર્જનાર કારમાં આગ ચાંપી દેતાં કાર બળીને ખાખ થઈ ગઈ હતી. બનાવની જાણ થતાં જ માનકુવા પોલીસે તાત્કાલિક ઘટનાસ્થળે પહોંચીને પરિસ્થિતિ થાળે પાડી હતી અને મૃતદેહોને હોસ્પિટલ ખસેડ્યા હતા. પોલીસે અકસ્માત સર્જનાર કાર ચાલકની અટકાયત (રાઉન્ડઅપ) કરીને આગળની કાનૂની તપાસ હાથ ધરી છે.

નવા વર્ષની શરૂઆત ભક્તોએ મા ખોડલના ચરણોમાં શીશ ઝુકાવીને કરી હતી. રાજકોટ જિલ્લાના કાગવડ ખાતે આવેલા વિશ્વપ્રસિદ્ધ શ્રી ખોડલધામ મંદિરે વહેલી સવારથી જ ભક્તોનું ઘોડાપૂર ઉમટી પડ્યું હતું. નવા વર્ષના પ્રથમ દિવસે માતાજીના દર્શન કરી ભક્તોએ ધન્યતા અનુભવી હતી,એટલું જ નહીં, આધ્યાત્મિક ગુરુ શ્રી શ્રી રવિશંકરજીએ પણ ખોડલધામ મંદિરે પધારી મા ખોડલના દર્શન કર્યા હતા, જ્યાં તેમનું ભવ્ય સ્વાગત કરવામાં આવ્યું હતું,.....

નવા વર્ષના પ્રથમ દિવસે વાવ-થરાદ જિલ્લામાં વહેલી સવારથી જ શ્રદ્ધા અને ભક્તિનો ત્રિવેણી સંગમ જોવા મળી રહ્યો છે. લોકો પોતાના નવા વર્ષની મંગલ શરૂઆત મંદિરોમાં દેવદર્શન અને આશીર્વાદ મેળવીને કરી રહ્યા છે. ધરણીધર તાલુકાના ઢીમા ગામે આવેલા સુપ્રસિદ્ધ ભગવાન ધરણીધરના મંદિરે વહેલી સવારથી જ દૂર-દૂરથી આવતા ભક્તોનો ભારે ધસારો જોવા મળ્યો છે, જેના કારણે સમગ્ર મંદિર પરિસર 'જય ધરણીધર'ના નાદથી ગુંજી ઊઠ્યું છે. સામાજિક અગ્રણીઓ, રાજકીય આગેવાનો અને સ્થાનિક નાગરિકો પણ દાદાના દર્શન કરી નવા વર્ષમાં સુખ-શાંતિની પ્રભુ ચરણોમાં પ્રાર્થના કરી રહ્યા છે.

આજથી વિક્રમ સંવત ૨૦૮૩ના નૂતન વર્ષનો પાવન પ્રારંભ થયો છે, ત્યારે મુખ્યમંત્રી ભૂપેન્દ્ર પટેલે અડાલજ ખાતે આવેલ ત્રિમંદિર પહોંચીને દાદા ભગવાનના દર્શન કરી નવા વર્ષની મંગલ શરૂઆત કરી હતી. મુખ્યમંત્રી દર વર્ષે નૂતન વર્ષના શુભ દિવસે ત્રિમંદિર ખાતે શીશ નમાવીને આશીર્વાદ મેળવવાની પરંપરા જાળવી રાખે છે. આ અવસરે તેમણે સમગ્ર ગુજરાત રાજ્યના કલ્યાણ, શાંતિ, સુખ અને ઉત્તરોત્તર સમૃદ્ધિ માટે પ્રભુ ચરણોમાં પ્રાર્થના કરી હતી અને દર્શનાર્થીઓ તથા નાગરિકોને નવા વર્ષની શુભકામનાઓ પાઠવી હતી.

વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ 'X' (ટ્વિટર) પર ખાસ પોસ્ટ શેર કરીને દેશવાસીઓને નવા વર્ષની હાર્દિક શુભકામનાઓ પાઠવી છે. પીએમ મોદીએ લખ્યું, "Happy New Year...!!! નૂતન વર્ષાભિનંદન...!!! નવા વર્ષની શુભ શરૂઆત આપ સૌના જીવનમાં સુખ, શાંતિ, સમૃદ્ધિ અને સ્વાસ્થ્યની નવી આશાઓ લઈને આવે એવી હાર્દિક શુભકામનાઓ." તેમણે વધુમાં ઉમેર્યું હતું કે આપ સૌનું જીવન ઉત્તમ સ્વાસ્થ્ય, આનંદ અને ઉત્સાહથી છલકાય એવી ઈશ્વર ચરણોમાં પ્રાર્થના. વડાપ્રધાનના આ સંદેશથી દેશભરના નાગરિકોમાં નવા વર્ષનો ઉત્સાહ અને આનંદ બેવડાયો છે.

વડાપ્રધાન નરેન્દ્ર મોદીએ યુક્રેનના રાષ્ટ્રપતિ વોલોદિમિર ઝેલેન્સ્કી સાથે ટેલિફોન પર મહત્વપૂર્ણ વાતચીત કરી હતી. આ ચર્ચા દરમિયાન બંને નેતાઓએ યુક્રેનમાં ચાલી રહેલા યુદ્ધની વર્તમાન સ્થિતિ અને તેના પ્રાદેશિક તથા વૈશ્વિક અસરો અંગે વિગતવાર સમીક્ષા કરી હતી. વાતચીત દરમિયાન પીએમ મોદીએ ભારતનું વલણ સ્પષ્ટ કરતાં જણાવ્યું હતું કે કોઈપણ વિવાદનો ઉકેલ માત્ર વાતચીત અને કૂટનીતિ (ડિપ્લોમસી) દ્વારા જ શક્ય છે. તેમણે ઉમેર્યું હતું કે ભારત શાંતિ સ્થાપવાના તમામ પ્રયાસોમાં સક્રિય યોગદાન આપવા માટે હંમેશા તૈયાર છે.

બુલિયન માર્કેટમાં આજે ફરી એકવાર તેજીનો માહોલ જોવા મળ્યો છે, જેના લીધે સોના અને ચાંદીના ભાવ નવી ઐતિહાસિક સપાટીએ પહોંચ્યા છે. સ્થાનિક બજારમાં ૧૦ ગ્રામ સોનાનો ભાવ રૂ. ૧,૪૩,૦૦૦ ને પાર કરી ગયો છે, જ્યારે ૧ કિલો ચાંદીનો ભાવ વધારા સાથે રૂ. ૧,૮૭,૦૦૦ ની સપાટી વટાવી ચૂક્યો છે. વૈશ્વિક પરિબળો અને મજબૂત માંગને કારણે કિંમતી ધાતુઓમાં આવેલી આ જોરદાર તેજીથી રોકાણકારોમાં ઉત્સાહ જોવા મળી રહ્યો છે, જ્યારે ખરીદદારો માટે કિંમતો ચિંતાનો વિષય બની છે.
 

આજથી કારતક સુદ એકમ એટલે કે વિક્રમ સંવત 2083 ની પવિત્ર શરૂઆત થઈ રહી છે. આ નવું વર્ષ આપ સૌના જીવનમાં અઢળક સુખ, સમૃદ્ધિ અને ઉત્તમ સ્વાસ્થ્ય લઈને આવે એવી હાર્દિક શુભકામનાઓ! Z 24 કલાક પરિવાર તરફથી આપ સૌને સાલ મુબારક અને નૂતન વર્ષાભિનંદન. આવો, આ નવા વર્ષે નવા સંકલ્પો સાથે જીવનમાં સકારાત્મકતા અને પ્રગતિનો સંચાર કરીએ.