યુવતી સાથે વાતચીત કરવી ભારે પડી! પંચમહાલમાં કથિત પ્રેમ સંબંધમાં યુવકની હત્યા

જયેન્દ્ર ભોઈ, પંચમહાલ: શહેરા તાલુકાના દલવાડા ગામમાં રહેતા મહેશભાઈ પુનાભાઈ રાઠોડનું તેમના જ ફળિયામાં રહેતા કેટલાક ઈસમો દ્વારા અપહરણ કરી માર મારવામાં આવ્યો હતો. આ મામલે મહેશભાઈના ભાઈ દિનેશભાઈ પુનાભાઈ રાઠોડે 11 નવેમ્બરના રોજ શહેરા પોલીસ મથકે ફરિયાદ નોંધાવી હતી.

ગંભીર રીતે ઘાયલ થયા બાદ સિવિલ ખસેડાયા, સારવાર દરમિયાન મોત

અપહરણ બાદ ગંભીર રીતે ઇજાગ્રસ્ત મહેશભાઈને સારવાર અર્થે પ્રથમ ગોધરા, ત્યારબાદ વડોદરા અને અંતે અમદાવાદ સિવિલ હોસ્પિટલ ખાતે ખસેડવામાં આવ્યા હતા. જોકે, જીવન અને મરણ વચ્ચે ઝોલાં ખાતા મહેશભાઈનું સારવાર દરમિયાન મોત થતા આ બનાવને પગલે શહેરા પોલીસ મથકે અપહરણ અને હત્યાની સંબંધિત કલમો હેઠળ ગુનો નોંધી કાયદેસરની તપાસ હાથ ધરવામાં આવી હતી.

હેવી મશીન ભરેલી ટ્રક લક્ઝરીની પાછળ અથડાતા બસ આગળ જતા ટેન્કરમાં ઘૂસી ગઈ, 10 લોકો ઘાયલ

આરોપીઓને પકડવા માટે સર્ચ ઓપરેશન

બીજી તરફ ગુનાની ગંભીરતાને ધ્યાને લઈ પંચમહાલ પોલીસે એલસીબી સહિત ની અલગ અલગ ટીમો બનાવી આરોપીઓને ઝડપી પાડવા સર્ચ ઓપરેશન હાથ ધર્યું હતું . પોલીસની પ્રાથમિક તપાસમાં સામે આવેલી વિગતો મુજબ, મૃતક મહેશભાઈ પુનાભાઈ રાઠોડ આરોપી અંદરસિંહ ભારતસિંહ ઉર્ફે ભલાભાઈ પટેલની દીકરી સાથે વાતચીત કરતા હોવાની અદાવત રાખવામાં આવી હતી. આ જ અદાવતમાં સમગ્ર બનાવને અંજામ આપવામાં આવ્યો હોવાનું પ્રાથમિક તપાસમાં સામે આવ્યું છે.

જેના પગલે એલસીબી અને એસઓજી અને શહેરા પોલીસની અલગ-અલગ ટીમોએ સંકલિત કામગીરી કરી સંયુક્ત ઓપરેશન હાથ ધર્યું હતું. પોલીસની ઝડપી કામગીરીના પરિણામે કુલ સાત આરોપીઓ પૈકી છ આરોપીઓને ગણતરીના કલાકોમાં જ ઝડપી પાડવામાં સફળતા મળી છે.

નવસારીના GI ટેગ ધરાવતા પ્રખ્યાત ''અમલસાડી ચીકુ''ને કોની નજર લાગી? પાયમાલીના આરે આવી ગયા

6 આરોપીઓ પકડાયા

આ ગુનામાં પોલીસે ઝડપી પાડેલા છ આરોપીઓમાં મુખ્ય આરોપી અંદરસિંહ ભારતસિંહ ઉર્ફે ભલાભાઈ પટેલ, ઉંમર 41 વર્ષ, દિલીપકુમાર અંદરસિંહ પટેલ, ઉંમર 21 વર્ષ, દિવ્યેશભાઈ ગણપતસિંહ પટેલ, ઉંમર 19 વર્ષ, શૈલેષભાઈ ફતેસિંહ પટેલ, ઉંમર 29 વર્ષ, રમેશભાઈ ઉર્ફે મંગળભાઈ પ્રભાતભાઈ, ઉંમર 45 વર્ષ અને હિતેશકુમાર રમેશભાઈ ઉર્ફે મંગળભાઈ, ઉંમર 19 વર્ષનો સમાવેશ થાય છે.આ તમામ આરોપીઓ દલવાડા ગામના કૃષ્ણ ફળિયાના રહેવાસી હોવાનું પોલીસ તપાસમાં સામે આવ્યું છે. જ્યારે આ ગુનામાં સંડોવાયેલ અલ્પેશભાઈ અંદરસિંહ પટેલ નામનો એક આરોપી હજુ ફરાર છે. જેને ઝડપી પાડવા માટે પોલીસે અલગ-અલગ દિશામાં તપાસ અને શોધખોળ તેજ કરી છે.

દલવાડા ગામના યુવકના અપહરણ અને હત્યાના ચકચારી બનાવમાં પંચમહાલ પોલીસની LCB, SOG અને શહેરા પોલીસની સંયુક્ત કામગીરીથી ગણતરીના કલાકોમાં જ છ આરોપીઓની ધરપકડ કરવામાં આવી છે. જોકે, એક આરોપી હજુ પોલીસ પકડથી દૂર છે. સમગ્ર ગુનાની વધુ તપાસ શહેરા પોલીસ મથકના પોલીસ ઇન્સ્પેક્ટર દ્વારા હાથ ધરવામાં આવી રહી છે.