રાધનપુર નગરપાલિકામાં ભાજપમાં વિવાદ: ઉપપ્રમુખના ગંભીર આક્ષેપોથી રાજકારણ ગરમાયું, પ્રમુખના પતિનો હસ્તક્ષેપનો મુદ્દો પણ ઉઠ્યો

પ્રેમલ ત્રિવેદી, પાટણઃ પાટણના રાધનપુરમાં વિકાસના મુદ્દે હવે ભાજપમાં જ આંતરિક ખેંચતાણ સામે આવી છે. ભાજપ શાસિત નગરપાલિકાના ઉપપ્રમુખે જ પાલિકાના વહીવટ સામે સવાલો ઉઠાવ્યા છે. પ્રમુખ અને ઉપપ્રમુખ વચ્ચેના આ વિવાદમાં પ્રમુખના પતિના કથિત હસ્તક્ષેપનો મુદ્દો પણ ઉઠ્યો છે. મામલો સામે આવતા જિલ્લા ભાજપે ડેમેજ કંટ્રોલની કવાયત શરૂ કરી છે. શું છે સમગ્ર મામલો?...જુઓ આ અહેવાલમાં...

આ છે પાટણ જિલ્લાનું રાધનપુર...એક સમયે વેપાર માટે આગવું સ્થાન ધરાવતું રાધનપુર આજે રોડ, ગટર, સફાઈ અને વિકાસના પ્રશ્નો વચ્ચે ઝઝૂમી રહ્યું છે...અને હવે પ્રજાના પ્રશ્નો સાથે ભાજપના આંતરિક મતભેદો પણ ચર્ચામાં આવ્યા છે.

ભાજપ શાસિત રાધનપુર નગરપાલિકામાં ઉપપ્રમુખ હરેશ ઠક્કરની સોશિયલ મીડિયા પોસ્ટથી રાજકીય ગરમાવો વધ્યો છે...ઉપપ્રમુખનો આક્ષેપ છે કે ગટર, સફાઈ સહિતના વિકાસકામો અંગે રજૂઆત છતાં યોગ્ય ધ્યાન અપાતું નથી. વોર્ડ નંબર 3ના ભાજપના ચાર સભ્યોએ પણ રજૂઆત કરી હોવા છતાં સમસ્યાઓનો ઉકેલ આવ્યો નથી.

આ પણ વાંચોઃ લિવ-ઈન રિલેશનનો કરૂણ અંજામ! હવે ગમે તે થાય મનીષાનો ખેલ પાડી દેવો, શંકાના વહેમમાં પ્રેમનો અંત

સૌથી ગંભીર આક્ષેપ પાલિકા પ્રમુખ ભાવના જોશી અંગે થયો. ઉપપ્રમુખ હરેશ ઠક્કરે દાવો કર્યો કે પ્રમુખ માત્ર નામના છે અને પાલિકાનો વહીવટ તેમના પતિ વિક્રમ જોશી કરે છે.

વિવાદ વધતા જિલ્લા ભાજપ પણ સક્રિય થયું. જિલ્લા ભાજપ પ્રમુખ રમેશ સિંધવે કહ્યું કે સંગઠન અને પ્રભારીએ ઉપપ્રમુખ સાથે બેઠક કરી છે અને નાના-મોટા પ્રશ્નોનું સમાધાન કરાયું છે. સાથે જ તેમણે સ્પષ્ટ કહ્યું કે પાલિકાનો વહીવટ ચૂંટાયેલા પ્રતિનિધિઓએ જ કરવો જોઈએ.

બીજી તરફ કોંગ્રેસે ભાજપ પર પ્રહાર કરતા કહ્યું કે સત્તામાં રહીને પણ પ્રજાના કામ ન થાય તો સત્તા છોડવી જોઈએ.

તો આ સમગ્ર મામલે પ્રમુખ ભાવના જોશીના પતિ વિક્રમ જોશીનો ટેલિફોનિક સંપર્ક કરવામાં આવ્યો... પરંતુ તેમણે આક્ષેપો અંગે કોઈ સ્પષ્ટ જવાબ આપ્યો નહીં.

રાધનપુર નગરપાલિકામાં સત્તાનું સુકાન મહિલા પ્રમુખના હાથમાં છે... પરંતુ ઉપપ્રમુખના આક્ષેપોએ વહીવટમાં કથિત હસ્તક્ષેપના સવાલો ઊભા કર્યા છે. જિલ્લા ભાજપ ભલે વિવાદનો અંત આવ્યો હોવાનું કહે... પરંતુ હવે મોટો સવાલ એ છે કે રાધનપુરને રાજકીય ખેંચતાણ નહીં, વિકાસ મળશે ક્યારે?.