રજા ન મળતાં લાચારી અને ભારે હૈયે યુપી-બિહાર પરત ફર્યા શ્રમિકો! સુરતમાં 'ગાંવ ચલો આંદોલન' તેજ બન્યું

Surat Migrant Workers Protest: સુરત શહેરના એમ્બ્રોઇડરી અને ડાઇંગ-પ્રિન્ટિંગ ઉદ્યોગમાં કામ કરતા શ્રમિકો ભારે રોષ અને લાચારી વચ્ચે વતન પરત ફરી રહ્યા હોવાના દ્રશ્યો સામે આવી રહ્યા છે. તહેવારોમાં અઠવાડિયાની રજા અને યોગ્ય વળતરની માગણીઓ સામે કારખાનેદારોના આકરા વલણથી કંટાળીને સુરતમાં 'ગાંવ ચલો આંદોલન' શરૂ થયું છે. પરિણામે સુરત રેલવે સ્ટેશન પર યુપી અને બિહાર જતી ટ્રેનો માટે શ્રમિકોની લાંબી લાઈનોના દ્રશ્યો જોવા મળી રહ્યા છે.

માત્ર એક દિવસની રજા મેળવવી પણ તેમના માટે મુશ્કેલ
સુરતમાં કમાવવા માટે આવેલા યુપી અને બિહારના અંદાજે 10 લાખ જેટલા લોકો રહે છે, આ લોકો રાત-દિવસ જોયા વગર કારખાનામાં મજૂરી કામ કરે છે. પરંતુ, તહેવોરામાં એક અઠવાડિયાની રજા તો છોડો સપ્તાહમાં માત્ર એક દિવસની રજા મેળવવી પણ તેમના માટે મુશ્કેલ બની ગઈ છે. કારીગરોનો આક્ષેપ છે કે સપ્તાહમાં એક દિવસ રજા આપવાની માગ કરી હોવા છતાં કેટલાક કારખાનેદારો રજા આપવા માટે તૈયાર નથી. સતત કામના બોજ અને માનસિક ત્રાસથી કંટાળીને શ્રમિકોએ ભારે હૈયે પોતાના માદરે વતન તરફ પ્રયાણ કરવાનું શરૂ કર્યું છે.

'રજા માગી તો શેઠે નોકરીમાંથી કાઢી મૂક્યો'
સુરત રેલવે સ્ટેશન પર વતનની વાટ પકડીને બેઠેલા શ્રમિકોનું દ્રશ્ય ઘણું બધું કહી જાય છે. અહીં કામદારોની વ્યથા જાણીને પથ્થર દિલ પર ઓગળી જાય એમ છે. એક કારીગરે આક્રોશ અને દુઃખ વ્યક્ત કરતા ભારે હૈયે જણાવ્યું હતું કે, અમે અઠવાડિયામાં માત્ર એક જ દિવસની રજા માગી હતી, પણ શેઠે સાંભળવાને બદલે સીધા નોકરીમાંથી જ કાઢી મૂક્યા હતા. એટલું જ નહીં, જો કોઈ શ્રમિક બીમાર પડે કે ઈમરજન્સીમાં રજા લેવી પડે, તો કારખાનેદારો દ્વારા તેમનો સીધો પગાર કાપી લેવામાં આવે છે. આવી સ્થિતિમાં કામ કરવું હવે તેમના માટે અશક્ય બની ગયું છે.

સુરત રેલવે સ્ટેશન પર વતન જવા મુસાફરોની લાંબી લાઈનો લાગી...
સુરત રેલવે સ્ટેશન પર 'ગાંવ ચલો આંદોલન' તેજ બનતા જ મુસાફરોનો ભારે ધસારો જોવા મળી રહ્યો છે. એમ્બ્રોડરીના કારખાનાઓમાં કામ કરતા હજારો કામદારો પરિવાર અને સામાન સાથે સ્ટેશન પર લાઈનોમાં ઉભા છે. યુપી અને બિહાર તરફ જતી તમામ ટ્રેનોમાં હાલ ભારે ભીડ જોવા મળી રહી છે. રેલવે સ્ટેશનમાં માત્ર શ્રમિકોની લાચારી અને વતન પાછા ફરવાની ઉતાવળ જ દેખાઈ રહી છે.

'ગામમાં ખેતી કે મજૂરી કરીશું, પણ અન્યાય સહન નહીં કરીએ'
સુરતના કારખાનાઓમાં રોજીરોટી કમાવવા આવેલા લોકો હાલ ભારે હૈયે પાછા ફરી રહ્યા છે. વતન પાછા ફરી રહેલા શ્રમિકોએ જણાવ્યું હતું કે, સુરતમાં આટલું શોષણ વેઠ્યા કરતાં તો અમારા ગામમાં જઈને ખેતી કે અન્ય મજૂરી કામ કરીને ગુજરાન ચલાવી લઈશું. તેઓનું કહેવું છે કે કારખાનેદારોને જ્યારે શ્રમિકોની અછત વર્તાશે અને તેમની જરૂર પડશે, ત્યારે તેઓ જાતે જ ગામડેથી બોલાવશે. પોતાના હક માટે અવાજ ઉઠાવનારા શ્રમિકોએ હવે રોજીરોટી કરતા પોતાના સ્વાભિમાનને પ્રાધાન્ય આપ્યું છે.