કચ્છ : સસ્તા સોનાનો ખેલ, અસલી સોનું બતાવી નકલી પધરાવતી ટોળકીનો પર્દાફાશ!
સોશિયલ મીડિયાની ચમક-દમક પાછળ કેવું મોટું કૌભાંડ છુપાયેલું છે, તેનું વધુ એક ચોંકાવનારું ઉદાહરણ કચ્છના ભુજમાંથી સામે આવ્યું છે. ઈન્સ્ટાગ્રામ પર ફેક આઇડી બનાવીને અડધા ભાવે સોનું આપવાની લોભામણી જાહેરાતો આપતી એક શાતિર ઠગ ટોળકી સક્રિય થઈ હતી. કોણ છે આ શાતિર ટોળકી અને કેવી લાલચ આપીને લોકોને છેતરતી હતી? તેના વિશે આ લેખમાં જાણીશું.
રાજેન્દ્ર ઠક્કર, કચ્છ : જોજો હોં! સોશિયલ મીડિયા પર સસ્તા સોનાની લાલચમાં આવ્યા તો ગયા સમજો. સોશિયલ મીડિયા પર ફેક આઇડી બનાવીને લોકોને લૂંટવાનું આ આખું નેટવર્ક સરહદી જિલ્લા કચ્છના ભુજમાં ધમધમી રહ્યું હતું. આ ઠગ ટોળકીએ ઈન્સ્ટાગ્રામ પર 'madhav571' નામનું એક બોગસ એકાઉન્ટ બનાવ્યું હતું.
Instagram પર સસ્તા સોનાની લાલચ
આ આઈડી પર તેઓ સોનાના અસલી બિસ્કિટના વીડિયો અને ફોટા પોસ્ટ કરતા હતા અને બજાર ભાવ કરતાં અડધા ભાવે સોનું આપવાની લોભામણી જાહેરાતો મૂકીને ગ્રાહકોને પોતાની જાળમાં ફસાવવાનો કારસો રચતા હતા.
આ ઘટનાની જાણ થતાં જ પોલીસની ટીમે ઓપરેશન હાથ ધર્યું હતું. ચોક્કસ બાતમીના આધારે પોલીસે ભુજના ગીતા કોટેજ પાસે આવેલા એક મકાન પર ત્રાટકીને સુલતાન કુંભાર, બસીર કાતીયર, સાજીદ કુંભાર, અસગર કાતીયર અને ફહીમ સોઢા નામના પાંચ શખ્સોને રંગેહાથ દબોચી લીધા હતા.
અસલી સોનું બતાવી ઠગાઈનો કારસો
આ ઠગો ગ્રાહકોને વિશ્વાસમાં લેવા સેમ્પલ તરીકે એક કિલો અસલી સોનું બતાવતા હતા અને પછી નકલી બિસ્કિટ પધરાવી દેવાના ફિરાકમાં હતા. પોલીસે ઘટનાસ્થળેથી 10 અસલી અને 15 નકલી સોનાના બિસ્કિટ, એક ક્રેટા કાર, ૩ બાઈક અને નવ મોબાઈલ ફોન સહિતનો મુદ્દામાલ કબ્જે કર્યો છે.
1.50 કરોડનું સોનું આવ્યું ક્યાંથી?
મોટો સવાલ એ છે કે, આ ઠગ ટોળકી પાસે 1.50 કરોડનું એક કિલો અસલી સોનું ક્યાંથી આવ્યું? આ ગેંગ પાછળ કોઈ મોટું આંતરરાજ્ય ડુપ્લીકેટ ગોલ્ડ રેકેટ કામ કરી રહ્યું છે કે કેમ? હાલ તો પોલીસે આ કાળા કારોબારના મૂળિયાં ઉખાડવા તપાસના ચક્રો ગતિમાન કર્યા છે.
