ગુજરાતમાં વધુ એક નકલી અધિકારીનો પર્દાફાશ, CISFનો નકલી DSP બની લોકોને લગાવ્યો લાખોનો ચૂનો

ઉદય રંજન ઝી, અમદાવાદ : એક કહેવત છે કે લાલચ બુરી બલા છે, જ્યારે કોઈ પોતાની ઓળખાણ CISFના અધિકારી તરીકે તમને આપે અને સસ્તામાં આઈફોન કે નોકરીની ઓફર આપે ત્યારે ચેતી જજો, કારણ કે સામેવાળો વ્યક્તિ અધિકારી નહીં પણ એક ગઠિયો હોઈ શકે છે. અમદાવાદ શહેર ક્રાઈમ બ્રાન્ચે લાલદરવાજા પાસેથી એક એવા શખ્સની ધરપકડ કરી છે, જે પોતે CISFનો ડેપ્યુટી સુપરિન્ટેન્ડેન્ટ ઓફ પોલીસ હોવાની ઓળખ આપતો હતો. આ મહાઠગે લોકોને ખોટી ઓળખાણ આપી પ્રભાવ પાડી ભોળપણનો લાભ લઈને લાખો રૂપિયાની છેતરપિંડી આચરી હોવાનું સામે આવ્યું છે.

નશાના કાળા કારોબારનો પર્દાફાશ, અમદાવાદ SOGએ કરોડોના પોશડોડા સાથે બે આરોપીને દબોચ્યા

નકલી અધિકારીની ક્રાઈમ કુંડળી

• ગુજરાતમાં નકલી અધિકારીઓ પકડાવાનો સિલસિલો યથાવત, હવે CISFનો નકલી DSP ઝડપાયો
• અમદાવાદ શહેર ક્રાઈમ બ્રાન્ચે લાલદરવાજા સરદારબાગ પાસેથી મહાઠગ અઝમાએ સિકંદર કમ્બોઝની કરી ધરપકડ
• આરોપી પાસેથી સેન્ટ્રલ ઈન્ડસ્ટ્રીયલ સિક્યોરિટી ફોર્સ CISFના DSPનું બોગસ આઈકાર્ડ મળી આવ્યું
• આર્મી કેન્ટીનમાંથી સસ્તા આઈફોન અને દુબઈથી સસ્તા મોબાઈલ મંગાવી આપવાના નામે કરતો હતો ઠગાઈ
• એરપોર્ટ પર પોતે ઉચ્ચ હોદ્દા પર હોવાની ઓળખ આપી બેરોજગારોને નોકરી અપાવવાના બહાને ખંખેરતો હતો રૂપિયા
• કાશ્મીરથી સસ્તામાં અખરોટ અને કેરોસીન અપાવવાની લાલચ આપીને પણ લોકો પાસેથી પડાવતો હતો પૈસા
• મોજ-શોખ પૂરા કરવા નકલી આઈકાર્ડનો કરતો ઉપયોગ, ટ્રેનમાં ટિકિટ લીધા વિના જ કરતો હતો મુસાફરી
• આરોપી અઝમા એ સિકંદર સામે વર્ષ 2022માં જમ્મુ કાશ્મીરમાં ઠગાઈનો ગુનો નોંધાયેલો છે, એક ચોરીના કેસમાં છે વોન્ટેડ

CISFનો નકલી DSP ઝડપાયો

અમદાવાદ શહેર ક્રાઈમ બ્રાન્ચનીને બાતમી મળી હતી કે એક શખ્સ નકલી ઓળખ ઉભી કરીને લોકો સાથે છેતરપિંડી કરી રહ્યો છે. આ બાતમીના આધારે ક્રાઈમ બ્રાન્ચે લાલદરવાજા સરદારબાગ પાસેથી અઝમા એ સિકંદર કમ્બોઝ નામના યુવકની ધરપકડ કરી છે. તપાસ કરતા આ યુવક પાસેથી પોલીસને CISFના DSPનું એક બોગસ આઈકાર્ડ પણ મળી આવ્યું છે. આ જ નકલી આઈકાર્ડના આધારે તે લોકો પર રોફ જમાવતો હતો.

ખોટી ઓળખ આપી લાખો રૂપિયાની છેતરપિંડી

પોલીસની સઘન પૂછપરછમાં સામે આવ્યું છે કે, આરોપી અઝમા એ સિકંદરે પંજાબમાં અભ્યાસ કર્યો હતો અને ત્યારબાદ તે અલગ-અલગ જગ્યાએ નોકરી કરતો હતો. પરંતુ મોજ-શોખ કરવા માટે તેને વધુ રૂપિયાની જરૂર હતી. આ જરૂરિયાત પૂરી કરવા તેણે શોર્ટકટ આ અપનાવ્યો. તે લોકોને કાશ્મીરથી સસ્તામાં અખરોટ અને કેરોસીન અપાવવાની લાલચ આપતો. એટલું જ નહીં, આર્મી કેન્ટીનમાંથી સસ્તા ભાવે સામાન અને આઈફોન અપાવવાના બહાને પણ લોકો પાસેથી રૂપિયા ખંખેરતો હતો.

બેરોજગારોને કરતો હતો ટાર્ગેટ

આરોપી એરપોર્ટ પર પોતે નોકરી કરતો હોવાની ઓળખ આપીને, બેરોજગારોને એરપોર્ટમાં નોકરી અપાવવાના અને દુબઈથી સસ્તામાં આઈફોન મંગાવી આપવાના નામે પૈસા લઈ લેતો હતો. આ નકલી અધિકારીની હિંમત એટલી ખુલી ગઈ હતી કે તે ટ્રેનમાં મુસાફરી કરતા સમયે પણ આ બોગસ આઈકાર્ડનો જ ઉપયોગ કરતો અને ટિકિટ લેતો નહોતો. અલગ-અલગ જગ્યાએ જઈને તે પોતાનો પરિચય કેળવતો અને પછી શિકાર બનાવીને પૈસા પડાવતો.

આરોપીનો ગુનાહિત ઇતિહાસ પણ સામે આવ્યો છે. આરોપી સામે જમ્મુ કાશ્મીરમાં વર્ષ 2022માં આ જ પ્રકારની છેતરપિંડીનો ગુનો નોંધાયેલો છે. આ ઉપરાંત, તે અન્ય એક ચોરીના ગુનામાં હજુ પણ પોલીસ ચોપડે ફરાર છે.