અમદાવાદમાં ફિલ્મી ઢબે ફાયરિંગ! 25 કરોડના ડ્રગ્સ કેસના આરોપીના પગમાં વાગી ગોળી

Ahmedabad : 25 કરોડ રૂપિયાના હાઈપ્રોફાઈલ ડ્રગ્સ કેસમાં અમદાવાદના સાબરમતી રિવરફ્રન્ટ પર સનસનાટીભર્યા દ્રશ્યો સર્જાયા કાયદાની સરેઆમ ધજ્જિયાં ઉડાવીને નાસી છૂટવાનો પ્રયાસ કરનાર ડ્રગ્સ માફિયાને ક્રાઈમ બ્રાન્ચે દિનદહાડે જ ભોંયભેગો કરી દીધો છે. ક્રાઈમ બ્રાન્ચની આ સિંઘમ સ્ટાઈલ એક્શનથી સમગ્ર વિસ્તારમાં ભારે ચકચાર મચી ગઈ છે.

આરોપીની ભાગવાની ચાલ નિષ્ફળ

વાત એમ છે કે 25 કરોડના ડ્રગ્સ પ્રકરણના મુખ્ય આરોપી કફીલ અહમદને પોલીસ પ્રોટેક્શન હેઠળ રૂટીન હોસ્પિટલ ચેકઅપ માટે લઈ જવામાં આવી રહ્યો હતો. પોલીસની ગાડી જ્યારે સાંજે આશરે સાડા ચાર વાગ્યે સાબરમતી રિવરફ્રન્ટ નજીકથી પસાર થઈ રહી હતી, ત્યારે શાતિર આરોપી કફિલે નાસી છૂટવાનો એક મોટો અને જોખમી પ્લાન બનાવ્યો હતો.

અમદાવાદના સોલામાં ડ્રેનેજ પમ્પિંગ સ્ટેશનમાં મોટી દુર્ઘટના, બે શ્રમિકોના મોત

ચાલુ ગાડીએ અચાનક જવાનો પર હુમલો

પોલીસ પકડમાંથી મુક્ત થવા માટે કફીલે ચાલુ ગાડીએ અચાનક જવાનો પર હુમલો કરી દીધો. આ દરમિયાન અમદાવાદ ક્રાઈમ બ્રાન્ચના અધિકારીઓ અને આરોપી વચ્ચે ભારે ઝપાઝપી અને ઘર્ષણ થયું હતું. સ્થિતિ કાબૂ બહાર જતાં ક્રાઈમ બ્રાન્ચની ટીમે આરોપી કફીલ એહમદ ઉર્ફે જાવેદ અન્સારીના પગમાં ફાયરિંગ કર્યું. ગોળી વાગતા જ લોહીલુહાણ થયેલો ડ્રગ્સ માફિયા રસ્તા પર જ ઢળી પડ્યો.

આ ઓપરેશને ફરી એકવાર સાબિત કરી દીધું છે કે ગુજરાતમાં ગુનેગારો ગમે તેટલા શાતિર કેમ ન હોય, પણ કાયદાના લાંબા હાથ અને ક્રાઈમ બ્રાન્ચના સચોટ નિશાનાથી તેઓ ક્યારેય બચી શકશે નહીં.

20 ઓક્ટોબરે પોલીસે કરી હતી ધરપકડ

ઉલ્લેખનીય છે કે 20 ઓક્ટોબરે એક્સપ્રેસ હાઈવે પરથી એક કાળા કલરની ગાડીમાંથી ડ્રગ્સના જથ્થા સાથે કફીલ સહિતના ત્રણ આરોપીની ધરપકડ કરાઈ હતી અને તેમની પાસેથી કરોડો રૂપિયાના ડ્રગ્સનો જથ્થો જપ્ત થયો હતો. આ એ જ 25 કરોડના ડ્રગ્સ કેસનો કિંગપિન કફીલ છે, જેણે રિવરફ્રન્ટ પર પોલીસ પર હુમલો કરીને ભાગવાનું સાહસ કર્યું અને અંતે પગમાં ગોળી ખાવાનો વારો આવ્યો.