આતુરતાનો અંત... આ તારીખે ખુલશે Jioનો IPO, આવી ગઈ તારીખ, 220 રૂપિયા છે GMP

Jio Platforms IPO : રિલાયન્સ ઈન્ડસ્ટ્રીઝના ચેરમેન મુકેશ અંબાણીની માલિકીની કંપની જિયો પ્લેટફોર્મ્સના IPOની રાહ જોઈ રહેલા રોકાણકારો માટે મોટા સમાચાર છે. 14 ઓક્ટોબરના રોજ, રિલાયન્સ ઈન્ડસ્ટ્રીઝે તેની પેટાકંપની, જિયો પ્લેટફોર્મ્સના IPO માટે રેડ હેરિંગ પ્રોસ્પેક્ટસ (RHP) દાખલ કર્યું છે. આ ડોક્યુમેન્ટ અમદાવાદમાં આવેલી રજિસ્ટ્રાર ઓફ કંપનીઝ સમક્ષ રજૂ કરવામાં આવ્યા હતા.

ફાઇલિંગ મુજબ, જિયો પ્લેટફોર્મ્સનો IPO 21 ઓક્ટોબર, 2026ના રોજ ખુલશે અને 23 ઓક્ટોબરના રોજ બંધ થશે. દરમિયાન, મોટા સંસ્થાકીય રોકાણકારો માટે એન્કર બિડિંગ 19 ઓક્ટોબરના રોજ નિર્ધારિત કરવામાં આવ્યું છે. આ બધાની વચ્ચે ગ્રે માર્કેટમાં કંપનીના શેરની ભારે માંગ જોવા મળી રહી છે. હાલમાં શેર ₹220ના પ્રીમિયમ પર ટ્રેડ થઈ રહ્યા છે.

વેચાઈ રહી છે આ સરકારી બેંક, કેબિનેટે આપી મંજૂરી, કેનેડાની કંપની ખરીદશે

આ શેરધારકો માટે ખાસ તક

જિયો પ્લેટફોર્મ્સના IPOમાં પાત્ર કર્મચારીઓ માટે ₹500 કરોડ સુધીના શેર અનામત રાખવાની જોગવાઈ છે. આ ઉપરાંત, રિલાયન્સ ઈન્ડસ્ટ્રીઝના પાત્ર શેરધારકો માટે ₹2,500 કરોડ સુધીના શેર અનામત રાખવામાં આવી શકે છે. આનો અર્થ એ છે કે સામાન્ય રોકાણકારોની સાથે સાથે રિલાયન્સના અમુક પાત્ર શેરધારકો અને કર્મચારીઓને પણ રોકાણ કરવાની તક મળશે.

નિર્ધારિત નિયમો અને પાત્રતાના માપદંડોને પૂર્ણ કરતા રિલાયન્સ ઈન્ડસ્ટ્રીઝના શેરધારકો આ અનામતનો લાભ મેળવવા માટે હકદાર રહેશે. આ કેટેગરીમાં વ્યક્તિગત રોકાણકારો તેમજ HUFsનો સમાવેશ થાય છે. જોકે, પાત્રતા RHP ફાઇલિંગની તારીખે લાગુ નિયમોના આધારે નક્કી કરવામાં આવશે. કાયદા હેઠળ રોકાણ માટે અપાત્ર ગણાતા શેરધારકોને આ સુવિધામાંથી બાકાત રાખવામાં આવશે.

અગાઉ SEBI સમક્ષ ડ્રાફ્ટ IPO રજૂ કરાયો હતો

જિયો પ્લેટફોર્મ્સના IPO માટેની તૈયારીઓ પહેલેથી જ ચાલી રહી હતી. રિલાયન્સ ઈન્ડસ્ટ્રીઝે 19 જૂનના રોજ જાહેરાત કરી હતી કે જિયો પ્લેટફોર્મ્સે IPO માટે તેનું ડ્રાફ્ટ રેડ હેરિંગ પ્રોસ્પેક્ટસ દાખલ કર્યું છે. તો કંપનીએ બજારમાં નવા શેર બહાર પાડવાનો પ્રસ્તાવ મૂક્યો હતો. 

દરેક શેરની ફેસ વેલ્યુ ₹10 નક્કી કરવામાં આવી હતી. ત્યારબાદ, 28 ઓગસ્ટના રોજ, રિલાયન્સ ઈન્ડસ્ટ્રીઝે માહિતી આપી હતી કે જિયો પ્લેટફોર્મ્સને DRHP અંગે SEBI તરફથી અવલોકન પત્ર પ્રાપ્ત થયું છે. RHP દાખલ કરવાની સાથે હવે IPOની પ્રક્રિયા આગળ વધી છે.