અદાણીના ઉત્તરાધિકારી જાહેર! આ 4 વ્યક્તિ સંભાળશે 27 લાખ કરોડના સામ્રાજ્યની ધુરા, જાણો કોણ કોણ છે લિસ્ટમાં સામેલ

Adani Group Heirs : અદાણી ગ્રુપની કમાન હવે ધીમે ધીમે આગામી પેઢીને સોંપવામાં આવશે અને આ માટે ગ્રુપ પુરી તૈયારી કરી રહ્યું છે. ગૌતમ અદાણીએ પરિવારના ચાર સભ્યોને આ ગ્રુપને આગળ લઈ જવાની જવાબદારી સોંપી છે. રૂપિયા 27 લાખ કરોડના આ બિઝનેસ સામ્રાજ્યની ધુરા પરિવારના જે ચાર સભ્યો સંભાળશે, તેમાં તેમના બે પુત્રો, કરણ અને જીત અદાણી તથા તેમના બે ભત્રીજાઓ, પ્રણવ અને સાગર અદાણીનો સમાવેશ થાય છે.

શેરબજારમાં જબરદસ્ત તેજી! આજે કેમ દોડ્યો નિફ્ટી? જાણો કારણ

મહત્વની વાત એ છે કે, આ ચાર વ્યક્તિઓને માત્ર પરિવારના સભ્ય હોવાને કારણે જવાબદારીઓ આપવામાં આવી નથી, પરંતુ તેમને ગ્રુપના વિવિધ વ્યાપારી ક્ષેત્રોમાં ચોક્કસ ભૂમિકાઓ સોંપવામાં આવી છે. પરિણામે, અદાણી ગ્રુપના ભવિષ્યના વિકાસ અને મહત્વપૂર્ણ નિર્ણયો લેવાની પ્રક્રિયામાં તેઓ મુખ્ય ભૂમિકા ભજવશે તેવી શક્યતા છે.

કોણ છે અદાણી ગ્રુપના આ 4 ઉત્તરાધિકારી?

અદાણી ગ્રુપના સ્થાપક ગૌતમ અદાણી 64 વર્ષના છે. તેમણે પોતાના વિશાળ સામ્રાજ્યને આગળ વધારવા માટે પરિવારના ચાર સભ્યોમાં પોતાના બે પુત્રો અને બે ભત્રીજાઓની પસંદગી કરી છે. તેમાંથી દરેક વ્યક્તિ અલગ-અલગ વ્યાપારી વિભાગની જવાબદારી સંભાળે છે.

1. કરણ અદાણી (39 વર્ષ)

કરણ અદાણી ગૌતમ અદાણીનો મોટો પુત્ર છે. તેણે 2009માં ગ્રુપ સાથે પોતાની કારકિર્દીની શરૂઆત કરી હતી, જેમાં તે પોર્ટ બિઝનેસમાં એક એક્ઝિક્યુટિવ પદ પર હતો. 2016માં તેની નિમણૂક 'અદાણી પોર્ટ્સ એન્ડ સ્પેશિયલ ઈકોનોમિક ઝોન' (APSEZ)ના CEO તરીકે કરવામાં આવી હતી. તાજેતરમાં કંપનીએ આશરે ₹2.41 લાખ કરોડના મૂલ્યનું એક મોટું અધિગ્રહણ પૂર્ણ કર્યું છે. ગ્રુપના પોર્ટ વ્યવસાયને આગળ વધારવામાં કરણની ભૂમિકા અત્યંત મહત્વપૂર્ણ માનવામાં આવે છે.

2. જીત અદાણી (29 વર્ષ)

જીત અદાણી ગૌતમ અદાણીનો નાનો પુત્ર છે. તે 2019માં અદાણી ગ્રુપમાં જોડાયો હતો. હાલમાં તે 'અદાણી એરપોર્ટ હોલ્ડિંગ્સ લિમિટેડ' (AAHL)માં ડિરેક્ટર તરીકે કાર્યરત છે. તે એરપોર્ટ વ્યવસાય સાથે સંકળાયેલી અનેક મહત્વપૂર્ણ જવાબદારીઓ સંભાળે છે, જેમાં એરપોર્ટના રોજિંદા સંચાલનની દેખરેખનો પણ સમાવેશ થાય છે.

3. પ્રણવ અદાણી (48 વર્ષ)

પ્રણવ અદાણી ગૌતમ અદાણીનો ભત્રીજો છે. તે અદાણી એન્ટરપ્રાઇઝિસ લિમિટેડમાં ડિરેક્ટર છે અને અદાણી ગ્રુપમાં મેનેજિંગ ડિરેક્ટર પણ છે. તેણે 1999માં અદાણી વિલ્મર સાથે કૃષિ-કોમોડિટી ક્ષેત્રે પોતાની નેતૃત્વ સફરની શરૂઆત કરી હતી. ગ્રુપના વ્યવસાયો સાથે લાંબા સમયથી જોડાયેલા હોવાને કારણે તેની પાસે નોંધપાત્ર અનુભવ હોવાનું માનવામાં આવે છે.

4. સાગર અદાણી (32 વર્ષ)

સાગર અદાણી પણ ગૌતમ અદાણીનો ભત્રીજો છે. તે અદાણી એન્ટરપ્રાઇઝિસમાં એક્ઝિક્યુટિવ ડિરેક્ટરના પદ પર છે. ઓક્સફર્ડમાં તેનો અભ્યાસ પૂર્ણ કર્યા પછી તે 2015માં અદાણી ગ્રુપમાં જોડાયો હતો. પાવર સેક્ટર તેમજ અદાણી એનર્જી લિમિટેડ હેઠળની વિવિધ પહેલો અને પ્રોજેક્ટ્સને આગળ વધારવાનો શ્રેય તેને જાય છે.

અદાણી ગ્રુપનું બિઝનેસ સામ્રાજ્ય

'ફોર્ચ્યુન ઇન્ડિયા' સાથેની એક વાતચીતમાં અદાણીએ જણાવ્યું હતું કે, "આગામી પેઢીને નેતૃત્વ વારસામાં નથી મળતું, તેને તે નેતૃત્વ મેળવવા માટેની જવાબદારી વારસામાં મળે છે."

અદાણી પરિવારના બિઝનેસ સામ્રાજ્યનો અંદાજ એ હકીકત પરથી લગાવી શકાય છે કે ગ્રુપની કંપનીઓનું કુલ માર્કેટ કેપિટલાઇઝેશન આશરે ₹17 લાખ કરોડ છે, જ્યારે તેમની વ્યક્તિગત સંપત્તિ અંદાજે ₹10 લાખ કરોડ હોવાનું માનવામાં આવે છે.