GoPro કેમેરા અંગે ચીન તરફથી નથી મળતી જાણકારી, પહલગામ આતંકી હુમલાને લઈને NIA નો મોટો ખુલાસો
કાશ્મીરના પહલગામમાં થયેલા આતંકવાદી હુમલા મામલે એનઆઈએ તરફથી જણાવવામાં આવ્યું છે કે આતંકવાદીઓ પાસેથી મળેલા ગોપ્રો કેમેરા અંગે ચીન કોઈ જાણકારી આપી રહ્યું નથી. જાણકારી માટે ભારત તરફથી અનુરોધ કરવામાં આવ્યો હતો. પરંતુ ચીન તરફથી જવાબ આપવામાં નથી આવતો.
જમ્મુ કાશ્મીરના પહલગામમાં થયેલા આતંકી હુમલાનો મામલો ચર્ચામાં છે. આ અંગે રાષ્ટ્રીય તપાસ એજન્સી એનઆઈએના ડાયરેક્ટર જનરલ રાકેશ અગ્રવાલે કહ્યું છે કે પહલગામમાં નરસંહારની જવાબદારી લેનાર આતંકીઓ પાસે અમેરિકામાં બનેલો એક ગોપ્રો કેમેરો હતો. આ મામલે ચીન કોઈ જવાબ આપતું નથી.
ગ્લોબલ સપ્લાય ચેન
આ મામલે વરિષ્ઠ અધિકારીઓનું કહેવું છે કે પહલગામમાં આતંકી હુમલાની તપાસ દરમિયાન અધિકારીઓ ગ્લોબલ સપ્લાય ચેનની તપાસ પણ કરી રહ્યા હતા. જેમાં મુખ્ય વાત હતી કે અમેરિકામાં બનેલો ગોપ્રો કેમેરો જે ચીન મોકલવામાં આવ્યો હતો તે લશ્કર એ તૈયબાના આતંકીઓ પાસે કેવી રીતે પહોંચ્યો ? આ અંગે એજન્સીને કેટલાક પુરાવા પણ મળ્યા છે જેને લઈ જરૂરી જાણકારી માટે ચીનને અનુરોધ કરવામાં આવ્યો હતો પણ ચીન તરફથી કોઈ જવાબ આપવામાં નથી આવ્યો.
અમેરિકાથી કેમેરો પહોંચ્યો ચીન
તપાસ દરમિયાન એનઆઈએ દ્વારા ગ્રોપ્રો ઈંકના નિર્માતાનો અમેરિકામાં સંપર્ક કરવામાં આવ્યો હતો. જેથી જાણી શકાય કે કેમેરો ક્યાં વેંચાયો હતો. કંપની તરફથી જણાવવામાં આવ્યું કે આ કેમેરો મૂળ ચીનના એક કોમર્શિયલ ડિસ્ટ્રીબ્યૂટરને મોકલવામાં આવ્યો હતો. ત્યારબાદ ભારત તરફથી ચીનનો જરૂરી જાણકારી માટે સંપર્ક કરવામાં આવ્યો અને જાણકારી માટે અનુરોધ કરવામાં આવ્યો પરંતુ ચીન તરફથી ગો પ્રો કેમેરા અંગે કોઈ જાણકારી આપવામાં નથી આવી.
આતંકીઓ રાખે છે હાઈ ટેક કેમેરા
પહલગામ થયેલા હુમલા પછી દાચીગામના જંગલોમાં થયેલી એક અથડામણમાં માર્યા ગયેલા આતંકીઓ પાસે પણ એક હાઈ ટેક કેમેરા હતો. જેના કારણે જમ્મૂ કાશ્મીરમાં આતંકી સંગઠનોને બહારથી મળતા સપોર્ટની તપાસમાં નવો વળાંક આવ્યો. તપાસ કરનાર અધિકારીઓનું માનવું છે કે આ સપ્લાય ચેનનો પર્દાફાશ થાય તે જરૂરી છે. જેનાથી ભારત વિરોધી તત્વો તરફથી થતા ટેરર ફંડિંગ અને અંડરગ્રાઉન્ડ નેટવર્કનો ખુલાસો થાય.